Kasi Mbanjani Awo Ŵangatemwa Nkhani Iyi?
1. Kasi tighanaghanirenge vici para tikuŵazga magazini, ndipo cifukwa wuli?
1 Pakulemba Nkhani za mu Gongwe la Mulinda na Galamukani! ŵakughanaghanira ivyo vikucitika pa caru cose. Lekani magazini agha ghakuŵa na nkhani zakupambanapambana. Para tikuŵazga nkhani yiliyose mu magazini, tighanaghanirenge ŵanthu awo nkhani iyo yingaŵakhwaska kuti tikaŵagaŵire.
2. Ni nkhani wuli izo zikuŵa mu magazini ghithu izo ŵanji ŵangatemwa?
2 Kasi mu Gongwe la Mulinda ilo lafuma sono muli nkhani ya mu Baibolo iyo mukadumbiskanapo na munyinu wa ku nchito? Kasi muli nkhani ya mbumba iyo mukuwona kuti yingawovwira mubali winu? Kasi muli na munyinu uyo wakukhumba kuluta ku caru cinyake ico nkhani yake yili mu Galamukani!? Kasi muli nkhani iyo mawupu gha boma panji ŵamalonda ŵangatemwa? Mwaciyelezgero, mawupu agho ghakulera ŵana ŵalanda ghangatemwa magazini iyo yikuyowoya vya ŵana ŵalanda. Ŵapolisi na awo ŵakugwira nchito ku khoti, ŵangatemwa magazini iyo yikuyowoya vya kuswa malango na ucigeŵenga.
3. Yowoyani cakucitika cakulongora uwemi wakugaŵira ŵanthu magazini agho ghali na nkhani izo ŵangatemwa.
3 Ivyo Vikucitika: Mbumba yinyake ku South Africa, yati yapokera Galamukani! ya Okutobala 2011, ya mutu wakuti: “Kodi Mungalere Bwanji Ana Anu Kuti Akule Bwino?” yikimbira foni sukulu 25 izo zili mu cigaŵa cawo. Sukulu 22 zikapokera Galamukani! iyi na kupeleka ku ŵana ŵa sukulu. Mbumba yinyake nayo yikacita mwakuyana waka. Yikagaŵira magazini agha ku sukulu izo zili mu cigaŵa cawo. Ŵasambizgi pa sukulu yinyake ŵakasambizgiranga ŵana magazini iyi mu kilasi. Mbumba iyi yikaphalira mulaŵiliri wa dera ivyo vikacitika. Mulaŵiliri wa dera wakaciska mipingo kuti yigaŵire magazini agha ku sukulu za mu cigaŵa cawo. Ofesi ya munthavi yikapokera makalata ghanandi ghakupempha kuti ŵaŵatumireso magazini ghanyake mwakuti ŵakacita kupangaso ghanyake.
4. Cifukwa wuli tikugaŵira ŵanthu ŵanandi magazini?
4 Magazini ghithu ghakulongosora cifukwa ico vithu viliri nthena mu caru. Kweniso, ghakovwira ŵanthu kuti ŵamanye uthenga uwo uli mu Baibolo na Ufumu wa Ciuta. Pa magazini ghose pa caru capasi, ndigho yekha agho ‘ghakupharazga ciponosko.’ (Yes. 52:7) Lekani tikuyezgayezga kugaŵira ŵanthu ŵanandi magazini agha. Kuti ticite nthena, tikwenera kujifumba kuti, ‘Kasi Mbanjani awo ŵangatemwa nkhani iyi?’