Kasi Muzamwambiska Sambiro la Baibolo mu Okutobala?

1. Kasi tizamugaŵira vici mu Okutobala?

¹ Mu Okutobala tizamugaŵira magazini gha Gongwe la Mulinda na Galamukani! Para tawelerako kwa wakunweka, tikuciskika kuti tikamupe thirakiti la Kasi Mungatemwa Kumanya Unenesko? ndipo tikayezgeyezge kwambiska sambiro la Baibolo. Kasi tingacita wuli nthena pa ulendo wakuwelerako?

2. Kasi tingagwiliskira wuli nchito thirakiti la Kumanya Unenesko kuti tambiskire sambiro la Baibolo para tikuwelerako kwa munthu uyo tamugaŵira magazini?

² Umo Tingagwiliskira Nchito Thirakiti Ili: Tingayowoya kuti: “Magazini agho nkhamulekerani ghakuciska ŵanthu ŵa mafuko ghose na visopa vyose kuti ŵasandenge Baibolo. [Mupani mweneko nyumba thirakiti la Kumanya Unenesko, ndipo mulongorani mafumbo agho ghali pakwambilira.] Apa pali mafumbo ghanyake ghakukondweska comene agho Baibolo likuzgora mwakukhorweska. Kasi muli kufumbapo mafumbo ghanthena agha?” Pamanyuma pakuti mweneko nyumba wazgora, wonerani lumoza zgoro la fumbo lake mu thirakiti ili na kuŵazga lemba limoza mu thirakiti ili. Ndipo mulongosolerani kuti apa mwayowoyapo vicoko waka ivyo Baibolo likusambizga, ndipo mupani buku la Baibolo Likusambizgaci? Mungadumbiskana nayo ndime zakwambilira za mu cipaturo ico wasankha pa vyamukati. Panji mungasankha mutu uwo ukulongosora vinandi pa nkhani iyo mwadumbiskananga mu thirakiti. Pasi apa pali nkhani izo tingadumbiskana nayo ndiposo uko zikusangika mu buku la Baibolo Likusambizgaci?

● Kasi Ciuta wakutipwelelera nadi? (peji 9-11, ndime 6-10)

● Kasi nkhondo na kusuzgika vimalenge? (peji 12, ndime 12-13)

● Kasi nchivici cikucitika para munthu wafwa? (peji 59-60, ndime 7-8)

● Kasi pali cilindizga cilicose ca ŵakufwa? (peji 71, ndime 13-15)

● Ni mwawuli umo ningalombera kuti Ciuta wapulike malurombo ghane? (peji 166-167, ndime 5-8)

● Ni mwawuli umo ningaŵira wakukondwa na umoyo wane? (peji 9, ndime 4-5)

3. Kasi tingasintha wuli kasambizgiro kithu mwakuyana umo vinthu viliri?

³ Ndipouli, para vingacitika yayi kuti tambiske sambiro mu buku la Baibolo Likusambizgaci? pa ulendo wakwamba wakuwelerako, tingapangana nayo kuti tamuweraso na kulutilira kudumbiskana. Mwakuyana na umo munthu wanwekera, tingasankha kulutilira kudumbiskana nayo mafumbo ghanyake mu thirakiti kwa maulendo ghanandi pambere tindamulongore buku. Mphanyi tagwiliskira nchito makora thirakiti ili mu Okutobala kuti tambiske sambiro la Baibolo na kovwira ŵanthu ŵa mitima yiwemi “kumanya unenesko.”—Yoh. 8:31, 32.