Ŵapokelerani!
1. Kasi nchakucitika wuli ico cikutipa mwaŵi wakucitira ukaboni, ndipo cifukwa wuli?
1 Palije cakucitika cinyake ico cikutipa mwaŵi ukuru wakucitira ukaboni kuluska Cikumbusko. Ghanaghanirani fundo iyi: Caka cino tikukhazga kuti ŵalendo ŵakujumpha 10 miliyoni ŵizenge ku Cikumbusko kuti ŵazakapulike umo sembe yakuwombora yikulongolera kuti Yehova na Yesu ŵakuŵatemwa. (Yoh. 3:16; 15:13) Ŵazamusambira vitumbiko ivyo ŵakusanga sono na ivyo ŵazamusanga kunthazi cifukwa ca cawanangwa ca Yehova ici. (Yes. 65:21-23) Kweni ni uyo wazamuyowoya nkhani pera yayi uyo wazamuŵa na mwaŵi wakucitira ukaboni pa cakucitika ici. Waliyose uyo wazamuŵapo wazamuŵa na mwaŵi wakucitira ukaboni para wazamupokelera ŵalendo awo ŵiza.—Rom. 15:7.
2. Kasi tingapokelera wuli ŵalendo awo ŵiza pa Cikumbusko?
2 M’malo mwakusanga waka malo ghakukhala na kulindilira kuti pulogiramu yiyambe, cingaŵa ciwemi kuzakatawuzga awo mwakhala nawo pafupi na kuŵaphalira zina linu. Kanandi ŵalendo ŵakuŵa ŵakukakika ndipo ŵakumanya yayi ico cicitikenge. Kumwemwetera kweniso kuŵatawuzga mwacitemwa kungawovwira kuti ŵaŵe ŵakufwatuka. Kuti mumanye usange munthu wiza cifukwa cakuti wakapokera kapepara ka nchemo, mungamufumba usange nkhakwamba kwiza ku maungano ghithu panji usange wakumanyapo waliyose pa mpingo. Nyengo zinyake mungakhala nayo lumoza kuti ŵawonengeko pa Baibolo na sumu yinu. Usange Cikumbusko cicitikirenge pa Nyumba ya Ufumu, mungamulongora malo na kumulongosolera mwakudumura ivyo vikucitika. Para nkhani yamara, mungamufumba usange wali na mafumbo. Usange mpingo winu ufumenge luŵiro kuti ulekere malo mpingo unyake, mungayowoya kuti: “Ningatemwa kuti nimanye maghanoghano ghinu pa ivyo mwapulika pa ungano uno. Kasi tingasangana wuli?” Panganani zuŵa ilo mungakumana. Ŵalara ŵazamuŵa maso kuti ŵakhozge ŵakulopwa awo ŵiza pa cikumbusko.
3. Cifukwa wuli nchakuzirwa kuti tizakafwilirepo kupokelera ŵalendo pa Cikumbusko?
3 Ku ŵalendo ŵanandi awo ŵizenge, kazamuŵa kakwamba kuwona cimwemwe, mtende, na paradiso wauzimu ivyo ŵanthu ŵa Yehova ŵakusangwa navyo. (Sal. 29:11; Yes. 11:6-9; 65:13, 14) Kasi ŵalendo ŵazamufumapo na maghanoghano wuli? Vizamuthemba comene pa umo tizamuŵapokelelera.