Sambizgani Ŵana Ŵinu na Webusayiti Yithu
1. Cifukwa wuli pa Webusayiti yithu pali cigaŵa cakuti “Ŵana”?
1 Ŵanthu ŵa misinkhu yose ŵangatemwa Webusayiti yithu. Cigaŵa cakuti “Ŵana” (lutani pa Visambizgo vya mu Baibolo > Ŵana) cingawovwira ŵana na ŵapapi kuti ŵatemwanenge kweniso kuti ŵatemwenge Yehova. (Dute. 6:6, 7) Kasi mungawovwira wuli ŵana ŵinu na cigaŵa ici?
2. Kasi mungacita wuli kuti musankhe ivyo vikuyana na msinkhu wa ŵana ŵinu?
2 Musinthenge: Ŵana ŵakupambana. (1 Kor. 13:11) Kasi mungacita wuli pera kuti musankhe ivyo vikuyana na msinkhu wa ŵana ŵinu? Jifumbani kuti: ‘Kasi ni vici ivyo ŵana ŵane ŵangatemwa kusambira? Kasi ŵangavipulikiska? Kasi ŵakutegherezga kwa nyengo yitali wuli?’ Mungasambira na ŵana ŵa vyaka vitatu panji kukhilira pasi nkhani izo zikusangika pa cigaŵa cakuti “Ivyo Nkhusambira mu Baibolo.” Kweniso, pasi apa pali vinyake ivyo mungacita.
3. Kasi ŵapapi ŵangawovwira wuli ŵana na ivyo vikusangika pa cigaŵa cakuti “Vyakovwira Pakusopa kwa Mbumba”?
3 Vyakovwira Pakusopa kwa Mbumba: Ivi ni vinthu ivyo vingawovwira mutu wa mbumba kusambizgira ŵana ŵake. Kuti mumanye umo mungacitira, dofyani apo ŵalemba kuti “Wonani Vyose.” Kufumapo apo, ŵazgani “Vyakovwira Ŵapapi” na kudofya apo ŵalemba kuti “Koperani.” Mungasambizga ŵana ŵinu na vithuzithuzi. Mwaciyelezgero, mungasambizga ŵana ŵacoko kupenta cithuzithuzi na cekeni. Ŵana ŵalarako mungaŵawovwira kuti ŵamalizge ivyo vyakhalako pa cigaŵa ico mwasankha. Cigaŵa cilicose ico cili pa “Vyakovwira Pakusopa kwa Mbumba” cikulongosora nkhani panji sambiro limoza la mu Baibolo. Ntheura, ŵana ŵa misinkhu yose ŵangaŵa na cakucita pakusopa kwa mbumba.
4. Kasi pa cigaŵa cakuti “Ŵani Ŵabwezi ŵa Ciuta” pali vici?
4 Ŵani Ŵabwezi ŵa Ciuta: Mavidiyo, sumu na vyakucita ivyo vikusangika pa cigaŵa ici ca Webusayiti yithu vikovwira ŵapapi pakusambizga ŵana Mazgu gha Ciuta. (Dute. 31:12) Vidiyo yiliyose yili na sambiro lakuzirwa. Maseŵero gha kupenja na kusanga, ghakulongora kuzirwa kwa masambiro agha. Pakuti kanandi ŵana ŵakutemwa kwimba, sumu zikuŵawovwira kuti ŵaleke kuluwa ivyo ŵasambira. Ntheura, pa Webusayiti yithu pakuŵikika sumu za Ufumu izo comenecomene zili kulembekera ŵana.
5. Cifukwa wuli ŵapapi ŵakwenera kulomba Yehova kuti waŵawovwire kusambizga ŵana ŵawo unenesko?
5 Mwaŵapapi, manyani kuti Yehova wakukhumba kuti mulere makora ŵana ŵinu. Ipo mulombani kuti wamovwirani kusambizga ŵana ŵinu unenesko. (Ŵeru. 13:8) Yehova wamovwiraninge kuti musambizge ŵana ŵinu kusanga vinjeru ‘kuti ŵaponoskeke.’ (2 Tim. 3:15; Zinth. 4:1-4)