Nkharo Iyo Yikucindika Ciuta
1. Kasi ŵanthu ŵakumanya kuti tili na ungano?
1 Ŵanthu ŵakutimanya para tili pa ungano wa cigaŵa. Kunyake ŵakupulika pa wayilesi, pa TV na mu nyuzipepara. Awo ŵakukhala kufupi na malo gha ungano ŵakuwona mabaji agho tikuvwara. Pasi apa pali fundo izo zingatovwira kuti ticindike Ciuta na nkharo yithu yiwemi para tili pa ungano.—1 Pet. 2:12.
2. Kasi tingacindika wuli Ciuta na ivyo tavwara para tili pa ungano?
2 Kuvwara Makora: Tikwenera kuvwara makora para tili pa ungano pera yayi. Kweni tikwenera kuvwara makora nyengo zose, kwali tikuluta ku msika, kukatembeya, panji ku malo ghanyake. Para tacita nthena, ŵanthu ŵawonenge kuti tikupambana na caru. Nangauli tingavwara umo tikuvwalira para tili pa ungano yayi, kweni tikwenera kuvwara mwanchindi. Awo ŵakutiwona ŵakwenera kupambaniska na awo Mbakaboni yayi. (Rom. 12:2) Tikwenera kuvwara baji kuti ŵanthu ŵamanye kuti tili na ungano, kuti ŵabali ŵatimanye na kupharazgira awo ŵatifumba.
3. Kasi tingalongora wuli nchindi na kuzikira?
3 Kuzikira na Nchindi: Pakuti mazuŵa ghano ŵanthu ŵanandi mbakujitemwa na ŵambura kuwonga, cikuŵa cakukondweska comene kuwona munthu uyo ngwakuzikira kweniso wanchindi. (2 Tim. 3:1-5) Para tikukhumba kusunga malo ghakuti tikhalepo panji para tili pa mzere kuti tipoke mabuku agho ghafuma sono, tikwenera kughanaghanira vya tekha pera yayi, kweni tikweneraso kughanaghanira ŵanyithu. (1 Kor. 10:23, 24) Munthu munyake, uyo kakaŵa kakwamba kwiza ku ungano wakati, “Palije nkhani yiliyose iyo nkhukumbuka, kweni ico nkhukumbuka ni nkharo yawo yiwemi.”
4. Cifukwa wuli tikwenera kujipeleka kuteŵetera pa ungano wa cigaŵa para tingafiska?
4 Kujipeleka: Ŵakhristu ŵaunenesko ŵakumanyikwa na mzimu wakujipeleka. (Sal. 110:3) Kasi mwamujipeleka kuti mukawovwire pa ungano wa cigaŵa? Pa ungano unyake, ŵabali na ŵadumbu 600 ŵakajipeleka kuti ŵanozge malo gha ungano pambere undacitike. Ŵeneko ŵa malo agha ŵakati: “Ici nchakukondweska comene. Nkhakwamba kuwona ŵanthu kucita nthena. Ungagomezga yayi kuti wose aŵa ŵajipeleka waka kucita nchito iyi.” Tikulindilira mwakunweka ungano wa cigaŵa wa caka cino. Tizamuŵa na mwaŵi wakutegherezga, kusambira na kucindika Ciuta.
[Bokosi pa peji 6, 7]
Ivyo Tikwenera Kukumbuka pa Ungano wa Cigaŵa
◼ Nyengo ya Ungano: Sumu zaving’wenyeng’wenye zizamwamba 8:20 mulenji mazuŵa ghose ghatatu. Para sumu izi zayamba, tose tizakakhale pasi. Zuŵa lakwamba na laciŵiri, ungano uzamumara 3:55 mise, ndipo zuŵa lacitatu uzamumara 2:45.
◼ Malo Ghakwimikapo Vyakwendera: Pazamuŵa malo ghakukwana ghakwimikapo magalimoto na njinga. Tikupempha ŵeneko ŵa magalimoto na njinga kuti ŵazakapulikire ŵalinda awo ŵazamuŵa pa malo agha. Ŵazakawoneseske kuti ŵakiya galimoto panji njinga zawo pambere ŵandalute kukakhala pasi.
◼ Kusunga Malo: Mungazakasunga malo gha awo mukwenda nawo mu galimoto yinu, awo mukukhala nawo na awo mukusambira nawo Baibolo.—1 Kor. 13:5.
◼ Cakurya ca Muhanya: Muzakayeghe cakurya ca muhanya m’malo mwa kuzakafumapo pa malo gha ungano kuti mukapenje cakurya. Mungazakayegha chipisi, mpunga, mboholi, mayawu, na vyakumwa. Moŵa ukuzomerezgeka yayi pa malo gha ungano.
◼ Vyakupeleka: Tikulongora kuti tikuwonga ivyo vyanozgeka pa ungano para tikupeleka vyawanangwa ivyo vikovwira pa nchito ya pa caru cose. Usange munthu wakukhumba kupeleka ceke pa ungano wa cigaŵa, wazakalembe pa ceke kuti ndalama zipelekeke ku “Association of Jehovah’s Witnesses of Malawi.”
◼ Ngozi: Usange pacitika ngozi pa ungano, kumanani na mulinda uyo wali pafupi. Mwaluŵiro mulinda wamuphalira Dipatimenti ya Cipatala mwakuti awo ŵali mu Dipatimenti iyi ŵawone umo ngozi iyo yiliri, kuti ŵawovwirepo.
◼ Awo Ŵali na Suzgo la Kupulika: Ungano uzamung’anamulika mu ciyowoyero ca mawoko pa maungano agho ghazamucitikira ku Blantyre, Kasungu, Lilongwe, Luchenza, Magawa, Mangochi, Mzuzu, Nkhata Bay, Songani na malo ghanyake. Pa maungano agha, pazamuŵa cipharazgo cakukhwaskana na nkhani iyi pa zuŵa lakudanga la ungano, cigaŵa ca mulenji.
◼ Vyakuphakaphaka: Nchiwemi kucepeskako vyakuphakaphaka panji perefyumu. Ŵabali na ŵadumbu ŵanyake thupi lawo likukolerana yayi na sungu lankhongono comene.—1 Kor. 10:24.
◼ Kutepa Nkhani: Lekani kujoyina nthambo za wayilesi ya kaseti ku magesi gha pa malo gha ungano panji ku vyakukuzgira mazgu. Para muzamutepa, kuzakatimbanizga ŵanyinu yayi.
◼ Kujambura Vithuzithuzi: Usange muzamujambura vithuzithuzi pa nyengo ya ungano, kamera yinu yizakaleke kumulika pakujambura.
◼ Selufoni: Muzakacune foni yinu kuti yizakaleke kutimbanizga ungano.
◼ Fomu ya Weleraniko kwa Munthu Uyu (S-43): Muzakalembe mazina gha awo ŵazamunweka para mwaŵapharazgira pa nyengo ya ungano pa fomu ya Weleraniko kwa Munthu Uyu. Mafomu agho muzamulemba muzakapeleke ku dipatimenti ya Mabuku kuti ŵamanye kwakuluta nagho. Panji muzakapeleke kwa mulembi wa mpingo winu para mwawera ku ungano.
◼ Uteŵeti Wakujipeleka: Tizamuŵa na cimwemwe cikuru para tizamujipeleka kovwirapo milimo yinyake pa ungano wa cigaŵa. (Mil. 20:35) Usange mukukhumba kuzakacita ntheura, muzakalute ku Dipatimenti ya Uteŵeti Wakujipeleka. Ŵana awo ŵandakwaniske vilimika 16 nawo ŵangateŵetera usange ŵagwilirenge lumoza na mupapi wawo panji mulara waliyose uyo wazomerezgeka na mupapi wawo.