Ivyo Tikwenera Kukumbuka pa Ungano wa Chigaŵa
Nyengo ya Ungano: Sumu zaving’wenyeng’wenye zizamwamba 8:20 mulenji mazuŵa ghose ghatatu. Para sumu izi zayamba, tose tizakakhale pasi. Pa zuŵa lakwamba na lachiŵiri, ungano uzamumara 3:55 mise, ndipo zuŵa lachitatu uzamumara 2:45.
Malo Ghakwimikapo Vyakwendera: Pazamuŵa malo ghakukwana ghakwimikapo magalimoto na njinga. Tikupempha ŵeneko ŵa magalimoto na njinga kuti ŵazakapulikire ŵalinda awo ŵazamuŵa pa malo agha. Ŵazakawoneseske kuti ŵakiya galimoto panji njinga zawo pambere ŵandalute kukakhala pasi.
Kusunga Malo: Para mwafika pa ungano, lekani kuchimbilira kukhala pa malo agho mukutemwa chifukwa cha kopa kuti ŵanyinu ŵangakhalapo. Usange tili na mtima wa kughanaghanira ŵanji, tizamupenja vithu pera yayi. Para tikuchita nthena, awo ŵakutiwona ŵamanyenge kuti ndise Ŵakhristu ŵaunenesko ndipo ŵalumbenge Chiuta. (Yoh. 13:34, 35; 1 Kor. 13:4, 5; 1 Pet. 2:12) Mungazakasunga malo gha awo mukwenda nawo mu galimoto yinu, awo mukukhala nawo, na awo mukusambira nawo Baibolo. Pali malo agho ghazamusungikira ŵachekuru na ŵalwari. Pakuti malo agha ghazamuŵa ghachoko, ŵanji ŵangazakakhalangapo yayi. Ŵangazakakhalapo pekha para ŵazamupwelelera awo ŵazamukhala pa malo agha.
Chakurya cha Muhanya: Muzakayeghe chakurya cha muhanya m’malo mwa kuzakafumapo pa malo gha ungano kuti mukapenje chakurya. Mungazakayegha tchipisi, mpunga, mboholi, mayawu, na vyakumwa.
Vyakupeleka: Tikulongora kuti tikuwonga ivyo vyanozgeka pa ungano para tikupeleka vyawanangwa ivyo vikovwira pa ntchito ya pa charu chose. Usange munthu wakukhumba kupeleka cheke pa ungano wa chigaŵa, wazakalembe pa cheke kuti ndalama zipelekeke ku “Association of Jehovah’s Witnesses of Malawi.”
Munkhwala: Usange mukumwa munkhwala chifukwa cha suzgo linyake, mukwenera kuzakawoneseska kuti mwayegha wakukwana, chifukwa pazamuŵavya pa malo gha ungano. Awo ŵakujilasa nyerete ya munkhwala wa shuga ŵakwenera kuzakapwelelera uko ŵazamutaya ivyo ŵajilasira. Ŵangazakatayanga mu nkhando panji mu mabini gha pa malo gha ungano yayi nesi uko ŵazamugona.
Ngozi: Mukwenera kuwoneseska kuti mugege ngozi izo zikuchitika chifukwa cha kutelemuka panji kukhuŵara. Chaka chilichose ngozi zikuchitika chifukwa cha skapato, chomenechomene za hilu yitali. Ntchiwemi kuvwara skapato izo mungenda nazo makora palipose.
Awo Ŵali na Suzgo la Kupulika: Ungano uzamung’anamulika mu chiyowoyero cha mawoko pa maungano agho ghazamuchitikira ku Blantyre, Kasungu, Lilongwe, Luchenza, Magawa, Mkanda, Mangochi, Mzuzu, Mnadzi, Nchalo, Nkhata Bay, Songani na malo ghanyake. Pa maungano agha, pazamuŵa chipharazgo chakukhwaskana na nkhani iyi pa zuŵa lakwamba la ungano, chigaŵa cha mulenji.
Vyakuphakaphaka: Ntchiwemi kuti muzakachepeskeko vyakuphakaphaka panji perefyumu. Ŵabali na ŵadumbu ŵanyake thupi lawo likukolerana yayi na sungu lankhongono chomene.—1 Kor. 10:24.
Fomu ya Weleraniko kwa Munthu Uyu (S-43): Muzakalembe mazina gha awo ŵazamunweka para mwaŵapharazgira pa nyengo ya ungano pa fomu ya Weleraniko kwa Munthu Uyu. Mafomu agho muzamulemba muzakapeleke ku dipatimenti ya Mabuku, panji kwa mulembi wa mpingo winu para mwawera ku ungano.
Resitiranti: Nkharo yithu yikwenera kuchindika Yehova para tili mu resitiranti. Tikwenera kuvwara malaya agho ghakwenera Mkhristu.
Mafoni: Muzakachune foni yinu kuti muzakaleke kutimbanizga ŵanji.
Kutepa: Lekani kuzakajoyina nthambo za wayilesi ya kaseti ku magesi gha pa malo gha ungano panji ku vyakukuzgira mazgu. Para muzamutepa, kuzakatimbanizga ŵanyinu yayi.
Kujambura Vithuzithuzi: Usange muzamujambura vithuzithuzi pa nyengo ya ungano, kamera yinu yizakaleke kumulika pakujambura.
Uteŵeti Wakujipeleka: Usange mukukhumba uteŵeti uwu, muzakalute ku Dipatimenti ya Uteŵeti Wakujipeleka. Ŵana awo ŵandakwaniske vyaka 16 nawo ŵangazakateŵetera usange ŵazamugwilira lumoza na mupapi wawo panji mulara waliyose uyo wazomerezgeka na mupapi wawo.