Maungano gha Cigaŵa Ni Nyengo Yakukondweska Yakusopera
1. Kasi viphikiro ivyo Ŵaisrayeli ŵakacitanga vikuyana wuli na maungano gha cigaŵa agho ghakucitika sono?
1 Cilimika cilicose, Yosefe, Mariya, ŵana ŵawo ndiposo ŵanthu ŵanyake ŵakalutanga ku Yerusalemu kukaŵapo pa ciphikiro. Pa nyengo iyi, iwo na ŵanji awo ŵakasopanga nawo ŵakaluwangako dankha masuzgo ghawo gha zuŵa na zuŵa ndipo ŵakaŵikanga mtima pa vinthu vyauzimu ivyo ni vyakuzirwa pa umoyo wawo. Viphikiro vikaŵapanga nyengo yiwemi ya kughanaghanira ndiposo kudumbiskana vya uwemi wa Yehova ndiposo kusambira Dango lake. Maungano gha cigaŵa agho ghakwiza ghazamutipa mwaŵi wakuti tizakasangwe pakusopa Yehova.
2. Kasi tikwenera kucitaci kuti tinozgekere ungano wa cigaŵa uwo ukwiza?
2 Kunozgekera Nkhwakukhumbikwa: Ŵa mu mbumba ya Yesu ŵakeneranga kwenda ulendo wa makilomita 200 kufuma ku Nazarete kufika ku Yerusalemu. Mtunda uwu ukusazgapo kuluta na kuwera. Nangauli tikumanya yayi unandi wa ŵanung’una ndiposo ŵadumbu ŵa Yesu, kweni tingawona kuti Yosefe na Mariya ŵakenera kunozgekera comene. Kasi mwanozgekera mwakukwana kuti muzakaŵepo mazuŵa ghose ghatatu gha ungano wa cigaŵa uwo ukwiza? Ici cingakhumbikwira kuti mupemphe holide ku nchito panji kumanyiska abwana ŵinu ndiposo asambizgi ŵa mwana winu kuti muzamuŵa na ungano. Kasi mwasanga malo ghakukagona usange nchakukhumbikwa? Kasi mungawovwirapo munyake mu mpingo winu uyo wangakhumbikwira wovwiri wapadera kuti wazakalute ku ungano?—1 Yoh. 3:17, 18.
3. Kasi viphikiro ivyo Ŵaisrayeli ŵakacitanga vikapelekanga wuli mwaŵi wa kukhozgana?
3 Tizamukhozgana: Pa viphikiro ivyo vikacitikanga, Ŵayuda ŵakaŵanga na mwaŵi wa kukhozgana na awo ŵakasoperanga lumoza. Mwambura kukayika, ŵa mu mbumba ya Yesu ŵakanwekanga kukawonana na ŵabwezi ŵawo ŵakale. Ŵakaŵangaso na mwaŵi wa kusanga ŵabwezi ŵaphya pakati pa Ŵayuda ndiposo ŵanji awo ŵakang’anamukira ku Ciyuda awo ŵakaŵangapo pa ciphikiro panji awo ŵakalongozgananga nawo pakuluta panji pakuwera ku Yerusalemu.
4. Kasi tingalongora wuli kuti tikuzirwiska ubali withu Wacikhristu?
4 Cifukwa cimoza ico muzga wakugomezgeka na wakucenjera wakunozgera kuti tiwunganenge pamoza na kutegherezga nkhani pa maungano gha cigaŵa m’malo mwa kuzilemba waka kuti munthu waliyose waŵazgenge payekha nchakuti tikhozganenge. (Heb. 10:24, 25) Ntheura nozgekerani kuti muzakafikenge mwakutendekera pa ungano zuŵa lililose mwakuti muzakacezge na ŵanyinu pambere ceyamani wa cigaŵa wandambiske sumu zaving’wenyeng’wenye, ico nchimanyikwiro cakuti tikhale pasi. M’malo mwa kuwukapo pa nyengo yakupumulira kuti tikapenje cakurya, tose tikuciskika kuti tizakayegherethu cakurya ca muhanya, na kukhala pa malo gha ungano mwakuti tizakakumane na kucezga na ŵabali ŵithu. Ubali withu Wacikhristu nchawanangwa cakufuma kwa Yehova, ico tikwenera kucizirwiska comene.—Mika 2:12.
5. Kasi nchivici cingatovwira kuti tizakasange candulo na ungano?
5 Nyengo Yakusambira: Kufuma pa wanici, Yesu wakasangirangapo mwaŵi pa viphikiro kuti wasambire vya Ŵadada ŵake ŵakucanya. (Luka 2:41-49) Kasi nchivici cizamutovwira ise ndiposo mbumba zithu kuti tizakasange candulo na nkhani izo zizamuyowoyeka? Para nkhani zikuyowoyeka, tizakeleke kwendendeka na kuphwepwerezgana. Lekani kuzomerezga kuti selufoni panji vinthu vinyake vizakamutimbanizgani panji kutimbanizga ŵanji. Muzakalaŵiskenge muyowoyi na kulemba fundo zakudumura. Khalani pamoza na mbumba yinu mwakuti muzakawoneseske kuti ŵana ŵinu nawo ŵakutegherezga. Namise para mwawera, muzakapature nyengo ya kudumbiskana fundo zakukondweska.
6. Kasi tikwenera kukumbuka vici pa nkhani ya kavwaliro na kujitozga?
6 Kuvwara na Kujitozga: Ŵamalonda awo ŵakendanga mu misewu ŵakamanyanga mbumba ya Yesu ndiposo Ŵayuda ŵanyake apo ŵakalutanga na kuwera ku viphikiro cifukwa ŵakaŵa na malaya agho ghakaŵanga na mphonje mumphepete ndiposo kamkhuzi ka buluu pacanya pa mphonje. (Ŵeru. 15:37-41) Nangauli Taŵakhristu tikuvwara malaya ghapadera yayi, kweni tikumanyikwa cifukwa ca kujitozga makora ndiposo kuvwara mwanchindi. Tikwenera kupwelelera umo tikuwonekera para tikuluta ndiposo kuwera ku ungano ndiposo para tili ku cigaŵa ico kukucitikira ungano. Nanga ni para tasintha malaya pamanyuma pa pulogiramu, tikwenera kulutilira kuwoneka makora ndiposo kuvwara baji la ungano. Para tacita nthena, tiwonekenge ŵakupambana na ŵanthu awo Mbakaboni yayi ndipo tiŵenge ciyelezgero ciwemi ku ŵanji.
7. Cifukwa wuli tikwenera kuzakajipeleka kucita milimo yinyake pa ungano?
7 Ŵanchito Ŵakujipeleka Ŵakukhumbikwa: Ŵanchito ŵanandi ŵakukhumbikwa kuti ungano ukende makora. Kasi mungajipeleka kuti mukawovwirepo? (Sal. 110:3) Mulimo uwo ukucitika pa maungano nchigaŵa ca uteŵeti wakupatulika ndipo mbupharazgi ukuru. Bwana wa malo ghanyake agho ŵakacitirapo ungano wakakondwa comene na ŵabali ŵakujipeleka awo ŵakatozga malo agho, mwakuti wakalemba kuti: “Nkhukhumba kumuwongani cifukwa ca cakucitika cakukondweska ico nindaciwonepo. Kanandi napulikanga kuti Ŵakaboni ŵa Yehova mbanthu ŵa lumbiri luwemi comene cifukwa nyengo zose ŵakuleka malo agho ŵacitirapo ungano ghakutowa kuluska umo ŵakaghasangira. Imwe ndiposo gulu linu mwapanga malo agha kuŵa ghawemi comene mu cigaŵa cino ndipo ŵanthu awo ŵacita ivi mbankharo yiwemi comene awo nkhaŵa nindaŵawonepo kawiro kane kose.”
8. Kasi tizamuŵa na mwaŵi wuli wa kupharazgira ŵanji awo ŵakukhala mu cigaŵa ico kwamucitikira ungano?
8 Mwaŵi Wakuti Tizakapharazge: Ŵanandi awo ŵakukhala ku cigaŵa ico kwamucitikira ungano ŵazamuwona ŵalendo ŵanandi ŵavwara mabaji ndipo ŵakuwoneka makora. Ici cingaŵapangiska kuti ŵanweke, ndipo ungaŵa mwaŵi withu kuti tiŵaphalire vya ungano. Mwana munyake wa vilimika vinayi wakiza na buku liphya ilo wakapokera pa ungano na kulilongora kwa mwanakazi uyo wakapelekeranga vyakurya ku resitiranti. Ici cikapeleka mwaŵi kwa ŵapapi ŵa mwana uyu kuti ŵacemere mwanakazi uyu ku ungano.
9. Pa nkhani ya kuzirwiska vinthu vyauzimu, kasi tingalondezga wuli ŵa mu mbumba ya Yesu?
9 Viphikiro vya mu nyengo yakale vikaŵanga vyakukondweska comene mwakuti Ŵayuda awo ŵakatemwanga vinthu vyauzimu ŵakalindiliranga mwakunweka kuzakaŵapo. (Dute. 16:15) Ŵa mu mbumba ya Yesu ŵakakondwanga comene nangauli ŵakajinoranga vinthu vinyake mwakuti ŵakasangikepo ndiposo kwandula. Nase tikuzirwiska comene maungano ghithu gha cigaŵa, tikughawona kuti nchawanangwa cakufuma kwa Dada withu wakucanya. (Yak. 1:17) Sono ni nyengo yakuti tinozgekere ungano uwu, uwo ukucitika cilimika cilicose mwakuti tizakasangwe kusopa Yehova.
[Bokosi pa peji 6]
Ivyo Tikwenera Kukumbuka pa Ungano wa Cigaŵa
◼ Nyengo ya Ungano: Nyengo yakwambira ungano wa mazuŵa ghose ghatatu ni 8:20 namlenji. Para kwakhala maminiti ghacoko kuti cigaŵa ca mulenji panji ca muhanya ciyambe, ceyamani wazamukhala pa pulatifomu uku sumu zaving’wenyeng’wenye zikwimba. Tose tizakakhale pasi kuti ungano uzakambe makora. Pa zuŵa lakwamba ungano uzamumara pa nyengo ya 4:25 namise, zuŵa laciŵiri uzamumara nyengo ya 3:55 namise, kweni zuŵa lacitatu uzamumara nyengo ya 2:40 namise.
◼ Malo Ghakwimikapo Vyakwendera: Pa ungano uwu pazamuŵa malo ghakwimikapo magalimoto na njinga. Tikupempha ŵeneko ŵa magalimoto na njinga kuti ŵazakapulikire ŵalinda awo ŵazamuŵa pa malo agha. Ŵazakawoneseske kuti ŵakiya galimoto panji njinga zawo pambere ŵandalute kukakhala pasi.
◼ Kusunga Malo: Mungazakasunga malo gha ŵanyinu awo mukwenda nawo mu galimoto yinu panji awo mukukhala nawo. Mungasungiraso awo mukucita nawo sambiro la Baibolo.—1 Kor. 13:5.
◼ Cakurya ca Muhanya: Muzakayeghe cakurya ico muzamurya pa nyengo ya kupumura ya muhanya m’malo mwa kuzakafumapo pa malo gha ungano kuti mukapenje cakurya. Mungazakayegha cakurya ico ŵanandi ŵakurya pa nyengo ya kupumura nga ni buledi, chipisi, mabisiketi, vipasi, mpunga, mboholi, mayawu, skaŵa zakukazinga, na vyakumwa. Phere likuzomerezgeka yayi pa malo gha ungano.
◼ Vyakupeleka: Kuti ungano wa cigaŵa ucitike pakukhumbikwira ndalama zinandi. Tingalongora kuwonga mwa kupeleka vyawanangwa ivyo vikovwira pa nchito ya pa caru cose. Vyawanangwa ivi tingapeleka pa Nyumba ya Ufumu panji pa ungano wa cigaŵa. Usange munthu wakukhumba kupeleka ceke pa ungano wa cigaŵa, wazakalembe pa ceke kuti “Watch Tower.”
◼ Ngozi: Usange pacitika ngozi pa ungano, kumanani na mulinda uyo wali pafupi. Mulinda ndiyo wamuphalira luŵiro Dipatimenti ya Cipatala mwakuti awo ŵali mu Dipatimenti iyi ŵawone umo ngozi iyo yiliri kuti ŵawovwirepo.
◼ Awo Ŵali na Suzgo la Kupulika: Ungano uzamung’anamulika mu ciyowoyero ca mawoko ca ku America pa maungano gha Cingelezi agho ghazamucitikira ku Lilongwe na ku Blantyre. Pazamuŵa cipharazgo cakukhwaskana na maungano agha pa zuŵa lakudanga la ungano, ku cigaŵa ca mulenji.
◼ Kutepa Nkhani: Lekani kujoyina nthambo za wayilesi ya kaseti ku magesi gha pa malo gha ungano panji ku vyakukuzgira mazgu. Para muzamutepa, muzakaleke kutimbanizga ŵanyinu.
◼ Kuwelerako ku Ŵakunweka: Muzakalembe mazina gha awo ŵazamunweka cifukwa ca kuŵapharazgira mwamwaŵi pa nyengo ya ungano wa cigaŵa pa fomu ya Weleraniko kwa Munthu Uyu. (S-43-TB) Ŵapharazgi ŵize ku ungano wa cigaŵa na fomu yimoza panji ghaŵiri. Mafomu agho muzamulemba muzakapeleke ku dipatimenti ya Cipinda ca Mabuku kuti ŵamanye kwakuluta nagho, panji muzakapeleke kwa mulembi wa mpingo winu para mwawera ku ungano wa cigaŵa.
◼ Kujambura Vithuzithuzi: Usange muzamujambura ŵanthu, kamera yinu yizakaleke kumulika pakujambura pa nyengo ya ungano.
◼ Selufoni: Cunani selufoni zinu mwakuti zizakaleke kupanga congo.
◼ Uteŵeti Wakujipeleka: Cimwemwe cithu pa ungano wa cigaŵa cizamusazgikira para tizamujipeleka kovwirapo milimo yinyake. (Mil. 20:25) Usange mukukhumba kuzakacita ntheura, muzakalute ku Dipatimenti ya Uteŵeti Wakujipeleka. Ŵana awo ŵandakwaniske vilimika 16 nawo ŵangateŵetera usange ŵagwirenge lumoza na mupapi wawo panji mulara waliyose uyo wazomerezgeka na mupapi wawo.