Cindikani Uteŵeti Winu
1. Kasi ŵanthu ŵanandi mu caru ici ŵakuti wuli na nchito ya kupharazga?
1 Ŵanthu ŵanandi mu caru ca Satana ici ŵakughanaghana kuti kupharazga “mbucindere.” (1 Kor. 1:18-21) Usange tingapusa, tingagongowa na kuwa nkhumbi cifukwa ca maghanoghano ghawakawaka agha. (Zinth. 24:10; Yes. 5:20) Cifukwa wuli tikwenera kucindika mwaŵi uwo tili nawo pakuŵa Ŵakaboni ŵa Yehova?—Yes. 43:10.
2. Cifukwa wuli kupharazga ni “mulimo utuŵa”?
2 “Mulimo Utuŵa”: Mpositole Paulosi wakati kupharazga ni “mulimo utuŵa.” (Rom. 15:15, 16) Kasi kupharazga ni “mulimo utuŵa” mu fundo wuli? Para tikupharazga ndikuti “tili ŵanchito ŵanyake na Ciuta” uyo ni “Mutuŵa,” ndipo tikovwira kutuŵiska zina lake. (1 Kor. 3:9; 1 Pet. 1:15) Yehova wakuwona kupharazga kuŵa “sembe ya malumbo,” ntheura nchakuzirwa kupharazga apo tikusopa Ciuta.—Heb. 13:15.
3. Cifukwa wuli mulimo wa kupharazga makani ghawemi ngwapadera?
3 Kupharazga makani ghawemi ni mwaŵi wapadera, ndipo mbacoko comene awo ŵasanga mwaŵi uwu. Kuŵenge kuti nchito iyi Ciuta wakatuma ŵangelo, mphanyi mbakukondwa comene kuyicita, nakuti mphanyi ŵakuyicita makora comene. (1 Pet. 1:12) Ndipouli, Ciuta watuma ise ŵanthu ŵambura kufikapo, “viŵiya vyadongo,” kuti ticite mulimo wapadera uwu!—2 Kor. 4:7.
4. Kasi tingalongora wuli kuti tikucindika uteŵeti withu?
4 Ngwakuzirwa Comene: Tikucindika mwaŵi wapadera uwo tili nawo, ntheura kupharazga nchimoza mwa “vinthu vyakuzirwa comene” pa umoyo withu. (Fil. 1:10) Lekani sabata yiliyose tikupatura nyengo na kucitako mulimo uwu. Usange munthu wakwimba sumu na gulu lakumanyikwa pa caru cose ndipo wakucindika mwaŵi uwo wali nawo, wakulekapo yayi kusambilira para wamwimba, ndipo wakuyezgayezga kusazgirako luso lwake. Mwakuyana waka, nase tinozgekerenge pambere tindalute kukapharazga mwakuti ‘ticite mwakwenelera na mazgu gha unenesko’ kweniso kuti tiŵe na “luso lwa kusambizga.”—2 Tim. 2:15; 4:2.
5. Mbanjani awo ŵakuwonga uteŵeti uwo tikucita?
5 Tingagongowanga yayi na ivyo ŵanthu ŵakuyowoya. Tingaluwanga yayi kuti mu cigaŵa cithu ŵalimo ŵanandi awo ŵakuwonga para tikuŵapharazgira. Ndipouli, tikukhumba kulumbika waka na ŵanthu yayi. Cakuzirwa comene nkhukondweska Yehova, ndipo wakuwonga ivyo tikucita.—Yes. 52:7.