Kasi Para Khuni Ladumulika Lingasundaso?

KHUNI la cedar la ku Lebanon ndakutowa kuluska khuni la maolive. Kweni khuni la maolive likukhala vyaka vinandi. Ghanyake ghakhala vyaka pafupifupi 1,000. Misisi yake yikuthaza na kunjira chomene pasi. Para ŵadumura khuni ili, likusundaso chikuru misisi yake yindawomire.

Yobu wakamanyanga kuti nanga wangafwa, wazamuwukaso. (Job 14:13-15) Wakayowoya vya khuni la maolive kuti walongosore fundo yakuti Chiuta wazamuwuska ŵakufwa. Yobu wakati: ‘Pali chigomezgo nanga nkhu khuni. Usange ladumulika, likuphukaso.’ Nanga kungaŵa chilangalanga, kweni para vula yalokwaso chisinga cha khuni la maolive chikusunda ‘minthavi nga ni khuni liphya.’​—Job 14:7-9.

Para khuni la maolive ladumulika, mulimi wakukhumbisiska kuwona kuti laphukaso. Mwakuyana waka, Yehova wakukhumbisiska kuzakawuska ŵateŵeti ŵake kweniso ŵanthu ŵanandi awo ŵali kufwa. (Mat. 22:31, 32; Yoh. 5:28, 29; Mil. 24:15) Tizamukondwa chomene kupokelera ŵabali ŵithu awo ŵazamuwuskika.