Masacizgo Ghankhondi Agho Ghangatovwira Kusanga Sambiro
1. Usange vikumusuzgani kusanga sambiro la Baibolo, kasi mungacita vici, ndipo cifukwa wuli?
1 Kasi vikumusuzgani kusanga sambiro la Baibolo? Para ni nthena kugongowa yayi. Yehova wakutumbika awo ŵakuvuka yayi kucita khumbo lake. (Gal. 6:9) Pasi apa pali masacizgo ghankhondi agho ghangatovwira.
2. Kasi tingacita wuli kuti tisange ŵanthu awo tingasambira nawo Baibolo?
2 Ŵafumbani: Ŵanthu ŵanandi ŵakumanya kuti tikugaŵira magazini gha Gongwe la Mulinda na Galamukani!, kweni ŵakumanya yayi kuti tikusambira Baibolo na ŵanthu. Mwantheura, para tikupharazga ku nyumba na nyumba tingaŵafumba usange ŵangatemwa kusambira Baibolo. Tingafumbaso awo tikuwelerako. Usange ŵakana, tingalutilira kuŵagaŵira mabuku kuti ŵalutilire kunweka. Mubali munyake wakagaŵiranga magazini mbumba yinyake kwa vyaka vinandi. Ulendo unyake wati waŵagaŵira, wakaŵafumba usange ŵangatemwa kusambira Baibolo. Ŵakazomera, ndipo ŵali kubapatizika.
3. Kasi wose awo ŵakwiza ku maungano ndikuti ŵakusambira Baibolo? Longosorani.
3 Awo Ŵakwiza ku Maungano: Mungaghanaghananga kuti wose awo ŵakwiza ku maungano ndikuti ŵakusambira Baibolo yayi. Mubali munyake wakati: “Ŵanandi awo nasambirapo nawo Baibolo, ni awo nkhaŵafumba ŵati ŵiza pa maungano.” Mudumbu munyake wakafumba mama uyo wakaŵa na ŵana ŵasungwana ŵakubapatizika. Mama uyu wakaŵa na soni. Iyo wakaŵa kuti wakuwungana kwa vyaka 15. Wakizanga ku Nyumba ya Ufumu para maungano ghamba waka na kuwera para ghamara waka. Wakazomera kusambira Baibolo na kubapatizika. Mudumbu uyo wakasambiranga nayo wakati: “Nkhudandawura kuti nkhatora vyaka 15 kwambura kumufumba usange wangatemwa kusambira Baibolo!”
4. Kasi tingafumba njani kuti tisange ŵanthu awo tingasambira nawo Baibolo?
4 Fumbani Usange Ŵanji Ŵangatemwa: Mudumbu munyake wakutemwa kuluta na ŵanji ku masambiro ghawo. Para ŵamara kusambira, mudumbu uyu wakufumba msambiri usange pali uyo wakumanya kuti wangatemwa kusambira Baibolo. Usange mukugaŵira buku la Baibolo likusambizgaci kwa munthu uyo mukuwelerako, mungamufumba kuti: “Kasi mukuwona kuti ni njani munyake uyo wangatemwa buku ili?” Pa vifukwa vinyake, ŵapharazgi panji ŵapayiniya ŵangakwaniska yayi kusambira na munthu uyo ŵakakumana nayo mu upharazgi. Ntheura, tingaŵamanyiska kuti tili ŵakunozgeka kukasambira nawo.
5. Cifukwa wuli tikwenera kufumba mfumu panji muwoli uyo ni Kaboni yayi usange wangatemwa kusambira Baibolo?
5 Mfumu Panji Muwoli Uyo Ni Kaboni Yayi: Kasi mu mpingo winu muli ŵapharazgi awo mfumu panji muwoli wawo ni Kaboni yayi? Ŵafumu panji ŵawoli ŵanyake awo Mbakaboni yayi ŵakukhumba yayi kudumbiskana Baibolo na Ŵakhristu awo ŵali kutorana nawo. Kweni ŵakuzomera kusambira Baibolo na munthu munyake uyo ngwamumbumba yawo yayi. Nchiwemi kufumba dankha mfumu panji muwoli uyo ni Kaboni kuti mumanye umo mungakayowoyera.
6. Kasi lurombo lingawovwira wuli kuti musange sambiro la Baibolo?
6 Lurombo: Lurombo luli na nkhongono yikuru. (Yak. 5:16) Yehova wakulayizga kuti wapulikenge malurombo ghithu cikuru ghakuyana na khumbo lake. (1 Yoh. 5:14) Mubali munyake uyo wakaŵa wakutangwanika comene wakalomba kuti wasange sambiro la Baibolo. Muwoli wake wakakayikanga usange mfumu wake wangafiska kupwelelera sambiro lake, comenecomene usange lakumana na masuzgo. Ntheura, apo wakamulomberanga mfumu wake kuti wasange sambiro, wakamuphalira Yehova ivyo wakenjerwanga. Yehova wakazgora pati pajumpha masabata ghaŵiri. Mupayiniya munyake wakasanga munthu uyo wakakhumbanga kusambira Baibolo, ndipo wakapeleka sambiro ili kwa mubali uyu. Mudumbu wakati: “Usange yunji wakuwona kuti wangafiska yayi kusambira Baibolo na munthu, ine nkhuti: Muphalirani Yehova ico mukukhumba ndipo kuleka yayi kulomba. Sono ndise ŵakukondwa comene.” Na citatata, namwe mungasanga sambiro la Baibolo ndipo mukondwenge comene kuti mwawovwira yunji kusanga “nthowa yakulongozgera ku umoyo.”—Mat. 7:13, 14.