Tizamusamphuskika Mwauzimu Mazuŵa Ghatatu
1. Kasi tikulindilira vinthu wuli pa ungano wa cigaŵa wa cilimika cino?
1 Mu caru ca Satana ici, umo muli cilangalanga cauzimu, Yehova wakulutilira kusamphuska ŵateŵeti ŵake. (Yes. 58:11) Nthowa yimoza iyo Yehova wakutisamphuskira ni ungano wa cigaŵa uwo ukuŵako cilimika cilicose. Apo ungano wa cigaŵa wa cilimika cino ukusendelera, kasi tinganozgekera wuli kuti tizakasamphuskike mwauzimu na kusamphuskaso ŵanji?—Zinth. 21:5.
2. Kasi tikwenera kucita vici pakunozgekera ungano?
2 Usange mundambe kunozgekera, yambanipo sono na kulayilirathu ku nchito kuti muzakaŵepo mazuŵa ghose ghatatu. Kasi mwaghanaghanirapo nyengo yakwendera pakuluta ku ungano zuŵa lililose, mwakuti mukafikenge luŵiro na kukhala pasi pambere ungano undambe? Tingatemwa yayi kuzakakhala nanga ni zuŵa limoza pera, cifukwa tikukhumba kuzakakhozgeka na cakurya cauzimu ico Yehova watinozgera! (Yes. 65:13, 14) Kasi mwaghanaghanirapo kale za mendero na kwakugona?
3. Ni fundo wuli izo ŵamumbumba ŵangalondezga mwakuti ŵazakasange candulo na ungano?
3 Nchivici cingazakamovwirani kuti maghanoghano ghinu ghazakaŵe pa ivyo vizamuyowoyeka pa ungano? Usange nchamacitiko, muzakagonenge mwakukwana usiku uliwose. Muzakalaŵiskenge kwa muyowoyi. Namwe muzakaŵazgenge mu Baibolo linu para wakuŵazga malemba. Muzakalembenge fundo mwakudumura. Cingaŵa ciwemi kuti ŵamumbumba ŵazakakhale pamoza mwakuti ŵapapi ŵazakawovwirenge ŵana ŵawo kutegherezga ungano. (Zinth. 29:15) Mise yiliyose mungazakadumbiskana na mbumba yinu fundo zikuru izo mwapulika pa ungano. Kuti mbumba yinu yilutilire kusamphuskika para ungano wamara, pa Nyengo Yakusopera ya Mbumba mungadumbiskana fundo izo mukapulika ku ungano na kuwona umo mungazilondezgera.
4. Kasi tingawovwira wuli ŵanyithu mu mpingo kuti nawo ŵasamphuskike mwauzimu?
4 Wovwirani Ŵanyinu Kuti Ŵasamphuskike: Tikukhumba kuti ŵanyithu nawo ŵasamphuskike mwauzimu. Kasi mu mpingo winu muli ŵapharazgi ŵacekuru awo ŵangakhumbikwira wovwiri kuti ŵakaŵepo pa ungano wa cigaŵa? Kasi mungakwaniska kuŵawovwira? (1 Yoh. 3:17, 18) Ŵalara, comenecomene ŵalaŵiliri ŵa magulu ŵakwenera kuwoneseska kuti ŵapharazgi aŵa ŵawovwirika.
5. Kasi tizamugaŵira wuli tumapepara twakucemera ŵanthu ku ungano? (Wonani bokosi pa peji 5.)
5 Nga umo vikuŵira nyengo zose, masabata ghatatu pambere ungano undambe, tizamucemera ŵanthu ku ungano wa cigaŵa. Mpingo ukwenera kuŵa na cilato cakuti ugaŵire tumapepara tose mu cigaŵa cikuruko ca mpingo wawo. Kweni para tumapepara twakhalapo, muzakalute nato ku ungano. Tumapepara utu tizamucemera ŵanthu awo takumana nawo mwamwaŵi uko tamucitira ungano. Usange tumapepara uto twakhalapo mbumba yinu yingakwaniska yayi kukagaŵira ŵanthu uko kwamucitikira ungano, pelekani kwa mulinda pa zuŵa lakwamba la ungano. Pa ungano, ŵamutiphalira umo tingacitira pakugaŵira tumapepara utu.
6. Kasi tingasamphuska wuli ŵanyithu na nkharo yithu yiwemi?
6 Nkharo Yiwemi Yikusamphuska: Mazuŵa ghano, apo ŵanthu ŵanandi ‘mbakujitemwa’ na ŵambura kughanaghanira ŵanyawo, nchakusamphuska kuŵa pamoza na Ŵakhristu ŵanyithu awo ŵakuyezgayezga kuŵa na nkharo yiwemi. (2 Tim. 3:2) Tingalongora nkharo yiwemi para tikufika pa malo gha ungano mwanchindi na kusunga malo gha ŵekha awo tenda nawo mu galimoto yithu, awo tikukhala nawo, panji awo tikusambira nawo Baibolo. Tikwenera kupulikira ceyamani para watipempha kuti tikhale pasi na kutegherezga sumu pambere cigaŵa cilicose cindambe. Tikulongora kuti tili na nkharo usange tacunirathu selufoni mwakuti tileke kutimbanizga ŵanji. Kweniso ni nkharo yayi kuyowoyeskana, kulemba panji kuŵazga mauthenga pa selufoni, kurya, panji kwendendeka uku ungano uli mukati.
7. Kasi tingacita wuli kuti tisamphuskike na kusamphuskaso ŵabali ŵithu?
7 Nchezgo Zakusamphuska: Maungano gha cigaŵa ghakutipa mwaŵi kuti tisangwe na umoza withu Wacikhristu. (Sal. 133:1-3) Uwu ni mwaŵi winu kuti “musanuzge” ubali apo mukukumana na ŵapharazgi ŵa mipingo yinyake. (2 Kor. 6:13) Panji mungaŵa na cilato cakuti zuŵa lililose mumanyane na munthu yumoza panji mbumba yimoza. Pakupumura muhanya, mukuŵa na mwaŵi wakuti mumanye ŵanthu. Ntheura muzakayeghe cakurya kuti muzakaryenge uku mukucezga na ŵanji pa malo gha ungano m’malo mwa kufumapo na kukarya ku resitiranti. Para muzamucita nthena, muzamusanga ŵabwezi ŵanadi.
8. Cifukwa wuli tikwenera kujipeleka kucitako milimo pa ungano, ndipo tingacita wuli?
8 Cikuŵa cakusamphuska comene kuteŵeta pamoza na ŵasopi ŵanyithu! Kasi mungajipeleka yayi kuti movwire mu dipatimenti panji kovwira mpingo winu pa mulimo wa kutozga malo? (Sal. 110:3) Usange mulije mulimo uliwose pa ungano, muzakalute ku Dipatimenti ya Uteŵeti Wakujipeleka. Usange ŵanandi ŵajipeleka, mulimo ukunozga ndipo ukuŵa upusu.
9. Cifukwa wuli nkharo yithu na kawonekero kithu ni vyakuzirwa comene pa ungano?
9 Nkharo Yithu Yikusamphuska Awo Ŵakutiwona: Tikuŵa ŵalendo ŵa ungano mazuŵa ghose ghatatu, kwali ungano uli mukati kwali yayi. Awo ŵakutiwona mu cigaŵa ico mukucitikira ungano ŵakwenera kuwona kuti Ŵakaboni ŵa Yehova mbakusamphuska ndipo ŵakupambana na ŵanthu ŵanyake. (1 Pet. 2:12) Tikwenera kucindika Yehova na kavwaliro kweniso kawonekero kithu pa ungano, uko tikugona, na ku resitiranti. (1 Tim. 2:9, 10) Usange tizamuvwaranga mabaji gha ungano nyengo zose, ŵanthu ŵazamutimanya luŵiro, nakuti tingazakaŵa na mwaŵi wa kuŵacemera ku ungano na kuŵapharazgira.
10. Kasi tingacita wuli kuti awo ŵakugwira nchito uko tikugona panji ku resitiranti ŵawonenge ungano mwakwenelera?
10 Kasi tingasamphuska wuli awo ŵakugwira nchito uko tikugona panji ku resitiranti? Tingaŵasamphuska usange tingaleka kusungiska vipinda vinandi kujumpha ivyo tikukhumbikwira nadi, cifukwa ŵanyithu ŵangatondeka kusanga pakugona. Nakuti cingaŵa cinonono kuti ŵeneko ŵa malo ŵasange ŵanthu awo ŵanganjira mu malo agho tikasungiska, ntheura tingaŵatayiska ndalama. Usange ŵanthu mbanandi pa nyengo iyo tikunjira panji kufuma mu malo agho tikugona, tizikire, ndipo tiŵe ŵanchindi. (Kol. 4:6) Ndiposo tikwenera kuŵapako kacoko awo ŵakupeleka vyakurya mu resitiranti, awo ŵakutipokelera na awo ŵakutinozgera malo uko tikugona kweniso ŵanji awo ŵakutovwira.
11. Pali ukaboni wuli wakuti nkharo yithu pakuŵa Ŵakhristu yikovwira kuti tiŵe na lumbiri luwemi?
11 Kasi ŵanthu ŵakughanaghana vici para ŵawona umo tikucitira mwankharo pa nyengo ya ungano? Mu nyuzipepara yinyake mukalembeka ivyo wakayowoya bwana wa pa malo agho pakacitikira ungano, wakati: “Ŵanthu aŵa mbanchindi, ndipo tikukondwa kuŵa nawo cilimika cilicose.” Cilimika camara, munthu wakataya kacikwama ka ndalama mu hotelo iyo mukagonanga awo ŵakiza ku ungano wa cigaŵa. Ŵakati ŵapeleka kacikwama aka na vyose ivyo vikaŵamo kwa bwana wa hotelo iyi, bwana wakaphalira mweneco kuti: “Wacita mwaŵi kuti Ŵakaboni ŵa Yehova ŵakaŵa na ungano pafupi waka, ndipo ndiwo ŵanguzura mu hotelo iyi. Kuŵavyenge ŵanthu aŵa mphanyi kacikwama kako kandasangike.”
12. Apo maungano ghakhala pacoko kwamba, kasi tikwenera kuŵa na cilato wuli, ndipo cifukwa wuli?
12 Kwakhala pacoko kuti maungano gha cilimika cino ghambe. Paŵa nchito yikuru ya kunozga nkhani na malo ghakucitirapo ungano mwakuti tikasamphuskike. Mphanyi cilato cinu caŵa cakuti mukaŵepo mazuŵa ghose ghatatu na kunozgekera kukapulika ivyo Yehova na gulu lake ŵatinozgera. Ŵikanipo mtima kuti mukasamphuske ŵanji na nkharo yinu yiwemi kweniso nchezgo yakukondweska. Para mucitenge nthena, imwe na ŵanyinu muzamujipulika nga njumoza wa awo ŵakiza pa ungano cilimika camara, uyo wakalemba kuti: “Ungano wangunozga uwu!”
[Mazgu Ghakukhozgera pa peji 3]
Nga umo vikuŵira nyengo zose, masabata ghatatu pambere ungano undambe, tizamucemera ŵanthu ku ungano wa cigaŵa
[Mazgu Ghakukhozgera pa peji 4]
Tikwenera kucindika Yehova na kavwaliro kweniso kawonekero kithu pa ungano, uko tikugona, na ku resitiranti
Ŵikanipo mtima kuti mukasamphuske ŵanji na nkharo yinu yiwemi kweniso nchezgo yakukondweska
[Box on pages 5, 6]
Ivyo Tikwenera Kukumbuka pa Ungano wa Cigaŵa
◼ Nyengo ya Ungano: Nyengo yakwambira ungano mazuŵa ghose ghatatu ni 8:20 mulenji. Para kwakhala maminiti ghacoko kuti cigaŵa ca mulenji panji ca muhanya ciyambe, ceyamani wazamukhala pa pulatifomu uku sumu zikwimba. Panyengo iyi, tose tizakakhale pasi kuti ungano uzakambe makora. Pa zuŵa lakwamba na laciŵiri ungano uzamumara pa nyengo ya 4:05 mise. Kweni pa zuŵa lacitatu uzamumara pa nyengo ya 2:50 mise.
◼ Malo Ghakwimikapo Vyakwendera: Pazamuŵa malo ghakukwana ghakwimikapo magalimoto na njinga. Tikupempha ŵeneko ŵa magalimoto na njinga kuti ŵazakapulikire ŵalinda awo ŵazamuŵa pa malo agha. Ŵazakawoneseske kuti ŵakiya galimoto panji njinga zawo pambere ŵandalute kukakhala pasi.
◼ Kusunga Malo: Mungazakasunga malo gha ŵanyinu awo mukwenda nawo mu galimoto yinu panji awo mukukhala nawo. Mungasungiraso awo mukusambira nawo Baibolo.—1 Kor. 13:5.
◼ Cakurya ca Muhanya: Muzakayeghe cakurya ca muhanya m’malo mwa kuzakafumapo pa malo gha ungano kuti mukapenje cakurya. Mungazakayegha cakurya ico ŵanandi ŵakurya pa nyengo ya kupumura nga ni chipisi, mpunga, mboholi, mayawu, na vyakumwa. Vyakuloŵezga vikuzomerezgeka yayi pa malo gha ungano.
◼ Vyakupeleka: Tingalongora kuti tikuwonga ivyo vyanozgeka pa ungano mwa kupeleka vyawanangwa ivyo vikovwira pa nchito ya pa caru cose. Vyawanangwa ivi tingapeleka pa Nyumba ya Ufumu panji pa ungano wa cigaŵa. Usange munthu wakukhumba kupeleka ceke pa ungano wa cigaŵa, wazakalembe pa ceke kuti ceke ici cipelekeke ku “Watch Tower Society.”
◼ Ngozi: Usange pacitika ngozi pa ungano, kumanani na mulinda uyo wali pafupi. Mwaluŵiro mulinda wamuphalira Dipatimenti ya Cipatala mwakuti awo ŵali mu Dipatimenti iyi ŵawone umo ngozi iyo yiliri, kuti ŵawovwirepo.
◼ Awo Ŵali na Suzgo la Kupulika: Ungano uzamung’anamulika mu ciyowoyero ca mawoko pa maungano gha Cingelezi agho ghazamucitikira ku Lilongwe na ku Blantyre. Pazamuŵa cipharazgo cakukhwaskana na maungano agha pa zuŵa lakudanga la ungano, ku cigaŵa ca mulenji.
◼ Kutepa Nkhani: Lekani kujoyina nthambo za wayilesi ya kaseti ku magesi gha pa malo gha ungano panji ku vyakukuzgira mazgu. Para muzamutepa, muzakaleke kutimbanizga ŵanyinu.
◼ Kuwelerako ku Ŵakunweka: Muzakalembe mazina gha awo ŵazamunweka cifukwa ca kuŵapharazgira mwamwaŵi pa nyengo ya ungano wa cigaŵa pa fomu ya Weleraniko kwa Munthu Uyu. (S-43) Ŵapharazgi ŵize na fomu yimoza panji ghaŵiri ku ungano wa cigaŵa. Mafomu agho muzamulemba muzakapeleke ku dipatimenti ya Cipinda ca Mabuku kuti ŵamanye kwakuluta nagho, panji muzakapeleke kwa mulembi wa mpingo winu para mwawera ku ungano wa cigaŵa.—Wonani Uteŵeti Withu wa Ufumu wa Julayi 2010, peji 6.
◼ Kujambura Vithuzithuzi: Usange muzamujambura vithuzithuzi, kamera yinu yizakaleke kumulika pakujambura pa nyengo ya ungano.
◼ Selufoni: Muzakacune maselufoni ghinu mwakuti ghazakaleke kutimbanizga ungano.
◼ Uteŵeti Wakujipeleka: Cimwemwe cithu pa ungano wa cigaŵa cizamusazgikira para tizamujipeleka kovwirapo milimo yinyake. (Mil. 20:35) Usange mukukhumba kuzakacita ntheura, muzakalute ku Dipatimenti ya Uteŵeti Wakujipeleka. Ŵana awo ŵandakwaniske vilimika 16 nawo ŵangateŵetera usange ŵagwilirenge lumoza na mupapi wawo panji mulara waliyose uyo wazomerezgeka na mupapi wawo.
[Bokosi pa peji 5]
Kasi Tizamucita Wuli Pakucema Ŵanthu?
Kuti tizakagaŵire tumapepara mu cigaŵa cikuruko ca mpingo withu, tikwenera kuzakayowoya mwakudumura. Tingayowoya kuti: “Monire. Tikupeleka nchemo iyi, yeneiyo yikupelekeka pa caru cose capasi. Namwe yinu iyi. Vinandi mupulikenge pa kapepara.” Peji lakwamba ndakukopa, ntheura para mukupeleka, munthu wakwenera kuliwona peji ili. Khukani pakuyowoya. Usange mukupeleka nchemo iyi pa Cisulo panji pa Sabata, mungagaŵiraso magazini para nchakwenelera.