Rongorani Mtima wa Kristu
“Ciuta [uyo wakupereka, NW] cizizipizgo na cisangulusko wamupani kuti muyanenge mu mtima kwakulingana na bambiro la Kristu Yesu.”—ŴAROMA 15:5.
1. Kasi ndi mwauli umo umoyo wa muntu wungakhwaskikira na maghanaghano ghake?
MAGHANOGHANO ghakupereka mpambano yikuru comene mu umoyo. Maghanoghano gha mphwayi panji gha kulimbikira ncito, maghanoghano ghaweme panji ghaheni, maghanoghano gha mbembe panji gha mtende, mtima wakusinginika panji wakuwongera, wungaŵa na nkongono yikuru comene ya umo muntu wangacitira na mikhaliro yakupambana-pambana ndiposo mweneumo ŵanji ŵangacitira naye. Para yunji wangaŵa na maghanoghano ghaweme, muntu wanteura uyo wangaŵa wakukondwa nangauli wangaŵa mu ukhaliro wakusuzga. Kwa muntu uyo wali na maghanoghano ghaheni, palije ico cikuwoneka kuŵa ciweme—kwali vintu viŵe viweme—kwa iye umoyo ukuŵa uheni ndipera.
2. Ndi mwauli umo muntu wakusambilira nkaro?
2 Nkaro yiweme panji yiheni yingasambirika. Fundo njakuti, iyo yikucita kusambirika. Pakuyowoya za bonda, Coller’s Encyclopedia yikuphara kuti: “Nkaro iyo iye wakuzakaŵa nayo kuntazi wakwenera kuyisambira na kuyisunga, kuyana na umo iye wakusambilira panji wakumanyira ciyowoyero cipya panji luso linyake lirilose.” Kasi ndi mwauli umo tikusambilira kuŵa na nkaro? Nangauli pangaŵa vintu vinandi ivyo vikucitiska, kweni malo na mendezgano na ŵanji ndivyo vikupangiska comene. Enisayikulopidiya iyo yazunulika pakwambilira apo yikuphara kuti: “Tikusambira panji tikuŵa nayo nkaro ya awo tikukhala nawo pafupi mwapacokopacoko.” Virimika vinandi ivyo vyajumpa, Baibolo likayowoya mwakuyana waka kuti: “Uyo wakwenda na ŵavinjeru naye tiwaŵe wavinjeru, kweni murongozgani wa vindere tiwapwetekekenge.”—Zintharika 13:20; 1 Ŵakorinte 15:33.
Ciyerezgero ca Mtima Uweme
3. Kasi ndi njani uyo wakaŵa na ciyerezgero ciweme cakukhwaskana na nkaro yake, ndipo ndi mwauli umo tingamurondezgera iye?
3 Kuruska cilicose, Yesu Kristu wakapereka ciyerezgero ciweme ca kuŵa na nkaro yiweme. Iye wakayowoya kuti: “Ndamupani bambiro, lakuti namweso mucitenge nga ndi umo ine ndamucitirani.” (Yohane 13:15) Kuti tiŵe nga ndi Yesu, cakudanga tikwenera kusambira za iye.a Tikusambira za umoyo wa Yesu na cakulata ca kucita ico mpostole Petros wakazomerezga: “Mukacemekera ceneici: pakuti Kristu nayo wakakomwera imwe, na kumusidirani bambiro, mwakuti murondezge marwayo ghake.” (1 Petros 2:21) Cakulata cithu ncakuti tiyezgeyezge kuti tiyane na Yesu. Ici cikusazgapo kuŵa na mtima wakuyana na wake.
4, 5. Kasi ndi mtundu wuli wa mtima wa Yesu uwo wakonkoskeka pa Ŵaroma 15:1-3, ndipo ndi mwauli umo Ŵakristu ŵangamurondezgera iye?
4 Kasi ncici ico cikusazgikamo kuti yunji waŵe na mtima wa Kristu Yesu? Cipaturo 15 ca kalata ya Paulos ya ku Ŵaroma cikutovwira kuti tizgore fumbo ili. Mu mavesi ghacoko waka ghakwambilira gha cipaturo ici, Paulos wakuyowoya za ukhaliro wapadera wa Yesu peneapo iye wakuyowoya kuti: “Kweni ise ta ŵa nkongono tikwenera kuyegha matempento gha ŵambura nkongono, na kureka kujikondweska. Muntu yose wa ise wakondweskenge munyake na ico nciweme, mwakuti wamukhozgenge. Cifukwa Kristu nayo kuti wakajikondweska cara; kweni nga ndi umo kuli kulembekera, ‘Ntombozgo za aŵo ŵakakutombozganga iwe zikawira pa Ine.’”—Ŵaroma 15:1-3.
5 Kuti ŵarondezge mtima wa Yesu, Ŵakristu ŵakukhuŵirizgika kuti ŵaŵe ŵakunozgekera kuteŵetera ŵanji mwakujiyuyura mu malo mwakuti ŵajikondweske iwoŵene. Inya nadi, kunwekera kwa kujiyuyura kwanteura uko kwa kuteŵetera ŵanji ncirongolero ca awo ‘mba nkongono.’ Yesu, uyo wakaŵa wankongono comene kumzimu kuruska muntu waliyose uyo wakaŵako, wakajiyowoya iyemwene kuti: “Mwana wa muntu wakawura kwizira kuteŵetereka, kweni kuteŵetera, na kupereka umoyo wake thumba la kuwombola ŵanandi.” (Mateyu 20:28) Nga Mbakristu, ise nase tikwenera kuyezgayezga kuwovwira ŵanji, kusazgapo “ŵambura nkongono.”
6. Kasi ndi mwa ntowa wuli iyo tingarondezgera Yesu umo wakacitira na suskano na ntombozgo?
6 Ukhaliro wunyake uwo Yesu wakarongora wukaŵa wa kaghanaghaniro kaweme ndiposo kacitiro kaweme ka vintu. Iye wakazomerezga cara kuti kaghanaghaniro kaheni ka ŵanji katimbanizge kaghanaghaniro kake kaweme pakuteŵetera Ciuta; ise nase tilekerethu. Peneapo wakanenekanga na kuzikizgika cifukwa ca kusopa Ciuta mwamagomezgeko, Yesu wakazizipizga mwakujiyuyura mwambura kusinginika. Iye wakamanya kuti suskano lakufumira ku ŵantu ŵambura cipulikano ndiposo ku caru cambura kupulikiska makora vintu, kukwenera kuŵa pa wose awo ŵakuyezgayezga kukondweska mzengezgani wawo ‘na ico nciweme, mwakuti ŵamukhozge.’
7. Ndi mwauli umo Yesu wakarongorera kuzika, ndipo ncifukwa wuli ise nase tikwenera kucita nteura?
7 Yesu wakalongora kaghanaghaniro kaweme mu ntowa zinyakeso. Iye kuti wakakwiyirapo Yehova cara, kweni mu malo mwake, mwakuzikira wakarindizga kuti vyose ivyo Yehova wakakhumbanga vikenera kuti vicitike. (Salmo 110:1; Mateyu 24:36; Milimo 2:32-36; Ŵahebere 10:12, 13) Mwakusazgirapo, Yesu kuti wakakwiyirapo ŵarondezgi ŵake cara. Iye wakaŵaphalira kuti: “Musambire kwa ine”; cifukwa cakuti wakaŵa “wakuzika,” ndipo unjirikizgi wake wukaŵa wakukhozga na wakupereka mupumulo. Ndiposo cifukwa cakuti wakaŵa “wakujipepura mu mtima,” iye kuti wakayowoyanga mwakujitukumura cara. (Mateyu 11:29) Paulos wakutikhuŵirizga kuti tirondezge mtima wa Yesu, iye wakuti: “Muŵenge na mtima uwu, weneuwo ukaŵaso mwa Kristu Yesu: mweneuyo pakuŵa mu kaŵiro ka Ciuta kuti wakapima cara kuti kulingana na Ciuta nkantu kakuti kakwapulike, kweni wakavura ucindami wake, wakajitorera kaŵiro ka muzga, wakaŵa na cikozgo ca ŵantu.”—Ŵafilipi 2:5-7.
8, 9. (a) Ncifukwa wuli tikwenera kuyezgayezga kuti tikuliske ukhaliro wambura uzukusi? (b) Ncifukwa wuli tikwenera kuleka kukhuŵara usange tatondeka kurondezga ciyerezgero ico Yesu wakapereka, ndipo ndi mwauli umo Paulos waliri ciyerezgero ciweme pa nkani iyi?
8 Ncipusu kuyowoya kuti tikukhumba kuteŵetera ŵanji ndiposo kuti tikukhumba kuŵika vyakukhumba vyawo pantazi pa vithu. Kweni para tingajisanda mwaunenesko mtima, kaghanaghaniro kithu kangavumbura kuti mitima yithu njambura kunozgekera kucita mwanteura. Cifukwa wuli? Cakudanga, cili cifukwa cakuti tili kuhara ukhaliro uheni kufuma kwa Adamu na Heva; caciŵiri, cili cifukwa cakuti tikukhala mu caru ico cikutemwa uzukusi. (Ŵaefeso 4:17, 18) Kuti tikuriske ukhaliro wambura uzukusi, tikwenera kukuliska kaghanaghaniro ako nkakupambana na ukhaliro withu uwo tikubabika nawo wambura ukongorekwa. Ici cikukhumbikwira kuŵikapo mtima ndiposo kuyezgayezga.
9 Cifukwa cakuti ndise ŵambura ukongorekwa, cikuŵa cakusuzga comene kuti tirondezge ciyerezgero cakufikapo ca Yesu, ndipo ici nyengo zinyake cikupereka cikhuŵazgo kwa ise. Tingayamba kukayikira kuti ncambura macitiko kuti tiŵe na mtima wakuyana na uwo Yesu wakaŵa nawo. Kweni awonani mazgu gha cikhuŵirizgo agha gha Paulos: “Nkujimanya kuti mwa ine (nkunena thupi lane) mukukhala kantu kaweme cara; pakuti khumbo lakucitira uweme liri nane, kweni nkongono ndizo cara. Cifukwa uweme uwo nkukhumba, kuti nkuwucita cara; kweni uheni uwo ndirive kukhumba, ndiwo nkucita. Cifukwa mu wuntu wa mukati nkukondwa na Marango gha Ciuta; kweni nkuwona dango linyake mu viŵaro vyane ilo likurwa na dango la vinjeru vyane, ndipo likundizgora wa mikoli wa dango la kwananga ilo liri mu viŵaro vyane.” (Ŵaroma 7:18, 19, 22, 23) Mwaunenesko, kuwura ukongorekwa kwa Paulos kukamutondeskanga mwakuwerezgawerezga kuti wacite khumbo la Ciuta nga ndi umo iye wakakhumbiranga, kweni kaghanaghaniro kake—umo iye wakaghanaghaniranga pakuyowoya za Yehova na dango Lake—kakaŵa kakupereka ciyerezgero ciweme. Nase kithu kangaŵa kanteura aka.
Kusinta Maghanoghano Ghaheni
10. Kasi nkaghanaghaniro wuli ako Paulos wakakhuŵirizga Ŵafilipi kuti ŵakuliske?
10 Kasi ncamacitiko kuti ŵanji ŵakukhumbikwira kusinta maghanaghano ghaheni? Inya. Umu ndimo vikaŵira na Ŵakristu ŵanji ŵa mu virimika vya handiredi lakudanga. Mu kalata yake iyo wakalembera Ŵafilipi, Paulos wakayowoya za kuŵa na kaghanaghaniro kaweme. Iye wakalemba kuti: “Kuti nkunena cara kuti sono ndapokera, [umoyo wakucanya kwizira mu ciwuka cakudanga] panji nesi ndafiskika: kweni nkukoserezga, usange ndipo ndingacikora ceneico naco Kristu Yesu wakandikorera. Mwa ŵabali, ine kuti ndacikora sono cara: kweni cintu cimoza ndico nkucita, nkuruwa ivyo viri kumanyuma, ndipo nkutambazukira ku ivyo viri kuntazi, Nkucimbirira ku ciciri ku njombe ya ncemo yakucanya ya Ciuta mwa Kristu Yesu. Nteura ise, ta ŵeneise tiri ŵakufikapo, tighanaghanenge vyeneivi.”—Ŵafilipi 3:12-15.
11, 12. Kasi ndi mwa ntowa wuli izo Yehova wakutivumbulira kaghanaghaniro kaweme?
11 Mazgu gha Paulos ghakulongora kuti waliyose uyo wazgoka Mkristu, usange wakureka kuruta pantazi, mbwenu wali na kaghanaghaniro kaheni. Iye mbwenu watondeka kuŵa na mtima wa Kristu. (Ŵahebere 4:11; 2 Petros 1:10; 3:14) Kasi ndiko kuti ukhaliro wa muntu wanteura uyo ngwambura cilindizga? Cara nadi. Ciuta wangatovwira kuti tisinte kaghanaghaniro kithu usange tikukhumbisiska nadi kuti tisinte. Paulos wakulutirizga kuyowoya kuti: “Usange mu kantu kanji mukughanaghana vinyake, navyo Ciuta wati wamuvumbuliraninge.”—Ŵafilipi 3:15.
12 Ndipouli, usange tikukhumba kuti Yehova wativumbulire kaghanaghaniro kaweme, tikwenera kucitapo kantu ku cigaŵa cithu. Mwapempero kuŵazga Mazgu gha Ciuta, mwakovwirika na vyakupharazga vya Cikristu ivyo vikuperekeka na “muzga wa magomezgeko na wa vinjeru” vipangiskenge awo ‘ŵakughanaghana vinyake’ kuti ŵawovwirike kuŵa na kaghanaghaniro kaweme. (Mateyu 24:45) Ŵarara ŵa Cikristu, awo ŵali kusankika na mzimu mutuŵa kuti ‘ŵaliske ekleziya la Ciuta,’ ŵazamuŵa ŵakukondwa kuti ŵamovwirani. (Milimo 20:28) Mwee, nako nkuwongera uko tiri nako kwa Yehova kumanya kuti wakughanaghanira kuwura ukongorekwa kwithu ndiposo kuti mwacitemwa wakupereka covwiro! Tiyeni ticizomerezge ico.
Kusambira Kufuma ku Ŵanji
13. Ndi sambiro wuli ilo tikutorapo pakuyowoya za kaghanaghaniro kaweme mu nkani ya mu Baibolo ya Job?
13 Mu Ŵaroma cipaturo 15, Paulos wakulongora kuti, mwa kulanguruka mu viyerezgero vya mwaka, ivyo vingatovwira kuti tisinte kaghanaghaniro kithu. Iye wakulemba kuti: “Ivyo vyose vikalembeka kale, vikalembekera kusambizgika kwitu, mwakuti tiŵirenge na cigomezgo mu cizizipizgo na cisangulusko ivyo viri mu Malembo.” (Ŵaroma 15:4) Ŵanji mwa ŵateŵeti ŵamagomezgeko ŵa Yehova ŵa mu nyengo yamwaka ŵakakhumbikwiranga kusinta vigaŵa vinyake vya kaghanaghaniro kawo. Mwaciyerezgero, Job wakaŵa na kaghanaghaniro kaweme. Iye kuti wakayowoyerapo Yehova musinjiro cara, nesi kutaya cigomezgo cake mwa Ciuta cifukwa ca kusuzgika. (Job 1:8, 21, 22) Kweni ndipera, iye wakatemwa kujikhungurufya. Yehova wakatuma Elihu kuti wamovwire Job kuti wasinte kaghanaghaniro kake. Mu malo mwa kukwiya, mwakujicefya Job wakazomerezga kuti wasinte kaghanaghaniro kake ndipo mwaluŵiro nadi wakayamba kusinta.—Job 42:1-6.
14. Ndi mwauli umo tingayanirana na Job usange tapika unjirikizgi wa kaghanaghaniro kithu
14 Kasi naseso tingacita nga ndi umo Job wakacitira usange Mkristu munyithu mwacitemwa watiphalira kuti tayamba kuŵa na kaghanaghaniro kaheni? Nga ndi umo wakacitira Job, mpanyi naseso taleka “kumuyowoyera musinjiro Ciuta.” (Job 1:22) Usange tikusuzgika, mpanyi talekerathu kusinginika panji kuyowoya kuti Yehova ndiye wakucitiska masuzgo agho tikukumana nagho. Mpanyi talekerathu kujikhungurufya ise taŵene, tikwenera kukumbukira kuti mulimose umo mwaŵi withu wungaŵira mu uteŵeti wa Yehova, ise ndise “ŵazga ŵambura candulo.”—Luka 17:10.
15. (a) Kasi nkaghanaghaniro wuli kaheni ako ŵakaŵa nako ŵanji ŵa ŵarondezgi ŵa Yesu? (b) Ndi mwauli umo Petros wakarongorera kaghanaghaniro kaweme?
15 Mu handiredi lakudanga, ŵanji mwa ŵantu awo ŵakategherezga kwa Yesu ŵakalongora kaghanaghaniro kaheni. Panyengo yinyake, Yesu wakayowoya cintu cinyake ico cikaŵa cakusuzga kucipulikiska. Pakuzgora, “ŵasambiri ŵake ŵanandi, para ŵakapulika vyeneivi, ŵakati, ‘mazgu agha nganonono; ndi njani wamanya kughapulika?’” Ici cikulongora pakweru kuti awo ŵakayowoya mazgu agha ŵakaŵa na kaghanaghaniro kaheni. Ndipo cifukwa ca kaghanaghaniro kawo kaheni, iwo ŵakaleka kutegherezga kwa Yesu. Cakulembeka ico cikuphara kuti: “Penepapo ŵasambiri ŵake ŵanandi ŵakawerera ku manyuma, ndipo kuti ŵakenderanangaso nayo cara.” Kasi wose ŵakaŵa na kaghanaghaniro kaheni? Cara. Cakulembeka ici cikulutirizga kuphara kuti: “Nteura Yesu wakanena na khumi-na-ŵaŵiri, ‘imwe namwe kasi mukukhumba kuruta?’ Simone Petros wakamuzgora, ‘Fumu, tirute tiye kwa njani?’” Panyuma pake Petros wakazgora yekha fumbo lake: “Ndimwe muli nagho mazgu gha umoyo wa muyirayira.” (Yohane 6:60, 66-68) Mwee, nawo mbuweme wa kaghanaghaniro aka! Para tasanga kuti malongosolero gha mazgu ghanji panji para paŵa kusinta kwa kapulikiskiro ka Malemba, ndipo usange cingaŵa cakusuzga kuti tivilondezge panyengo yakwamba, kasi cingaŵa ciweme cara kuti tilongore kaghanaghaniro ako Petros wakalongora? Mwee, nawo mbucindere umo ungaŵira usange tingaleka kuteŵetera Yehova panji usange tingayowoya mwakususkana na “cirongorero ca mazgu gheneco” cekha cifukwa cakuti vintu vinyake vikusuzga kuvipulikiska!—2 Timote 1:13.
16. Kasi nkaghanaghaniro wuli kaheni ako kakalongoreka na ŵarongozgi ŵa cisopo ca Ciyuda ŵa mu nyengo ya Yesu?
16 Ŵarongozgi ŵa cisopo ca Ciyuda ŵa mu handiredi lakudanga ŵakatondeka kurongora mtima uwo Yesu wakaŵa nawo. Kusimikizga kwawo kukuru kwakuti ŵaleke kutegherezga kwa Yesu kukalongoreka peneapo Lazaro wakawuskika ku ŵakufwa. Kwa muntu uyo wali na kaghanaghaniro kaweme, camuntondwe ico Yesu wakacita cikaŵa cirongorero cikuru cakuti iye wakatumika na Ciuta. Ndipouli, tikuŵazga kuti: “Nteura Ŵasofi Ŵarara na Ŵafarisi ŵakawunjiska ŵa Mphara, ndipo ŵakati, ‘Kasi tikucitaci? pakuti muntu uyu wakucita vimanyikwiro vinandi. Usange tikumureka waka nteura, ŵantu ŵose ŵati ŵapulikane nayo: ndipo Ŵaroma ŵati ŵizenge na kupoka malo ghithu na mtundu witu wuwo.’” Kasi iwo ŵakacita vici? “Kufuma ku zuŵa ilo ŵakapanganirana kumukoma.” Kusazgirapo pakukhumba kukoma Yesu, iwo ŵakakanirathu ukaboni wakuwoneka na maso wakuti iye wakaŵa wakucita vyamintondwe. “Kweni Ŵasofi Ŵarara ŵakapangana kuti Lazaro nayo ŵamukome.” (Yohane 11:47, 48, 53; 12:9-11) Mwee, nawo mbuheni umo cingaŵira usange tingalongora kaghanaghaniro kanteura ako na kukhwizuka panji kukhuŵara na vintu ivyo teneranga kusangwa navyo! Inya, ncakofya comene!
Kurondezga Kaghanaghaniro Kaweme ka Yesu
17. (a) Kasi ndi mu ukhaliro wuli uwo Daniel wakarongorera kaghanaghaniro kambura wofi? (b) Ndi mwauli umo Yesu wakajilongorera kuti ngwacikanga?
17 Ŵateŵeti ŵa Yehova ŵakusungilira kaghanaghaniro kaweme. Peneapo ŵarwani ŵa Daniel ŵakamwendera mpiska kuti pakhazikiskike dango lakukanizga kuromba kwa ciuta panji kwa muntu waliyose mu mazuŵa makhumi ghatatu, Daniel wakamanya kuti ici cikajandizga ubwezi wake na Yehova Ciuta. Kasi iye wakaleka kuromba kwa Ciuta mu mazuŵa makhumi ghatatu agho? Cara, iye mwambura wofi wakalutirizga kuromba kwa Yehova katatu pa zuŵa, nga ndi umo wakazgoŵelera. (Daniel 6:6-17) Yesu mwanteura pera nayeso wakakana kuti wacite wofi na ŵarwani ŵake. Pa zuŵa linyake la Sabata, iye wakakumana na muntu yunji uyo wakaŵa na woko lakuphapa. Yesu wakamanya kuti Ŵayuda ŵanandi awo ŵakaŵapo panyengo iyo ŵakwiyenge usange iye wangacizga muntu pa zuŵa la Sabata. Iye wakaŵafumba fumbo lakuti ŵaphare maghanoghano ghawo pankani iyo. Peneapo iwo ŵakakana kuzgora, Yesu wakacitapo kantu mwa kumucizga muntu uyo. (Marko 3:1-6) Yesu kuti wakawelera nyuma cara kuti wakwaniriske ncito yake iyo wakayiwona kuti njakwenelera.
18. Ncifukwa wuli ŵanji ŵakutisuska, kweni ndi mwauli umo ise tikwenera kucitira na kaghanaghaniro kawo kaheni?
18 Ŵakaboni ŵa Yehova mazuŵa ghano ŵakumanya kuti nawoso ŵakwenera kucita wofi cara cifukwa ca nkanyulira za awo ŵakususka. Cifukwa para ŵangacita wofi, mbwenu ndiko kuti ŵakulongora cara mtima wa Yesu. Ŵantu ŵanandi ŵakususka Ŵakaboni ŵa Yehova, ŵanji ŵakucita mwanteura cifukwa cakuti ŵalije cimanyisko cakufikapo ndiposo ŵanji cili cifukwa cakuti ŵakutinka Ŵakaboni panji uthenga wawo. Kweni ise tingayezganga cara kuti kaghanaghaniro kawo kaheni katimbanizge kaghanaghaniro kithu kaweme. Tingazomerezganga cara kuti ŵanji ndiwo ŵatinjirikizge ntowa yithu ya kasopero.
19. Kasi ndi mwauli umo tingalongorera mtima wakuyana na wa Yesu Kristu?
19 Yesu mwa nyengo zose wakalongora mtima uweme kurazga ku ŵarondezgi ŵake ndiposo kurazga ku manozgero gha Ciuta, ndipouli, cikaŵa cakusuzga kucita nteura. (Mateyu 23:2, 3) Tikwenera kurondezga ciyerezgero cake. Mwaunenesko, ŵabali ŵithu mbambura ukongorekwa, ndiposo ise nase tili nteura pera. Kasi ndi nkuni uko tingasanga mabwezi ghaweme ndiposo ghakugomezgeka kuruska mu ubali withu wa pacaru cose? Yehova wandamalirethu kutipa cimanyisko cose ca Mazgu ghake ghakulembeka, kweni kasi ndi gulu ndini la cisopo ilo likumanya vinandi? Tiyeni nyengo zose tilongore mtima uweme, mtima uwo Yesu Kristu wakaŵa nawo. Kulwande linyake ici cikusazgapo kumanya umo tingamulindizgira Yehova, nga ndi umo tidumbiskiranenge mu nkani yithu yakurondezgapo.
[Mazgu ghamusi]
a Buku la Munthu Wamkulu Woposa Onse Amene Anakhalako, lakupharazgika na Watchtower Bible and Tract Society of New York, Inc., likulongosora za umoyo na uteŵeti wa Yesu.
Kasi Mungalongosora?
• Kasi ndi mwauli umo maumoyo ghithu ghakukhwaskikira na maghanoghano ghithu?
• Konkoskani mtima wa Yesu Kristu.
• Kasi tingasambiraci pa kaghanaghaniro ka Job?
• Kasi nkaghanaghaniro wuli kaweme ako tikwenera kuŵa nako panyengo ya suskano?
[Vithuzithuzi pa peji 18]
Mkristu uyo wali na mtima uweme wakuyezgayezga kovwira ŵanji
[Cithuzithuzi pa peji 20]
Kuŵazga Mazgu gha Ciuta mwapempero kukutovwira kuti tiŵe na mtima wa Kristu