Vifukwa 12 Ivyo Tikupharazgira

Cifukwa wuli tikupharazga na kusambira Baibolo na ŵanthu? Kasi kovwira ŵanthu kuti ŵasange nthowa yakuya ku umoyo ndico cifukwa cakuzirwa comene? (Mat. 7:14) Ndico calembeka pakwamba pa vifukwa ivyo vili pasi apa, kweni ndico cakuzirwa comene yayi. Pa vifukwa 12 ivyo vyalembeka pasi apa, ni nchi ico nchakuzirwa comene?

1. Usange tikupharazga tikovwira ŵanthu kuti ŵazakasange umoyo.—Yoh. 17:3.

2. Tikucenjezga ŵanthu kuti ŵaleke nthowa ziheni.—Ezek. 3:18, 19.

3. Tikufiska ucimi wa mu Baibolo.—Mat. 24:14.

4. Tikulongora kuti Ciuta ni murunji. Palije uyo wangazakayowoya kuti Yehova ni muheni cifukwa wakaparanya ŵanthu kwambura kuŵapa mwaŵi wakuti wapere.—Mil. 17:30, 31; 1 Tim. 2:3, 4.

5. Tikufiska mulimo withu wakovwira ŵanthu kuŵa pa ubwezi na Ciuta, uyo wakaŵagura na ndopa za Yesu.—Rom. 1:14, 15.

6. Kuti tileke kuŵa na mulandu wa ndopa.—Mil. 20:26, 27.

7. Tikupharazga kuti tizakapone.—Ezek. 3:19; Rom. 10:9, 10.

8. Tikutemwa ŵazengezgani.—Mat. 22:39.

9. Tikupulikira Yehova na Mwana wake.—Mat. 28:19, 20.

10. Ni nthowa yimoza yakusopera Yehova.—Heb. 13:15.

11. Tikutemwa Ciuta.—1 Yoh. 5:3.

12. Tikutuŵiska zina la Yehova.—Yes. 43:10-12; Mat. 6:9.

Paliso vifukwa vinyake ivyo tikupharazgira padera pa ivi tazunura apa. Vinyake ni vyakuti para tikupharazga tikukhozga cipulikano cithu kweniso tikuŵa ŵanchito ŵanyake na Ciuta. (1 Kor. 3:9) Kweni cifukwa cakuzirwa comene ico tikupharazgira ncha nambara 12. Kwali ŵanthu ŵatipulike kwali yayi, para tikupharazga tikutuŵiska zina la Ciuta na kovwira Yehova kuzgora uyo wakumucenya. (Zinth. 27:11) Umo tawonera, pali vifukwa viwemi comene vyakuti ‘tilutilire kusambizga na kupharazga makani ghawemi.’—Mil. 5:42.