Kasi Likuwoneka Makora?

Nchiwemi kujifumba fumbo ili para tikukhumba kugaŵira buku lililose. Usange buku ndakukonyeka, lambura kuwoneka makora, lakubinkha, panji lakukeruka, ŵanthu ŵangamba kwelura gulu la Yehova, ndipo ŵangategherezga yayi uthenga wakuponoska umoyo uwo uli mu buku ilo.

Kasi tingacita wuli kuti mabuku ghithu ghawonekenge makora? Ŵanandi ŵasanga kuti nchakovwira kupatura mabuku mu cikwama. Ŵakuŵika mabuku paghekha, magazini na maburosha paghekha, mathirakiti paghekha. Nyengo zose ŵakuŵika Baibolo na buku lililose pa malo ghake makoramakora kuti ghaleke kunangika. Ŵapharazgi ŵanyake ŵakuŵika mabuku mu mafayelo panji mu mapepara gha pulasitiki ghakulangara. Kwali tikupatura mabuku mu cikwama, kwali tikuŵika mu mafayelo, ico tikukhumba nchakuti “uteŵeti withu uleke kusangika na kafukwa” cifukwa ca kupeleka buku lakunangika.—2 Kor. 6:3.