Wuskanimo Maghanoghano Ghalighose Agho Ghangamutondeskani Kumanya Chiuta

1. Kasi mpositole Paulosi wakaŵachenjezga vichi Ŵakhristu ŵakuphakazgika?

“LEKANI kutolera nkharo ya ŵanthu ŵa mu nyengo iyi.” (Rom. 12:2) Paulosi wakalembera mazgu agha Ŵakhristu ŵakwambilira. Chifukwa wuli wakaŵachenjezga ŵanalume na ŵanakazi awo ŵakaŵa ŵakujipeleka kwa Chiuta kweniso ŵakuphakazgika na mzimu utuŵa?—Rom. 1:7.

2-3. Kasi Satana wakuchita wuli kuti watiwuskeko kwa Yehova? Kweni kasi tingachita wuli kuti tiwuskemo maghanoghano ghaheni agho ghakhomelera mu mitima yithu?

² Paulosi wakafipanga mtima chifukwa chakuti Ŵakhristu ŵanyake ŵakatolera maghanoghano gha charu cha Satana. (Efe. 4:17-19) Ivi vingachitikira waliyose wa ise. Satana uyo ni chiuta wa charu ichi, wali na nthowa zakupambanapambana izo wangatiwuskirako kwa Yehova. Mwachiyelezgero, para tikukhumba kuŵa ŵakumanyikwa panji ŵakuzirwa, Satana wanganjilirapo kuti watipatuske kwa Yehova. Kweniso wanganjilira pa vinthu ivyo tili kusambira kukwithu, ku sukulu, na ku ŵanthu awo tikukhala nawo, kuti tambe kughanaghana nga ndiyo.

³ Kasi vingachitika kuwuskamo vinthu ivyo vili kukhomelera “chomene” mu maghanoghano ghithu? (2 Kor. 10:4) Paulosi wakati: “Tikugadabura maghanoghano na chinthu chilichose icho chikutondeska ŵanthu kumanya Chiuta, ndipo tikuthereska maghanoghano gha mtundu uliwose na kughazgora kuti ghapulikire Khristu.” (2 Kor. 10:5) Nadi, Yehova wangatovwira kuwuskamo maghanoghano ghalighose ghaheni agho tingaŵa nagho. Nga umo munkhwala ungawuskiramo poyizoni mu thupi lithu, Mazgu gha Chiuta nagho ghangatovwira kuwuskamo maghanoghano ghaheni ghalighose agho tingaŵa nagho chifukwa cha charu cha Satana.

“MUSINTHE MAGHANOGHANO GHINU”

4. Kasi tikeneranga kusintha vichi tikati tamanya ivyo Baibolo likusambizga?

⁴ Ghanaghanirani vinthu ivyo mukakhumbikwiranga kusintha mukati mwamanya ivyo Baibolo likusambizga, ndipo mukasankha kuteŵetera Yehova. Taŵanandi kuti titeŵetere Yehova, tikeneranga kuleka vinthu viheni. (1 Kor. 6:9-11) Tikumuwonga chomene Yehova kuti wakatovwira kuti tileke kuchita vinthu viheni ivi.

5. Kasi ni vinthu wuli viŵiri ivyo tikwenera kuchita ivyo vili pa Ŵaroma 12:2?

⁵ Ndipouli, tileke kughanaghana kuti tikukhumbikwira kusinthaso yayi. Nangauli tili kuleka kuchita zakwananga zikuru izo tikachitanga pambere tindabatizike, kweni tikwenera kulutilira kugega chilichose icho chingatiwezgera ku milimo yithu yakale. Kasi tingachita wuli? Paulosi wakati: “Lekani kutolera nkharo ya ŵanthu ŵa mu nyengo iyi, kweni musinthe maghanoghano ghinu.” (Rom. 12:2) Ntheura tikwenera kuchita vinthu viŵiri. Chakwamba, tikwenera ‘kuleka kutolera,’ panji kuwumbika na charu ichi. Chachiŵiri, tikwenera ‘kusintha’ maghanoghano ghithu.

6. Kasi tikusambirapo vichi pa lemba la Mateyu 12:43-45?

⁶ Apo Paulosi wakayowoyanga kuti tikwenera kusintha, wakang’anamuranga vinandi padera pa kusintha waka umo tikuwonekera. Wakang’anamuranga kuti tikwenera kusintha wunthu withu wose. (Wonani bokosi lakuti “Kasi Tasintha Nadi?”) Tikwenera kusinthirathu maghanoghano ghithu, uwo ni wunthu withu wamukati na makhumbiro ghithu. Ntheura tose tikwenera kujifumba kuti, ‘Kasi nkhusintha na chilato chakuti ŵanji ŵaniwone panji nkhusintha kuti niŵe Mkhristu nadi?’ Ntchakuzirwa chomene kumanya usange tikusintha zanadi panji yayi. Pa Mateyu 12:43-45, Yesu wakayowoya icho tikwenera kuchita. (Ŵazgani.) Lemba ili likutisambizga fundo yakuzirwa yakuti ntchakukwana yayi kuwuskamo waka maghanoghano ghaheni, kweni tikweneraso kuchitapo kanthu kuti tiŵe na maghanoghano agho Chiuta wakukondwa nagho.

‘MUZGOKE ŴAPHYA MU KAGHANAGHANIRO KINU’

7. Kasi tingachita wuli kuti tisinthe kaghanaghaniro kithu?

⁷ Kasi vingachitika kuti tisinthe kaghanaghaniro kithu panji wunthu withu wamukati? Enya. Mazgu gha Chiuta ghakuti: “Mulutilire kuzgoka ŵaphya mu kaghanaghaniro kinu. Ndipo muvware wunthu uphya uwo ukalengeka mwakuyana na khumbo la Chiuta, mu urunji wenecho na kugomezgeka.” (Efe. 4:23, 24) Ntheura tingasintha kaghanaghaniro kithu. Kweni ntchipusu yayi. Tikwenera kuchita vinandi padera pa kukanizga makhumbiro ghaheni na kuleka kuchita viheni. Tikwenera kusintha ‘kaghanaghaniro kithu.’ Ichi chikung’anamura kuti tisinthe nkharo yithu, makhumbiro ghithu, na kugega ivyo vikupangiska kuti tichite viheni. Kweni kuti ivi vichitike, tikwenera kulutilira kuchitapo kanthu.

8-9. Kasi ivyo vikachitikira mubali munyake vikulongora wuli kuti ntchakukhumbikwa kusintha wunthu withu wamukati?

⁸ Tiyeni tiwone chiyelezgero cha mubali munyake uyo pakwamba wakaŵa wambembe. Wakati waleka kumwa moŵa na mbembe wakabatizika, ndipo ichi chikapeleka ukaboni uwemi mu chigaŵa icho wakakhalanga. Kweni zuŵa linyake, pakati pajumpha nyengo yichoko waka kufuma apo wakabatizikira, mubali uyu wakayezgeka. Panyumba ya mubali uyu, pakiza munthu uyo wakaloŵera ndipo wakatenge mubali uyu wangamutimba yayi. Pakwamba mubali uyu wakajikora. Kweni munthu uyu wati wayowoya vinthu vyakubinkhiska zina la Yehova, mubali withu wakatondeka kujikora. Wakafuma mu nyumba na kumutimba munthu uyu. Kasi suzgo likaŵa vichi? Nangauli Baibolo likamovwira kuti waleke nkharo yake yiheni, kweni wakasintha yayi kaghanaghaniro kake. Tingayowoyaso kuti wakasintha yayi wunthu wake wamukati.

⁹ Kweni mubali uyu wakawelera nyuma yayi. (Zinth. 24:16) Ŵalara ŵakamovwira, ndipo wakalutilira kusintha nkharo yake. Nyengo yikati yajumphapo wakaŵa mulara. Mise yinyake pa Nyumba ya Ufumu, wakakumanaso na chiyezgo chakuyana na icho wakakumana nacho pakwamba. Munthu uyo wakaloŵera wakakhumbanga kutimba mubali munyake mulara. Kasi mubali withu uyu wakachita wuli? Wakajiyuyura, wakayowoya nayo mwakuzikira munthu muloŵevu uyu na kumovwira kuti wakhizge mtima pasi, ndipo pamanyuma wakamupelekezga munthu uyu m’paka kunyumba kwake. Chifukwa wuli mubali withu pa nyengo iyi wakachita nthena? Chifukwa ntchakuti wakaŵa kuti wasintha nadi. Wakaŵa wamtende na wakujiyuyura. Ichi chikapangiska kuti Yehova walumbike.

10. Kasi tikwenera kuchita vichi kuti tisinthe wunthu withu wamukati?

¹⁰ Tingasintha zuŵa limoza pera yayi, panji mwamabuchi waka. Tikwenera ‘kufwiliranipo chomene’ kwa vyaka vinandi. (2 Pet. 1:5) Tisinthenge chifukwa cha kuteŵetera Yehova nyengo yitali yayi. Tikwenera kuyezgayezga chomene kuti tisinthe wunthu withu wamukati. Pali vinthu vinandi ivyo vingatovwira kuti tisinthe. Tiyeni tiwonepo vinyake mwa vinthu ivi.

KASI TINGACHITA WULI KUTI TISINTHE KAGHANAGHANIRO KITHU?

11. Kasi lurombo lukutovwira wuli kuti tisinthe kaghanaghaniro kithu?

¹¹ Chinthu chakwamba icho chingatovwira ni lurombo. Tikwenera kulomba nga umo wakachitira wamasalimo. Wakati: “Mwe Chiuta, lengani mwa ine mtima wakutowa, na kuŵika mwa ine mzimu uphya, wakukhazikika.” (Sal. 51:10) Tikwenera kuzomerezga kuti tikukhumbikwira kusintha kaghanaghaniro kithu, ndipo timulombe Yehova kuti watovwire. Chifukwa wuli tingagomezga kuti Yehova watovwirenge kuti tisinthe? Tikukhozgeka na layizgo ilo Yehova wakaphalira Ŵaisrayeli ŵanonono mtima mu nyengo ya Ezekiyeli. Wakati: “Niŵapenge mtima umoza na kuŵikamo mzimu uphya mukati mwawo . . . na kuŵapa mtima wa nyama, [ndiko kuti, uwo ukupulikira fundo za Chiuta].” (Ezek. 11:19) Yehova wakaŵa wakunozgeka kovwira Ŵaisrayeli aŵa kuti ŵasinthe, ndipo nase ngwakunozgeka kutovwira.

12-13. (a) Kuyana na Salimo 119:59, kasi tikwenera kughanaghanirapo vichi? (b) Kasi ni mafumbo wuli agho tikwenera kujifumba?

¹² Chinthu chachiŵiri icho chingatovwira nkhughanaghanirapo. Para tikuŵazga Mazgu gha Chiuta zuŵa lililose, tikwenera kughanaghanirapo chomene pa ivyo taŵazga mwakuti timanye ivyo tikwenera kusintha. (Ŵazgani Salimo 119:59; Heb. 4:12; Yak. 1:25) Tikwenera kujisanda na kuwona usange maghanoghano ghithu ghanangika na vinjeru vya charu. Tikwenera kuzomerezga kuti tili na suzgo ndipo tiyezgeyezge kulimazga suzgo ilo.

¹³ Mwachiyelezgero, jifumbani kuti: ‘Kasi namba kuŵa na sanji?’ (1 Pet. 2:1) ‘Kasi namba kujinotha chifukwa cha uko nkhufumira, masambiro, panji ndalama?’ (Zinth. 16:5) ‘Kasi ŵanthu awo mbafuko linyake panji awo mbakavu nkhuŵawona kuti mbapasi?’ (Yak. 2:2-4) ‘Kasi nkhukopeka na ivyo charu cha Satana chikupeleka?’ (1 Yoh. 2:15-17) ‘Kasi nkhutemwa kuwonelera vyakusanguluska ivyo muli vinthu vya uzaghali na nkhaza?’ (Sal. 97:10; 101:3; Am. 5:15) Mazgoro gha mafumbo agha ghangamovwirani kumanya ivyo mukwenera kusintha. Para tisinthenge maghanoghano ghakukhomelera mu mitima yithu, tikondweskenge Adada ŵithu ŵakuchanya.—Sal. 19:14.

14. Chifukwa wuli ntchakuzirwa kuŵa na ŵabwezi ŵawemi?

¹⁴ Chinthu chachitatu icho chingatovwira nkhusankha ŵabwezi ŵawemi. Kwali tikumanya panji yayi, kanandi tikutolera nkharo ya ŵanthu awo tikuchezga nawo. (Zinth. 13:20) Para tili ku ntchito panji ku sukulu, tikuŵa na ŵanthu awo ŵangatovwira yayi kuti tiŵe na maghanoghano agho ghakukolerana na Chiuta. Ndipouli, tingasanga ŵabwezi ŵawemi ku mpingo. Ŵabwezi aŵa ndiwo ŵangatovwira kuti ‘titemwenge na kuchita milimo yiwemi.’—Heb. 10:24, 25.

‘KHAZIKIKANI MU CHIPULIKANO’

15-16. Kasi Satana wakuchita wuli kuti wasinthe kaghanaghaniro kithu?

¹⁵ Kweni kumbukani kuti Satana waŵikapo mtima kuti wasinthe kaghanaghaniro kithu. Wakugwiliskira ntchito visambizgo vyakupambanapambana kuti wanange maghanoghano ghithu ghawemi agho ghakukolerana na unenesko wa mu Mazgu gha Chiuta.

¹⁶ Satana wakulutilira kufumba fumbo lakuyana waka na ilo wakafumba Eva mu munda wa Edeni kuti: “Kasi mbunenesko kuti Chiuta wati . . . ?” (Gen. 3:1) Mu charu cha kuwusika na Satana ichi, kanandi tikupulika mafumbo agho ghangatipangiska kuti tambe kukayikira ivyo tikugomezga, nga ghakuti: ‘Kasi mbunenesko kuti Chiuta wakukana nthengwa za ŵanalume panji ŵanakazi ŵekhaŵekha? Kasi mbunenesko kuti Chiuta wakukana kukondwelera Khisimasi na mazuŵa ghakubabikira? Kasi mbunenesko kuti Chiuta winu wakumukanizgani kupokera ndopa? Kasi mbunenesko kuti Chiuta wachitemwa wakumukanizgani kuchezga na ŵabali ŵinu ŵakusezgeka?’

17. Kasi tikwenera kuchitachi usange munyake watifumba mafumbo agho ghangatipangiska kuti tambe kukayikira ivyo tikugomezga? Ndipo kuyana na Ŵakolose 2:6, 7, kasi paŵenge uwemi wuli para tichitenge nthena?

¹⁷ Tikwenera kukhorwa kuti vinthu ivyo tikugomezga ni vyaunenesko. Usange tikughasanga yayi mazgoro gha mafumbo ghanyake ghakuzirwa ghakukhwaskana na ivyo tikugomezga, tingamba kukayikira ivyo tikugomezga. Para tamba kukayikira, maghanoghano ghithu ghanganangika, ndipo chipulikano chithu chingabwangasuka. Ipo kasi tikwenera kuchita vichi? Mazgu gha Chiuta ghakutiphalira kuti tilutilire kusintha kaghanaghaniro kithu, mwakuti timanye “khumbo la Chiuta, ilo ndiwemi, lakuzomerezgeka na lakufikapo.” (Rom. 12:2) Para tikusambira nyengo zose, tikhorwenge kuti ivyo tili kusambira mu Baibolo ni vyaunenesko. Ndipo tigomezgenge kuti fundo za Yehova ni zakunyoloka. Ntheura, nga ni khuni ilo lajintha misisi pasi, nase tijinthenge misisi na “kukhazikika mu chipulikano.”—Ŵazgani Ŵakolose 2:6, 7.

18. Kasi ni vichi ivyo vingatovwira kujivikilira ku vinthu viheni vya charu cha Satana?

¹⁸ Ni mulimo winu kukhozga chipulikano chinu. Ntheura lutilirani kuzgoka ŵaphya mu kaghanaghaniro kinu. Mulombenge nyengo zose, muŵeyelerani Yehova kuti wamovwirani na mzimu utuŵa. Mughanaghanirengepo chomene ivyo mukuŵazga. Lutilirani kusanda kaghanaghaniro kinu. Sankhani ŵabwezi ŵawemi awo ŵamovwiraninge kuti musinthe kaghanaghaniro kinu. Para muchitenge nthena, muwuskengemo maghanoghano ghaheni na kujivikilira ku vinthu viheni vya charu cha Satana ichi. Kweniso mugadaburenge “maghanoghano na chinthu chilichose icho chikutondeska ŵanthu kumanya Chiuta.”—2 Kor. 10:5.