Maungano gha Cigaŵa Ghakutovwira Kucitira Ukaboni Unenesko
1. Kasi nyengo ya viphikiro yikaŵapa mwaŵi wuli Ŵaisrayeli?
1 Ŵaisrayeli wakawungananga katatu pa cilimika kuti ŵacite viphikiro ivyo vikacitikanga cilimika cilicose. Nangauli ŵanalume pera ndiwo ŵakeneranga kuŵapo, kweni mbumba zose zikalutanga ku Yerusalemu kukaŵapo pa viphikiro ivi. (Dute. 16:15, 16) Viphikiro ivi vikaŵapanga mwaŵi wa kudumbiskana na kughanaghanirapo unenesko wa mu Malemba. Kasi ni unenesko wuli unyake wa mu Malemba uwo ŵakaghanaghanirangapo? Fundo yimoza njakuti Yehova wali na mtima wakupa. (Dute. 15:4, 5) Yinyake njakuti Yehova tingamugomezga kuti watilongozge na kutivikilira. (Dute. 32:9, 10) Ŵaisrayeli ŵakenerangaso kughanaghanirapo fundo iyi: Pakuti ŵakaŵa ŵanthu ŵakupatulika ŵa Yehova, ŵakeneranga kusunga malango ghake. (Dute. 7:6, 11) Lero napo, maungano gha cigaŵa ghakutovwira mwakuyana waka.
2. Kasi ungano wa cigaŵa uzamutovwira wuli kuti tipulikiske unenesko wa mu Baibolo?
2 Maungano gha Cigaŵa Ghakovwira Kuti Tipulikiske Unenesko: Pa maungano gha cigaŵa, pakuŵa nkhani, seŵero, na viyezgelero. Vinthu ivi vikutovwira kuti tipulikiske unenesko uwo uli mu Baibolo. (Yoh. 17:17) Nchito yinandi yakunozgekera maungano gha cigaŵa yili kucitika kale. Gulu la Yehova lanozga pulogiramu yakuyana na umo vinthu viliri pasono pa caru cose. (Mat. 24:45-47) Kasi mwanweka kuti mukapulike ivyo vyanozgeka?
3. Kasi tikwenera kucitaci kuti tizakasange candulo na ungano?
3 Tizamusanga candulo na ungano uwu usange tizamuŵapo mazuŵa ghose ghatatu na kutegherezga comene. Usange mundapemphe holide ku nchito, manyiskani bwana winu. Muzakagonenge mwakukwana mwakuti muzakaleke kusiwa pa ungano. Ŵanji ŵakuwona kuti kulaŵiska uyo wakudumba nkhani na kulemba fundo, vikovwira comene kuti ŵaleke kusiwa. Foni panji vinthu vinyake vizakaleke kumutimbanizgani panji kutimbanizga ŵanji. Para ungano wuli mukati, nchakwenelera yayi kuphwepwerezgana, kulemberana mameseji, panji kurya.
4. Kasi ŵapapi ŵangawovwira wuli ŵana ŵawo kuti ŵazakasange candulo pa ungano?
4 Para pajumpha vilimika vinkhondi na viŵiri vilivyose, Ŵaisrayeli ŵakawungananga pamoza kuti ŵapulike Dango ilo likaŵazgikanga pa nyengo ya ciphikiro ca misasa. Ŵakizanga na “ŵana. . . kuti ŵapulike na kusambira.” (Dute. 31:12) Cikuŵa cakukondweska kuwona kuti mbumba zakhala pamoza pa ungano, ndipo ŵanici ŵakutegherezga. Nchiwemi kuti mise yiliyose muzakadumbiskane fundo izo mwasambira zuŵa ilo pamoza na mbumba yinu. Pakuti “Undere ukuvungika mu mtima wa mwana,” ni mulimo winu ŵapapi kupwelelera ŵana ŵinu, kusazgapo ŵa vilimika vyapakati pa 13 na 19. Kuŵalekelera waka yayi, comenecomene pa nyengo ya cakurya ca muhanya na uko mukugona. (Zinth. 22:15; 29:15)
5. Kasi kavwaliro kithu kangapangiska wuli ŵanthu kukopeka na unenesko para tili ku ungano?
5 Nkharo Yithu Yikovwira Kuti Ŵanthu Ŵakopeke na Unenesko: Nkharo yithu para tili ku ungano yikovwira kuti ŵanthu ŵakopeke na unenesko. (Tito 2:10) Tikuvwara baji kuti ŵanthu ŵamanye kuti kuli ungano, kuti ŵabali ŵatimanye, kweniso tikucitira ukaboni awo ŵakutiwona. Ŵanthu ŵa kufupi na malo gha ungano ŵakuwona baji ilo tavwara na umo tikuwonekera makora. Ivyo tikuvwara vikupangiska ŵanji kuŵa na maghanoghano ghaheni yayi, umo ŵanthu wakuvwalira mazuŵa ghano. (1 Tim. 2:9, 10) Mwantheura, para tili ku ungano, tikwenera kuŵikako mahara umo tavwalira na umo tajitozgera. Vingalongora nchindi yayi usange tingavwara tisheti panji kabunthu. Nanga ungano ungacitikira pa mutandasanya, tikwenera kuvwara mwanchindi. Usange ungano wamara namise ndipo tikukhumba kusintha na kuvwara malaya ghanyake, tikwenera kukumbuka kuti ticali ku ungano. Tingavwaranga mwakutalulira yayi.
6. Kasi tikwenera kukacita vici kuti tikaŵe na mwaŵi wakucezga na ŵabali na ŵadumbu pa ungano wa cigaŵa?
6 Panyengo ya viphikiro, Ŵaisrayeli ŵakacezganga na kukhozgana na ŵabali ŵawo awo ŵakafuma ku vigaŵa vinyake. Ici cikawovwira kuti ŵaŵe ŵakukolerana. (Mil. 2:1, 5) Ubali withu Wacikhristu, ukuwonekera pakweru pa maungano gha cigaŵa. Awo ŵakutiwona ŵakukondwa na Paradiso wauzimu uyu. (Sal. 133:1) Nchiwemi comene kuti muzakize na cakurya ca muhanya m’malo mwa kufumapo pa malo gha ungano kuti mukagure cakurya. Para muzamucita nthena, muzamuŵa na mwaŵi wakuti mumanyane na ŵabali na ŵadumbu awo muzamukhala nawo pafupi.
7. Cifukwa wuli tikwenera kujipeleka kucitako nchito pa ungano para tingafiska?
7 Awo ŵakutiwona ŵakukondwa na maungano ghithu, comenecomene para ŵamanya kuti milimo ghose yikacitika na ŵabali ŵakujipeleka. Kasi namwe mungakwaniska ‘kujipeleka na mtima wose’ pa ungano? (Sal. 110:3) Mbumba zinandi zikujipeleka kugwilira lumoza nchito pa malo gha ungano na cilato ca kusambizga ŵana kuti ŵawe na mtima wakujipeleka. Usange muli na soni, para mungajipeleka kukagwira nchito pa ungano, mwamumanyana na ŵabali na ŵadumbu ŵanandi. Mudumbu munyake wakati: “Nkhamanyanga waka ŵanthu ŵa mu mbumba yane na ŵanyane ŵacoko waka mbwenu. Kweni nati nagwirako nchito yakutozga malo, nkhamanya ŵabali na ŵadumbu ŵanandi comene! Nkhakondwa comene!” Tikusazgirako ŵabwezi para tikujipeleka kugwira nchito pa ungano, nakuti tikusanga cimwemwe cikuru. (2 Kor. 6:12, 13) Usange mundacitepo uteŵeti uwu, fumbani ŵalara pa mpingo kuti ŵamuphalirani ivyo mungacita.
8. Kasi tizamucita wuli pakucema ŵanthu kuti ŵize ku ungano?
8 Cemani Ŵanthu Kuti Ŵazakapulike Unenesko: Vilimika vya kumanyuma, tikambanga kucemera ŵanthu ku ungano para kwakhala masabata ghatatu. Ndimo ticitirenge caka cino. Mpingo ukwenera kuŵa na cilato cakuti ugaŵire tumapepara utu mu cigaŵa cikuru ca mpingo wawo umo ungafiskira. (Wonani bokosi lakuti “Kasi Tizamucita Wuli Pakucema Ŵanthu?”) Tumapepara uto twakhala muzakayeghe ku ungano. Tizamugaŵira awo wali pafupi na malo ungano.
9. Yowoyani vyakucitika ivyo vikulongora kuti nchito yakucemera ŵanthu ku ungano yikuwa pawaka yayi.
9 Kasi ŵanthu ŵakwiza nadi para taŵacema? Pa ungano unyake, mulinda wakawovwira mbumba yinyake kusanga pakukhala. Ŵakamuphalira kuti ŵakapokera kapepara ndipo ŵakawona kuti yikaŵa nchemo yiwemi. Mwantheura, ŵakenda mtunda wa makilomita 320 kuti ŵakaŵepo pa ungano! Kweniso, mudumbu munyake wakapelekanga tumapepara twakucemera ŵanthu ku ungano ku nyumba na nyumba. Wakakumana na dada munyake uyo wakanweka comene. Wakamulongosolera ivyo vikaŵa pa kapepara. Ku ungano, mudumbu uyu wakazizwa kuwona kuti dada yura wiza na munyake ndipo ŵayegha mabuku agho ghakafuma pa ungano.
10. Cifukwa wuli nchakuzirwa kuŵapo pa ungano wa cigaŵa cilimika cilicose?
10 Viphikiro ivyo vikacitikanga cilimika na cilimika vikawovwiranga Ŵaisrayeli ‘kuteŵetera [Yehova] mu urunji na mu unenesko.’ (Jos. 24:14) Para nase tikusangikapo pa ungano cilimika cilicose ‘tikutilira kwenda mu unenesko,’ nakuti nchigaŵa cakuzirwa ca kusopa kwithu. (3 Yoh 3) Tikulomba Yehova kuti wamutumbikeni pa vyose ivyo mukucita apo mukunozgekera kuzakasangikapo pa ungano wa cigaŵa.
[Mazgu Ghakukhozgera pa peji 3]
Gulu la Yehova lanozga pulogiramu yakuyana na umo vinthu viliri pasono pa caru cose
[Mazgu Ghakukhozgera pa peji 4]
Nkharo yithu para tili ku ungano yikovwira kuti ŵanthu ŵakopeke na unenesko
[Mazgu Ghakukhozgera pa peji 5]
Tizamwamba kucemera ŵanthu ku ungano wacigaŵa para kwakhala masabata ghatatu
[Box on pages 3-6]
Ivyo Tikwenera Kukumbuka pa Ungano wa Cigaŵa
◼ Nyengo ya Ungano: Nyengo yakwambira ungano mazuŵa ghose ghatatu ni 8:20 mulenji. Para kwakhala maminiti ghacoko kuti cigaŵa ca mulenji panji ca muhanya ciyambe, ceyamani wazamukhala pa pulatifomu uku sumu zikwimba. Panyengo iyi, tose tizakakhale pasi. Zuŵa lakwamba na laciŵiri ungano uzamumara 3:55 mise, ndipo zuŵa lacitatu uzamumara 2:45.
◼ Malo Ghakwimikapo Vyakwendera: Pazamuŵa malo ghakukwana ghakwimikapo magalimoto na njinga. Tikupempha ŵeneko ŵa magalimoto na njinga kuti ŵazakapulikire ŵalinda awo ŵazamuŵa pa malo agha. Ŵazakawoneseske kuti ŵakiya galimoto panji njinga zawo pambere ŵandalute kukakhala pasi.
◼ Kusunga Malo: Mungazakasunga malo gha ŵanyinu awo mukwenda nawo mu galimoto yinu panji awo mukukhala nawo. Mungasungiraso awo mukusambira nawo Baibolo.—1 Kor. 13:5.
◼ Cakurya ca Muhanya: Muzakayeghe cakurya ca muhanya m’malo mwa kuzakafumapo pa malo gha ungano kuti mukapenje cakurya. Mungazakayegha cakurya ico ŵanandi ŵakurya pa nyengo ya kupumura nga ni chipisi, mpunga, mboholi, mayawu, na vyakumwa. Vyakuloŵezga vikuzomerezgeka yayi pa malo gha ungano.
◼ Vyakupeleka: Tingalongora kuti tikuwonga ivyo vyanozgeka pa ungano mwa kupeleka vyawanangwa ivyo vikovwira pa nchito ya pa caru cose. Vyawanangwa ivi tingapeleka pa Nyumba ya Ufumu panji pa ungano wa cigaŵa. Usange munthu wakukhumba kupeleka ceke pa ungano wa cigaŵa, wazakalembe pa ceke kuti ndalama zipelekeke ku “Watch Tower Society.”
◼ Ngozi: Usange pacitika ngozi pa ungano, kumanani na mulinda uyo wali pafupi. Mwaluŵiro mulinda wamuphalira Dipatimenti ya Cipatala mwakuti awo ŵali mu Dipatimenti iyi ŵawone umo ngozi iyo yiliri, kuti ŵawovwirepo.
◼ Awo Ŵali na Suzgo la Kupulika: Ungano uzamung’anamulika mu ciyowoyero ca mawoko pa maungano gha Cingelezi agho ghazamucitikira ku Lilongwe na ku Blantyre. Pa maungano agho ghazamucitikira ku malo agha, pazamuŵa cipharazgo cakukhwaskana na nkhani iyi pa zuŵa lakudanga la ungano, cigaŵa ca mulenji.
◼ Kutepa Nkhani: Lekani kujoyina nthambo za wayilesi ya kaseti ku magesi gha pa malo gha ungano panji ku vyakukuzgira mazgu. Para muzamutepa, muzakaleke kutimbanizga ŵanyinu.
◼ Kuwelerako ku Ŵakunweka: Muzakalembe mazina gha awo ŵazamunweka cifukwa ca kuŵapharazgira mwamwaŵi pa nyengo ya ungano wa cigaŵa pa fomu ya Weleraniko kwa Munthu Uyu. (S-43) Ŵapharazgi ŵize na fomu yimoza panji ghaŵiri ku ungano wa cigaŵa. Mafomu agho muzamulemba muzakapeleke ku dipatimenti ya Cipinda ca Mabuku kuti ŵamanye kwakuluta nagho, panji muzakapeleke kwa mulembi wa mpingo winu para mwawera ku ungano wa cigaŵa.—Wonani Uteŵeti Withu wa Ufumu wa Novembala 2009, peji 4.
◼ Kujambura Vithuzithuzi: Usange muzamujambura vithuzithuzi, kamera yinu yizakaleke kumulika pakujambura pa nyengo ya ungano.
◼ Selufoni: Muzakacune foni yinu mwakuti yizakaleke kutimbanizga ungano.
◼ Uteŵeti Wakujipeleka: Cimwemwe cithu pa ungano wa cigaŵa cizamusazgikira para tizamujipeleka kovwirapo milimo yinyake. (Mil. 20:35) Usange mukukhumba kuzakacita ntheura, muzakalute ku Dipatimenti ya Uteŵeti Wakujipeleka. Ŵana awo ŵandakwaniske vilimika 16 nawo ŵangateŵetera usange ŵagwilirenge lumoza na mupapi wawo panji mulara waliyose uyo wazomerezgeka na mupapi wawo.
[Bokosi pa peji 6]
Kasi Tizamucita Wuli Pakucema Ŵanthu?
Kuti tizakagaŵire tumapepara mu cigaŵa cikuru ca mpingo withu, tikwenera kuzakayowoya mwakudumura. Tingayowoya kuti: “Monire. Tikupeleka nchemo iyi, yeneiyo yikupelekeka pa caru cose capasi. Namwe yinu iyi. Vinandi mupulikenge pa kapepara penepapo.” Yowoyani mwakukhuka. Usange mukupeleka nchemo iyi pa Cisulo panji pa Sabata, mungagaŵiraso magazini apo mphakwenelera.