Sono Napo Mungaŵa Ŵakukondwa
UMOYO uzamuŵa wakukondweska chomene kunthazi, chifukwa kuzamuŵavya matenda, uchekuru, na nyifwa. Kweni sono tikusangana na masuzgo ghanandi. Kasi mungachita wuli kuti muŵenge ŵakukondwa pasono? Baibolo lili na ulongozgi uwo ungamovwirani kuti muŵenge ŵakukondwa kweniso mukhorwenge na umoyo. Wonani umo Baibolo lingamovwilirani pa vinthu vyakulondezgapo ivi.
KUKHORWA NA UMOYO
Ulongozgi wa mu Baibolo: “Umoyo winu uŵenge wambura kutemwa ndalama, uku mukukhorwa na vinthu ivyo vilipo.”—Ŵahebere 13:5.
Ŵanthu ŵanandi mazuŵa ghano ŵakuwona kuti para munthu wali na vinthu vinandi ndipo wangakhorwa na umoyo. Kweni Baibolo likuti tikhorwenge “na vinthu ivyo vilipo.” Kasi tingachita wuli kuti tikhorwenge?
Lekani “kutemwa ndalama.” Ŵanthu ŵakulolera kunanga umoyo wawo, banja lawo, ubwezi na ŵanyawo, nkharo, kweniso mbiri yawo yiwemi chifukwa cha “kutemwa ndalama.” (1 Timote 6:10) Ichi ntchachitima chomene. Paumaliro, munthu uyo wakutemwa usambazi “wakhorwenge . . . yayi.”—Mupharazgi 5:10.
Mutemwenge ŵanthu kuluska vinthu. Mbunenesko kuti vinthu vyakuthupi vingatovwira. Kweni vinthu ivi vingatitemwa yayi panji kutiwonga, ŵanthu ndiwo ŵangachita ivi. Para muli na “mubwezi wanadi” wangamovwirani kuti mukhorwenge.—Zintharika 17:17.
SONO NAPO TINGAŴA ŴAKUKONDWA PARA TIKULONDEZGA ULONGOZGI WA MU BAIBOLO
KUZIZIPIZGA PARA MUKULWARA
Fundo ya mu Baibolo: “Mtima wachimwemwe ni munkhwala uwemi.”—Zintharika 17:22.
Nga umo “munkhwala uwemi” ukovwilira munthu, chimwemwe nacho chingatovwira kuti tizizipizge para tikulwara. Kweni kasi tingaŵa wuli ŵachimwemwe uku tikulwara?
Muwongenge. Usange tikughanaghanira waka za masuzgo agho tikusangana nagho, “mazuŵa ghose” ghawonekenge ghaheni. (Zintharika 15:15) Kweni Baibolo likuti: “Longorani kuti muli ŵakuwonga.” (Ŵakolose 3:15) Muwongenge vinthu viwemi ivyo vikumovwirani pa umoyo, kwali ni vikuru panji vichoko. Vinyake mwa vinthu ivyo vikutovwira kuti umoyo unozgenge ni zuŵa, kamphepo kawemi, kweniso para tikuwona ŵakutemweka ŵithu ŵakumwemwetera.
Muchitirenge viwemi ŵanyinu. Nangauli mukulwara, manyani kuti “uyo wakupeleka wakukondwa chomene kuluska uyo wakupokera.” (Milimo 20:35) Para ŵanyithu ŵakutiwonga pa ivyo taŵachitira, tikukondwa kweniso tikujipulika makora chifukwa tikuluwako dankha vya masuzgo ghithu. Para tikuchitira viwemi ŵanyithu, vikovwira kuti tiŵe ŵakukondwa.
MUKHOZGENGE NTHENGWA YINU
Fundo ya mu Baibolo: “Musande ivyo ni vinthu vyakuzirwa chomene.”—Ŵafilipi 1:10.
Usange ŵanthu ŵakutorana ŵakuchezga chomene yayi ubwezi wawo unganangika. Mfumu na muwoli ŵakwenera kuwona nthengwa yawo kuti ntchimoza mwa vinthu vyakuzirwa chomene.
Muchitirenge lumoza vinthu. M’malo mwakuchita mwekha vinthu ivyo mukutemwa, vingaŵa makora kuŵa na ndondomeko yakuti muchitirenge lumoza vinthu. Baibolo likuti: “Ŵaŵiri ŵakuluska yumoza.” (Mupharazgi 4:9) Mungaphika na kulyera lumoza chakurya, kuchita maseŵera lumoza, kukawona malo panji kuchitira lumoza vinthu vinyake ivyo mukutemwa.
Longorani chitemwa. Baibolo likuchiska ŵakutorana kuti ŵalongoranenge chitemwa kweniso ŵachindikanenge. (Ŵaefeso 5:28, 33) Kumwemweterana, kuvumbatirana mwachitemwa, panji kupasana chawanangwa nanga chingaŵa chichoko vingawovwira kuti nthengwa yikhore. Ŵakutorana ŵakwenera yayi kuchezga nkhani za kugonana na munthu munyake padera pa uyo ŵali kutorana nayo.—Ŵahebere 13:4.