Pulikani na Kusambira
1. Cifukwa wuli tikwenera kukaŵikapo mtima comene kuti tikapulike na kusambira pa maungano gha cigaŵa?
1 Sonosono apa maungano gha cigaŵa gha 2013 ghambenge. Nchito yinandi yacitika kale yakunozgekera ungano uwu. Nkhani zanozgeka kuyana na ivyo vikucitika pa caru mazuŵa ghano. Kasi mwanozgekera kuti muzakaŵepo mazuŵa ghose ghatatu? Pa maungano ghakurughakuru pakuŵa vyakutimbanizga vinandi. Mwantheura, mukategherezgenge comene. Pakuti cigaŵa cilicose cikutora nyengo yitaliko kuluska maungano gha mpingo, tikwenera kukategherezga kwa nyengo yitali. Kweniso, tingavuka cifukwa ca kwenda na vinthu vinyake. Kasi nchivici camutovwira kuti tikaŵe maso mwakuti tikapulike na kusambira?—Dute. 31:12.
2. Kasi tingacita wuli kuti tinozgekere ungano mu mtima?
2 Para Kwakhala Mazuŵa Ghacoko Waka Kuti Ungano Ucitike: Pa Webusayiti yithu ya www.jw.org, ŵakuŵikapo ndondomeko ya ungano wa cigaŵa. Vinyake ivyo vikuŵa pa ndondomeko iyi ni mitu ya nkhani na lemba limoza panji ghaŵiri pa mutu uliwose. Para tili na intaneti, tingawonerathu ivyo vili pa ndondomeko iyi kuti tinozgekere mu mtima ivyo tamusambira. (Ezra 7:10) Pa nyengo Yakusopa kwa Mbumba, mungadumbiskana ivyo vili pa ndondomeko iyi kuti waliyose ŵanweke na ungano.
3. Nchivici ico cingakatovwira kutegherezga mwakupwelelera?
3 Para Ungano Uli Mukati: Usange vingacitika, cingaŵa ciwemi kulutirathu kukajovwira pambere ungano undambe. Mungazimwa foni yinu kuti yileke kumutimbanizgani para munyake wangamuyimbirani panji kumutumirani meseji. Namwe mungayezgeka kutumira munyinu meseji uku ungano uli mukati. Usange mwawona kuti mungazimwa yayi pa vifukwa vinyake, mukwenera kuyicuna kuti yileke kutimbanizga ŵanyinu. Nchiwemi yayi kurya panji kumwa uku ungano uli mukati. (Muph. 3:1) Mukalaŵiskenge uyo wakudumba nkhani. Para uyo wakuyowoya nkhani ŵakuŵazga Baibolo, namwe mukajurenge linu na kumulondezga. Mukalembenge fundo zakudumura.
4. Kasi ŵapapi ŵangawovwira wuli ŵana ŵawo kuti ŵakategherezge na kusambira?
4 Ŵana ŵithu nawo tikukhumba kuti ŵakapulike na kusambira. Lemba la Zintharika 29:15 likuti: “Mwana uyo ŵakumulekelera wamukhozga soni nyina.” Ipo nchiwemi kuti mbumba yose yikhalenge pamoza. Ici cikovwira ŵapapi kuwoneseska kuti ŵana ŵawo ŵakutegherezga m’malo mwa kuyowoyeskana, kutumirana mameseji, panji kwendendeka waka. Nanga ŵangaŵa kuti mbanici comene mwakuti ŵangapulika yayi ivyo vikuyowoyeka, kweni tingaŵasambizga kuti ŵaleke kugona na kukhala cete.
5. Cifukwa wuli nchiwemi kuweleramo ivyo tasambira pa ungano, ndipo tingacita wuli?
5 Para Ungano Wamara Zuŵa Lililose: Kugona mwakucedwa yayi. Para muzamugona luŵiro muzamupumuranga mwakukwana. Kuweleramo ivyo mwasambira kuzamovwirani kuti muleke kuluwa. Ipo cingaŵa ciwemi kuti muzakadumbiskanenge na mbumba yinu ivyo mwasambira ku ungano mise yiliyose pambere mundagone. Usange mukuluta kukatembeya na ŵanyinu, mungayegha fundo izo mwalemba kuti mukaŵaphalireko izo zamukondweskani. Para ungano wamara, mungadumbiskana pa nyengo Yakusopa kwa Mbumba umo mbumba yinu yingalondezgera fundo izo mukasambira pa ungano. Kweniso, mungapatura nyengo sabata yiliyose kuti musambirenge buku panji burosha liphya ilo likafuma pa ungano.
6. Kasi kuŵapo waka pa ungano nkhwakukwana? Longosorani.
6 Ciphikiro cingaŵa cambura candulo usange ŵanthu ŵandarye vyakurya ivyo vyaphikika. Ndimoso viliri na ciphikiro cauzimu ico cizamuŵako pa ungano wa cigaŵa. Ipo tikaŵepo pa cigaŵa cilicose, kutegherezga comene, na kucita ivyo tamusambira kuti tikasange candulo cakukwana.