Bokosi la Fumbo

◼ Kasi ni fundo wuli za mu Baibolo izo zingatovwira umo tikwenera kucitira na foni para tili pa maungano na mu upharazgi?

“Kanthu Kose Kali na Nyengo Yake na Yake.” (Muph. 3:1): Foni zikutovwira kuti titumizge uthenga panji kuyowoya na ŵanyithu nyengo yiliyose. Ndipouli, nyengo zinyake ŵabali na ŵadumbu ŵakuwona kuti nchiwemi yayi kuti foni yiŵatimbanizge, comene para ŵali pa maungano. Maungano ni nyengo yakusopa Yehova, kupokera ulongozgi wauzimu, na kukhozgana na Ŵakhristu ŵanyithu. (Dute. 31:12; Sal. 22:22; Rom. 1:11, 12) Kasi tingazimwa yayi foni yithu para tafika waka pa maungano na kubuska para maungano ghamara? Usange tikukhazga cinthu cinyake ico cingatitondeska kuzimwa foni, kasi tingayicuna yayi kuti yileke kutitimbanizga, ise na ŵanyithu wuwo?

‘Citani Vinthu Vyose Cifukwa ca Makani Ghawemi.’ (1 Kor. 9:23): Nyengo zinyake foni yikuŵa yakovwira comene para tili mu uteŵeti wa m’munda. Mwaciyelezgero, mubali uyo wakulongozga uteŵeti yingamovwira kuti wamanye umo vinthu viliri na ŵabali awo ŵakupharazga kunyake. Nyengo zinyake ŵapharazgi ŵakwimbira foni munthu wakunweka pambere ŵandalute kuti ŵamanye usange walipo, comene usange nkhutali. Usange tili na foni, tikwenera kuwoneseska kuti yileke kutitimbanizga para tikudumbiskana na munthu. (2 Kor. 6:3) Usange tikulindilira ŵanyithu, cingaŵa ciwemi kuti tipharazgenge panji kukhozgana na uyo tenda nayo, m’malo mwa kutangwanika na kwimba foni panji kulembera ŵanyithu mameseji.

Ghanaghanirani Ŵanji. (1 Kor. 10:24; Fil. 2:4): Kweniso, vikuŵa makora yayi kufika mwakucedwa pa ungano wakunozgekera uteŵeti, na kughanaghana kuti tamuyimba foni panji kulemba meseji kuti timanye uko ŵanyithu ŵakupharazga. Usange tafika mwakucedwa, kanandi cikupangiska kuti uyo wakulongozga wagaŵeso makora ŵapharazgi. Tikukana yayi kuti pangaŵa vyakucitika vinyake ivyo vingapangiska kuti tifike mwakucedwa. Kweni para tikuyezgayezga kuti tifikenge mwaluŵiro, tikulongora kuti tikughanaghanira mulimo wa Yehova, mubali uyo wakulongozga, na ŵapharazgi ŵanyithu.