Bokosi la Fumbo

◼ Tingamanya wuli kuti munthu timugaŵire buku panji magazini?

Cinthu cakwamba ni para munthu wanweka. Usange tawona kuti ngwakunweka nadi, tingamulekera magazini ghaŵiri, burosha, panji buku lililose ilo tikugaŵira. Ntheura tingamugaŵira nipera, kwali wali na ndalama yicoko panji walijirethu yakuti wawovwire pa mulimo wa kupharazga pa caru cose. (Job 34:19; Uvu. 22:17) Padera pa ici, tikukhumba yayi kuti mabuku ghithu tigaŵire ŵanthu awo ŵalije nagho nchito.​—Mat. 7:6.

Kasi mwenenyumba wangalongora wuli kuti ngwakunweka? Para ngwakufwatuka apo tikuyowoya nayo. Wakutegherezga kweniso kuzgora mafumbo, nakuti wakughanaghanirapo na kuyowoya maghanoghano ghake. Usange wakutilondezga pa kuŵazga Baibolo ndikuti wakucindika Mazgu gha Ciuta. Kanandi cikovwira kumufumba usange wamuŵazga buku panji magazini agho tamugaŵira. Mahara ghakukhumbikwa kuti ŵapharazgi ŵamanye usange munthu ngwakunweka nadi. Mwaciyelezgero, para tikupharazga mu msewu, nchakwenelera yayi kuti tigaŵenge bweka magazini, maburosha, panji mabuku ku waliyose uyo tikujumphana nayo. Nchiwemi kumupa thirakiti usange tindamanye kunweka kwake.

Mwakuyana waka, unandi wa mabuku agho mupharazgi wangatora ku mpingo uŵe wakuti wangafiska kugaŵira mu uteŵeti, ndipo ukuthemba pa ndalama izo wakupeleka yayi. Ntheura ndalama izo tikupeleka kuti ni zakulipilira mabuku yayi kweni zikukhozgera mulimo wakupharazga pa caru cose. Para tili ŵakuwonga, tipelekenge na mtima wose, kovwira pa mulimo wa kupharazga Ufumu mwambura kupwelerako vya ndalama izo tikusanga. (Mrk. 12:41-44; 2 Kor. 9:7) Kweniso tikuciskika kuti titorenge mabuku ghekha agho tikughakhumba nadi kuti ndalama izo zapelekeka pa mabuku, zileke kusakazika pawaka.

[Mazgu Ghakukhozgera pa peji 2]

Mahara ghakukhumbikwa kuti ŵapharazgi ŵamanye usange munthu ngwakunweka nadi