Ungano wa Dera Uwo Uzamutovwira Kuti Tivikilire Umoyo Withu Wauzimu
1. Ni nthowa wuli yimoza iyo Yehova wakutovwilira kuti tikwaniske mulimo withu wa kupharazga makani ghawemi?
1 Yehova wakutilongozga, kutisambizga, na kutikhozga mwakuti tikwaniske mulimo uwo watipa wa kupharazga makani ghawemi gha Ufumu. (Mat. 24:14; 2 Tim. 4:17) Ungano wa dera uwo tikuŵa nawo cilimika cilicose ni nthowa yimoza iyo wakutilongozgera, kutisambizga, na kutikhozga. Ungano wa dera wa cilimika ca uteŵeti ca 2010 uli na mutu wakuti “Vikilirani Umoyo Winu Wauzimu.” Mutu uwu wajintha pa fundo za pa Ŵaroma 8:5 na Yuda 17-19. Ungano uwu uzamwamba mu sabata ya Epulero 12, 2010.
2. (a) Kasi ungano wa dera uzamutovwira wuli? (b) Kasi maungano gha dera ghakumasinda ghali kumovwiranipo wuli kuti mucitenge makora uteŵeti winu?
2 Umo Tizamovwilikira: Ungano uwu uzamuticenjezga za vinthu ivyo vingatipweteka mwauzimu. Uzamutovwira kuti timanye vinthu ivyo vingatilyera nyengo, kweniso ivyo vingatitimbanizga kuti tileke kughanaghanira vinthu ivyo ni vyakuzirwa nadi. Tizamusambira umo tingacitira na vinthu ivyo vikuwoneka nga ni viwemi waka kweni vingananga umoyo withu wauzimu. Tizamusambiraso umo munthu wauzimu wakuŵira nadi. Nkhani yakulekerana iyo yizamuyowoyeka pa Sabata yizamulongora ivyo mbumba kweniso waliyose payekha wangacita kuti wakhozge umoyo wake wauzimu para wakumana na viyezgo ivyo vingananga cipulikano cake. Ungano uwu uzamutovwira kuti tivikilire mitima yithu, tilutilire kuŵa na umoyo uwemi wauzimu, kweniso kuti tiŵike maghanoghano ghithu pa vitumbiko ivyo Yehova watinozgera.
3. Kasi mphawuli apo tizamuŵa na ungano wa dera, ndipo tasimikizga kucitaci?
3 Ŵanyake ŵa ise tikumanya kale madeti na malo uko kwamucitikira ungano withu wa dera. Para ni nthena, woneseskani kuti mwanozgeka kuti muzakasangikepo na kutegherezga mazuŵa ghose ghaŵiri. Manyani kuti Yehova wakutumbika awo ŵakutokatoka.—Zinth. 21:5.
4. Kasi tikuwona kuti ungano uwu uzamutovwira vici?
4 Yehova ndiyo wapeleka cawanangwa ciwemi ici. Ungano uwu wanozgeka na muzga wakugomezgeka ndipo uzamutovwira comene kuti tilutilire kucita uteŵeti withu. Tikuwonga comene Yehova pakutipa vyawanangwa vyake kuti vitovwire kuti “tikoleske kuzomera pakweru cigomezgo cithu kwambura kusunkhunyika.”—Heb. 10:23-25; Yak. 1:17.