Yezgani Zinchimi—Joyeli
1. Kasi tingamuyezga wuli Joyeli pa nkhani ya kujiyuyura para tikupharazga?
1 Kasi Joyeli wakaŵa njani? Iyo wakalemba vinandi yayi vyakukhwaskana na iyo mwene. Wakajiphara waka kuti wakaŵa “mwana wa Petueli.” (Joel 1:1) Munthu wakujiyuyura uyu, wakayowoya waka uthenga wa Yehova, m’malo mwakuyowoya vya iyo mwene. Mwakuyana waka, m’malo mwakupenja kulumbika panji kumanyikwa, tikwenera kulumba Yehova para tikupharazga. Kweniso, m’malo mwa kuyowoya vya mu mutu withu, tikwenera kujura Baibolo. (1 Kor. 9:16; 2 Kor. 3:5) Tikukhozgeka na uthenga uwo tikupharazga. Kasi ucimi wa Joyeli ungatovwira wuli kuti tiŵe na mwamphu kweniso cigomezgo mazuŵa ghano?
2. Pakuti zuŵa la Yehova laneng’enera, kasi tikwenera kucita vici?
2 “Zuŵa la Yehova Laneng’enera.” (Joel 1:15): Nangauli mazgu agha ghakalembeka vilimika vinandi comene ivyo vyajumpha, kweni sono kwakhala pacoko kuti ghafiskike. Vinthu viheni ivyo vyazara mu caru na umo ŵanthu ŵakucitira para tikuŵapharazgira, mbukaboni wakuti tili mu mazuŵa ghaumaliro. (2 Tim. 3:1-5; 2 Pet. 3:3, 4) Cifukwa cakuti umaliro waneng’enera comene, lekani tikuŵika pakwamba mulimo wakupharazga mu umoyo withu.—2 Pet. 3:11, 12.
3. Cifukwa wuli kupharazga nkhwakuzirwa comene sono apo umaliro ukuneng’enera?
3 ‘Yehova Ni Ciphokwero ca Ŵanthu Ŵake.’ (Joel 3:16): Kusunkhunyika uko kukuyowoyeka pa vesi ili, ni ceruzgo ca Yehova pa suzgo yikuru. Tikupembuzgika pakumanya kuti Yehova wazamuthaska ŵateŵeti ŵake pa nyengo iyi. (Uvu. 7:9, 14) Para nase tikupharazgako makani ghawemi na kuwona umo Yehova wakutipira nkhongono, tikuŵa na cipulikano cakukhora na kuzizipizga. Ivi vizamutovwira pa nyengo ya suzgo yikuru.
4. Cifukwa wuli tikwenera kusekelera na kuleka kopa ivyo vicitikenge kunthazi?
4 Nangauli ŵanji ŵakuti uthenga wa Joyeli ngwakofya, kweni ku ŵanthu ŵa Ciuta ni uthenga wa ciponosko. (Joel 2:32) Ipo, tingawopanga yayi ivyo vicitikenge kunthazi. Kweni tipharazge makani ghawemi gha ufumu wa Ciuta mwamwamphu na kupulikira mazgu gha pa Joel 2:23 ghakuti: “Sekelerani mwa Yehova Ciuta winu.”