Kasi Mukukumbuka?

Kasi muli kuŵazga magazini gha Gongwe la Mulinda ghasonosono apa? Yezgani kuzgora mafumbo agha:

Chifukwa wuli Chiuta wakazomerezganga Ŵaisrayeli kuchita nkhondo?

Yehova wakutemwa chomene ŵanthu. Ndipouli, nyengo zinyake Yehova wakazomerezganga Ŵaisrayeli kuti ŵarwe nkhondo kuti ŵamarane na ŵalwani awo ŵakalimbananga nawo. Yehova pera ndiyo wakamanyanga munthu uyo ngwakwenelera kurwa nkhondo, kweniso apo wangalutira ku nkhondo.—w15 11/1, peji 4-5.

Kasi ŵapapi ŵakwenera kuchita vichi kuti ŵasambizge makora ŵawukirano kuteŵetera Yehova?

Ŵapapi ŵakwenera kutemwa na kuŵa chiyelezgero chiwemi chakujiyuyura ku ŵana ŵawo. Ŵakweneraso kuchita vinthu mwamahara na kuŵamanya makora ŵana ŵawo.—w15 11/15, peji 9-11.

Chifukwa wuli fundo yakuti Petrosi ndiyo wakaŵa Papa wakwamba njautesi?

Lemba Mateyu 16:17, 18 likuyowoya yayi kuti Petrosi ndiyo wakaŵa mutu wa mpingo Wachikhristu. M’malo mwake, Baibolo likuti Yesu ndiyo ni libwe lapakona panji kuti mutu wa mpingo. (1 Pet. 2:4-8)—w15 12/1, peji 12-14.

Kasi ni vichi ivyo tikwenera kughanaghanirapo dankha pambere tindayowoye?

Tikwenera kusankha (1) nyengo yiwemi yakuyowoyera (Muph. 3:7), (2) mazgu ghawemi (Zinth. 12:18), kweniso (3) umo tingayowoyera. (Zinth. 25:15) Para tikuchita nthena, tilongorenge kuti tikugwiliskira ntchito makora lulimi lwithu.—w15 12/15, peji 19-22.

Kasi ni mitundu wuli ya ukhuluku iyo Ŵakhristu ŵakwenera kugega?

Ŵakhristu ŵaunenesko ŵakwenera kugega kuyowoya utesi na kusesa ŵanji. Kweniso ŵakwenera yayi kuyowoya fundo zautesi kuti ŵanange mbiri ya ŵanthu ŵanyake, nesi kwiba.—wp16.1, peji 5.

Kasi “ŵalara ŵa ŵasembe” awo ŵakuzunulika mu Malemba Ghachigiriki ŵakaŵa anjani?

Mazgu ghakuti “ŵalara ŵa ŵasembe” ghakuyowoya za ŵalaraŵalara ŵa mu gulu la ŵasembe, kusazgapo awo ŵakaŵapo ŵasembe ŵakuru.—wp16.1, peji 10.

Kasi tikwenera kumuwona wuli uyo wakurya chingwa na kumwa vinyo pa Chikumbusko?

Tikwenera kumuwona kuti ngwapadera yayi. Nakuti Mkhristu uyo ngwakuphakazgika nadi wakukhumba ntchindi zapadera yayi. Iyo wakuchita kupharazga yayi kuti wali kuphakazgika na mzimu wa Chiuta. (Mat. 23:8-12)—w16.01, peji 23-24.

Kasi vikenda wuli kuti Abrahamu wamanye Chiuta na kuŵa nayo paubwezi, ndipo ise tikusambirapo vichi?

Abrahamu wakwenera kuti wakasambira vya Yehova kufuma kwa Shemu. Kweniso wakawonanga ivyo Chiuta wakamuchitira pamoza na mbumba yake. Nase tikwenera kusambira Baibolo na kuwona ivyo Yehova wakutichitira. Ivi vitovwirenge kuti tiŵe nayo paubwezi.—w16.02, peji 9-10.

Kasi ni njani wakaŵika vyaputara na mavesi mu Baibolo?

M’ma 1200 C.E., Muliska Stephen Langton wakaŵika vyaputara mu Baibolo. Pamanyuma, ŵalembi Ŵachiyuda ŵakagaŵa mavesi mu Baibolo la Malemba Ghachihebere. Mu 1500 C.E., Robert Estienne wakagaŵa mavesi mu Baibolo la Malemba Ghachigiriki.—wp16.2, peji 14-15.

Apo Satana wakayezganga Yesu, kasi wakaluta nayo nadi ku tempile?

Tikumanya makora yayi kuti wakaluta nayo nadi panji wakamulongora waka mu mboniwoni. Kweni malemba gha Mateyu 4:5 na Luka 4:9 ghakuti Yesu wakatolekera ku Yerusalemu na kwimikika pachanya pa linga la tempile.—w16.03, peji 31-32.

Kasi uteŵeti withu ukuyana wuli na jumi?

Jumi likuwa pachokopachoko, likusamphuska na kovwira vyamoyo. Jumi ni thumbiko lakufuma kwa Chiuta. (Doto. 33:13) Ntheura para nase tikukolerana pakupharazga makani ghawemi, ndikuti uteŵeti withu uli nga ni jumi.—w16.04, peji 4.