“Kupeleka Ukaboni Wakukwana”
1. Kasi tikusambirako vici kwa Paulosi pa nkhani ya uteŵeti?
1 “Ufiske uteŵeti wako mwakukwana.” (2 Tim. 4:5) Paulosi wakaŵa na wanangwa wakuyowoya mazgu agha kwa Timote cifukwa ndivyo wakacitanga. Pakati pa 47 na 56 C.E., Paulosi wakaŵa kuti wayenda kale maulendo ghatatu ya umishonale. Buku la Milimo likuyowoya kanandi waka kuti Paulosi wakapeleka “ukaboni wakukwana.” (Mil. 23:11; 28:23) Kasi ise tingapeleka uli ukaboni wakukwana mazuŵa ghano?
2. Kasi tingapeleka wuli ukaboni wakukwana para tikupharazga kunyumba na nyumba?
2 Kunyumba na Nyumba: Kuti tipharazgire ŵanthu awo ŵandapulikepo makani ghawemi, tikwenera kuluta pa nyengo zakupambanapambana. Nyengo zinyake munthu wangasangika pa nyumba ca kumise panji pa Cisulo na pa Sabata. Tikwenera kuwoneseska kuti tapharazgira munthu panyumba yiliyose. Kuti ticite nthena tingakhumbikwira kulutaso kuti tikapharazgire awo tikaleka kuŵasanga. Wuli usange tikuŵasanga yayi? Panyake kuŵalembera kalata panji kuŵayimbira foni kungawovwira.
3. Kasi tili na mipata wuli yakupharazgira pakweru kweniso palipose apo mpata wasangika?
3 Pakweru Kweniso Palipose Apo Mpata Wasangika: Ŵateŵeti ŵa Yehova mazuŵa ghano ŵakuphalira ŵanji “vinjeru.” Ŵakucita nthena kwa wose awo ŵangategherezga. Ivi vikucitika mu misewu panji “mu mabwalo.” (Zinth. 1:20, 21) Apo tikucita milimo yithu ya zuŵa na zuŵa, kasi tikuŵa ŵakunozgeka kupeleka ukaboni? Kasi nase tikumanyikwa kuti “tikutangwanika comene na kupharazga mazgu’? (Mil. 18:5) Usange ni nthena, mbwenu tikufiska mulimo withu wa “kupeleka ukaboni wakukwana.”—Mil. 10:42; 17:17; 20:20, 21, 24.
4. Kasi lurombo na kughanaghanirapo vingatovwira wuli kuti tipeleke ukaboni mwakukwana?
4 Kweni nyengo zinyake tingatondeka kupeleka ukaboni cifukwa ca wofi panji soni. Yehova wakutipulikiska cifukwa wakutimanya makora. (Sal. 103:14) Para vyaŵa nthena, tikwenera kulomba kuti watipe cikanga. (Mil. 4:29, 31) Kweniso, para tikusambira Mazgu gha Ciuta na kughanaghanirapo, timanyenge kuzirwa kwa makani ghawemi. (Fil. 3:8) Para tamanya kuzirwa kwa makani ghawemi tipharazgenge mwamwamphu.
5. Kasi tingacita vici kuti nase tifiskeko ucimi wa Joyeli?
5 Ucimi wa Joyeli ukayowoyerathu kuti pambere zuŵa likuru la Yehova lindize, palije ico cizamulekeska ŵanthu ŵa Ciuta kupharazga. (Joel 2:2, 7-9) Tikwenera kuŵikapo mtima kucitako mulimo uwu uwo uzamucitikaso yayi.