Mafumbo Agho Baibolo Likuzgora
Kasi visopa vyose vikucindika Ciuta?
Para mungategherezga nkhani za pa caru cose, mungawona kuti masuzgo ghanyake ghakuŵapo cifukwa ca visopa. Ni visopa vyose yayi ivyo Ciuta wakukondwa navyo. (Mateyu 7:15) Nakuti ŵanthu ŵanandi ŵapuluskika.—Ŵazgani 1 Yohane 5:19.
Ndipouli, Ciuta wakumanya kuti pali ŵanthu ŵanyake awo ŵakukhumba kucita uwemi na kumanya unenesko. (Yohane 4:23) Ciuta wakukhumba kuti ŵanthu aŵa ŵasambire unenesko mu Baibolo.—Ŵazgani 1 Timote 2:3-5.
Kasi mungacimanya wuli cisopa caunenesko?
Yehova Ciuta wakovwira ŵanthu ŵakupambanapambana kuti ŵaŵe ŵakukolerana. Wakuŵasambizga kuti ŵamanye unenesko kweniso kuti ŵatemwanenge. (Mika 4:2, 3) Ntheura mungaŵamanya awo ŵali mu cisopa caunenesko cifukwa ŵakutemwana.—Ŵazgani Yohane 13:35.
Kwizira mu cisopa caunenesko, Yehova wakovwira ŵanthu ŵakupambanapambana kuti ŵaŵe ŵakukolerana.—Salmo 133:1
Awo ŵakusopa Ciuta mwaunenesko ŵakulondezga fundo za mu Baibolo ndipo cipulikano cawo cikujintha pa Baibolo. (2 Timote 3:16) Kweniso ŵakucindika zina la Ciuta. (Salmo 83:18) Iwo ŵakuphalira ŵanji kuti Ufumu wa Ciuta ndiwo wekha uzamumazga masuzgo gha ŵanthu. (Daniel 2:44) Ŵakucita nga ni Yesu, ndipo ŵakulondezga fundo yakuti “ungweru winu uŵale” apo ŵakucitira viwemi ŵazengezgani ŵawo. (Mateyu 5:16) Ntheura Ŵakhristu ŵaunenesko ŵakumanyikwa para ŵakwendera ŵanyawo kuŵaphalirako makani ghawemi gha Ufumu wa Ciuta.—Ŵazgani Mateyu 24:14; Milimo 5:42; 20:20.