“Sungilirani Makhaliro Ghinu Ghawemi Pakati pa Mitundu”
1. Cifukwa wuli tikwenera kuŵa na nkharo yiwemi pa ungano wa cigaŵa?
1 Ŵanthu ŵakutimanya para tili na ungano wa cigaŵa. Ipo nkharo yithu yikwenera kukolerana na Ciuta uyo tikusopa. (Lev. 20:26) Nkharo yithu, vyakuvwara vithu, na umo tikujitozgera, vikwenera kulongora kuti ndise Ŵakhristu ŵaunenesko. Kasi para tili pa ungano wa cigaŵa ‘tingasungilira wuli makhaliro ghawemi pakati pa mitundu’ na kucindika Ŵadada ŵithu ŵakucanya?—1 Pet. 2:12.
2. Kasi pa ungano wa cigaŵa tikwenera kulongora mikhaliro wuli?
2 Longorani Mikhaliro Yacikhristu: Citemwa ico tikulongorana na umo tikucitira na “ŵakuwaro,” vikupambana comene na umo caru cikucitira. (Kol. 3:10; 4:5; 2 Tim. 3:1-5) Tikwenera kuŵa ŵakuzikira pakucita vinthu na awo ŵakugwira nchito ku resitiranti na kulikose uko tili, nanga ni para vinthu vyabudika. Kweniso tikwenera kuŵawonga cifukwa ca ivyo ŵaticitira.
3. Kasi ŵapapi ŵakukumbuskika vici, ndipo cifukwa wuli?
3 Ŵapapi ŵakwenera kupwelelera ŵana ŵawo para ŵali pa malo gha ungano, ku resitiranti, panji uko ŵakugona. (Zinth. 29:15) Bwana wa resitiranti yinyake wakaphalira mbumba yinyake kuti: “Tikumutemwani mwa ŵanthu imwe. Ŵana ŵinu ŵali na nkharo yiwemi. Ŵanchito wose pano ŵakuyowoya vya imwe, ndipo tingatemwa kuti mwizenge sabata yiliyose.”
4. Cifukwa wuli tikwenera kuvwara makora para tili pa ungano wa cigaŵa?
4 Kuvwara Makora: Pa ungano wa cigaŵa tikwenera kuvwara makora, nga umo caru cikucitira yayi. (1 Tim. 2:9) Tikweneraso kuvwara makora panyengo yakupumura panji para tamutembeya. Usange ndimo ticitirenge, ticitenge soni yayi kuvwara baji panji kupharazga para mwaŵi wasangika. Para tizamuvwara makora na kulongora nkharo yiwemi pa ungano wa cigaŵa wa 2014, vingazakawovwira kuti ŵanthu ŵanyake ŵazomere uthenga withu. Kweniso tizamukondweska Yehova.—Zef. 3:17.
[Box on pages 3-4]
Ivyo Tikwenera Kukumbuka pa Ungano wa Cigaŵa wa 2014
◼ Nyengo ya Ungano: Sumu zaving’wenyeng’wenye zizamwamba 8:20 mulenji mazuŵa ghose ghatatu. Para sumu izi zayamba, tose tizakakhale pasi. Zuŵa lakwamba na laciŵiri, ungano uzamumara 3:55 mise, ndipo zuŵa lacitatu uzamumara 2:50.
◼ Maungano gha Mitundu Yose: Mu vyaru vinyake mwamucitikira maungano gha mitundu yose. Usange ŵapharazgi ŵangaluta ku ungano wa mitundu yose kwambura kucemeka, mbwenu malo ghakukhala ghamucepa. Usange mungakwaniska yayi kuluta ku ungano wa cigaŵa uwo mpingo winu ulutenge, kuluta ku ungano wa mitundu yose yayi.
◼ Malo Ghakwimikapo Vyakwendera: Pazamuŵa malo ghakukwana ghakwimikapo magalimoto na njinga. Tikupempha ŵeneko ŵa magalimoto na njinga kuti ŵazakapulikire ŵalinda awo ŵazamuŵa pa malo agha. Ŵazakawoneseske kuti ŵakiya galimoto panji njinga zawo pambere ŵandalute kukakhala pasi.
◼ Kusunga Malo: Para mwafika pa ungano, lekani kucimbilira kukhala pa malo agho mukutemwa cifukwa ca kopa kuti ŵanyinu ŵangakhalapo. Usange tili na mtima wakughanaghanira ŵanji, tizamupenja vithu pera yayi. Para tikucita nthena, awo ŵakutiwona ŵamanyenge kuti ndise Ŵakhristu ŵaunenesko ndipo ŵalumbenge Ciuta. (Yoh. 13:34, 35; 1 Kor. 13:4, 5; 1 Pet. 2:12) Mungazakasunga malo gha awo mukwenda nawo mu galimoto yinu, awo mukukhala nawo na awo mukusambira nawo Baibolo. Pali malo agho ghasungikira ŵacekuru na ŵalwari. Pakuti malo agha ngacoko, Ŵanji ŵangakhalangapo cara. Ŵangakhalapo pekha para ŵakupwelelera awo ŵali pa malo agha.
◼ Cakurya ca Muhanya: Muzakayeghe cakurya ca muhanya m’malo mwa kuzakafumapo pa malo gha ungano kuti mukapenje cakurya. Mungazakayegha chipisi, mpunga, mboholi, mayawu, na vyakumwa. Moŵa ukuzomerezgeka yayi pa malo gha ungano.
◼ Vyakupeleka: Tikulongora kuti tikuwonga ivyo vyanozgeka pa ungano para tikupeleka vyawanangwa ivyo vikovwira pa nchito ya pa caru cose. Usange munthu wakukhumba kupeleka ceke pa ungano wa cigaŵa, wazakalembe pa ceke kuti ndalama zipelekeke ku “Association of Jehovah’s Witnesses of Malawi.”
◼ Munkhwala: Usange mukumwa munkhwala cifukwa ca suzgo linyake, mukwenera kuwoneseska kuti mwayegha wakukwana, cifukwa pazamuŵavya pa malo gha ungano. Awo ŵakujilasa nyerete ya munkhwala wa shuga ŵakwenera kupwelelera uko ŵakutaya tuvisulo uto ŵajilasira. Ŵangatayanga mu nkhando panji mu mabini gha pa malo gha ungano yayi nesi uko ŵakugona.
◼ Ngozi: Mukwenera kuwoneseska kuti mugege ngozi cifukwa ca kutelemuka panji kukhuŵara. Caka cilicose ngozi zikucitika cifukwa ca skapato, comenecomene za hilu yitali. Nchiwemi kuvwara skapato zifupi izo mungenda nazo makora palipose.
◼ Awo Ŵali na Suzgo la Kupulika: Ungano uzamung’anamulika mu ciyowoyero ca mawoko pa maungano agho ghazamucitikira ku Blantyre, Kasungu, Lilongwe, Luchenza, Magawa, Mkanda, Mangochi, Mzuzu, Mnadzi, Nchalo, Nkhata Bay, Songani na malo ghanyake. Pa maungano agha, pazamuŵa cipharazgo cakukhwaskana na nkhani iyi pa zuŵa lakudanga la ungano, cigaŵa ca mulenji.
◼ Vyakuphakaphaka: Nchiwemi kucepeskako vyakuphakaphaka panji perefyumu. Ŵabali na ŵadumbu ŵanyake thupi lawo likukolerana yayi na sungu lankhongono comene.—1 Kor. 10:24.
◼ Fomu ya Weleraniko kwa Munthu Uyu (S-43): Muzakalembe mazina gha awo ŵakukhumba kumanya vinandi para mwaŵapharazgira pa nyengo ya ungano pa fomu ya Weleraniko kwa Munthu Uyu. Mafomu agho muzamulemba muzakapeleke ku dipatimenti ya Mabuku panji mukapeleke kwa mulembi wa mpingo winu para mwawera ku ungano.
◼ Resitiranti: Nkharo yithu yikwenera kucindika Yehova para tili mu resitiranti. Tikwenera kuvwara malaya agho ghakwenera Mkhristu.
◼ Selufoni: Muzakacune foni yinu kuti yizakaleke kutimbanizga ŵanthu.
◼ Kutepa: Lekani kujoyina nthambo za wayilesi ya kaseti ku magesi gha pa malo gha ungano panji ku vyakukuzgira mazgu. Para muzamutepa, kuzakatimbanizga ŵanyinu yayi.
◼ Kujambura Vithuzithuzi: Usange muzamujambura vithuzithuzi pa nyengo ya ungano, kamera yinu yizakaleke kumulika pakujambura.
◼ Uteŵeti Wakujipeleka: Usange mukukhumba uteŵeti uwu, muzakalute ku Dipatimenti ya Uteŵeti Wakujipeleka. Ŵana awo ŵandakwaniske vilimika 16 nawo ŵangateŵetera usange ŵagwilirenge lumoza na mupapi wawo panji mulara waliyose uyo wazomerezgeka na mupapi wawo.