Vinthu Vitatu Ivyo Vingatovwira Kusambizga Makora
1. Cifukwa wuli nchakuzirwa kusambizga makora?
1 Ŵapharazgi wose mbasambizgi. Kwali tikuyowoya na munthu kakwamba, kwali tikuwelerako, kwali tikusambira nayo Baibolo, cilato cithu nchakuti wamanye. Ndipo ivyo tikusambizga ni vyakuzirwa. Tikovwira ŵanthu kuti ŵapulikiske “malemba ghatuŵa” agho ‘ghakumanya kuzgora munthu kuŵa wavinjeru, kuti waponoskeke.’ (2 Tim. 3:15) Uwu ni mwaŵi ukuru comene! Tiyeni tiwone vinthu vitatu ivyo vingatovwira kusambizga makora.
2. Kasi tingacita wuli kuti tileke kuyowoya vinandi pakusambizga?
2 Kuyowoya vinandi yayi: Cifukwa cakuti tikumanya vinandi, nchipusu kuluwa kuti uyo tikumusambizga palije ico wakumanyapo. Ntheura pakusambira Baibolo na munthu, kuyowoya vinandi yayi. Tiyowoyenge fundo zikuru pera. Kuyowoya vinandi ndiko kusambizga makora yayi. (Zinth. 10:19) Nchiwemi kuŵazga malemba ghacoko waka agho ghakukhozgera fundo zikuru. Para mwaŵazga lemba, toranipo waka fundo iyo yikukolerana na nkhani iyo mukudumbiskana. Pa Upharazgi wa pa Lupiri, uwo uli pa Mateyu cipaturo 5 mpaka 7, Yesu wakayowoya fundo zakuzirwa comene, kweni mu mazgu ghacoko waka.
3. Kasi viyelezgero vikovwira wuli, ndipo vikwenera kuŵa vyamtundu wuli?
3 Viyelezgero: Viyelezgero vikovwira munthu kughanaghana, vikucontha mtima, kweniso fundo zikuluwika yayi. Tikukhumbikwira kuŵa na luso lwapadera yayi kuti tiyowoye viyelezgero viwemi. Kanandi Yesu wakayowoyanga viyelezgero vipusu. (Mat. 7:3-5; 18:2-4) Tingadinda vithuzithuzi pa pepara kuti vitovwire kusambizga. Para tinganozgekera makora, viyelezgero vingatisuzga yayi.
4. Kasi tingacita wuli kuti mafumbo ghithu ghaŵenge ghacandulo?
4 Mafumbo: Para msambiri wafumbika fumbo, wakughanaghanirapo pambere wandazgore. Ntheura tikwenera kuzikira para tafumba fumbo. Usange tikuzgora tekha mafumbo, timanyenge wuli kuti msambiri wakupulikiska? Usange wazgora vyam’mutu wake, kumususka yayi. M’malo mwake, mufumbani mafumbo ghanyake agho ghangamovwira kuti wawemo yekha. (Mat. 17:24-27) Ndipouli, tikumanya kuti palije uyo wangasambizga mwakufikapo. Lekani Baibolo likuticiska kuti nyengo zose tiŵenge maso na umo tikusambizgira. Para tikucita nthena titumbikikenge muyirayira, ise na awo ŵakutipulika.—1 Tim. 4:16.