Para Tikuwona Kuti Ntchakusuzga Kuzizipizga

Mwachiyelezgero, Sallya wa ku United States uyo wakaluza katundu wake chifukwa cha chimphepo chikuru cha hurricane, wakayowoya kuti: “Nkhawonanga kuti ningazizipizga yayi suzgo ili chifukwa nkhafipanga mtima chomene. Kwa mazuŵa ghanandi nkhawona kuti palije icho ningachita.”

Wuli usange munthu uyo mukumutemwa wafwa? Janice wa ku Australia, wakati: “Ŵana ŵane ŵaŵiri ŵanalume ŵati ŵafwa, mtima wane ukasweka ndipo mahara ghakanimalira. Nkhaŵeyelera Chiuta kuti: ‘Ningazizipizga yayi suzgo ili. Zomerezgani kuti nane nifwe waka. Nkhukhumba yayi kuŵaso wamoyo.’”

Daniel nayo wakasuzgika chomene maghanoghano chifukwa chakuti muwoli wake wakaŵa wambura kugomezgeka. Iyo wakati: “Muwoli wane wati waniphalira kuti wakaŵa wambura kugomezgeka kwa nyengo yitali, vikaŵa nga kuti mtima wane walasika na chimayi. Nkhasuzgika chomene maghanoghano ndipo vikaniŵinya kwa myezi yinandi.”

Magazini iyi ya Gongwe la Mulinda yilongosorenge kuti umoyo ngwakuzirwa nangauli

• Mungasangana na masoka gha chilengiwa

• Wakutemweka winu wafwa

• Mfumu panji muwoli winu ngwambura kugomezgeka

• Mukulwara matenda ghakuru

• Mukuwona kuti ntchakusuzga kuzizipizga

Chakwamba, kasi tingachita wuli para tasangana na masoka gha chilengiwa?