Yezgani Zinchimi—Hoseya
1. Kasi ni fumbo wuli ilo panji muli kujifumbapo?
1 ‘Kasi nipelekenge vici kwa Yehova?’ Panji muli kujifumbapo fumbo ili pakughanaghanira lusungu lwa Yehova na uwemi wake. (Sal. 103:2-4; 116:12) Hoseya wakaŵa wakukhumbisiska kucita ivyo Yehova wakamuphalira, nangauli wakakhumbikwiranga kujinora vinthu vinyake. Kasi tingamuyezga wuli?
2. Kasi tingamuyezga wuli Hoseya pa nkhani ya kupharazga?
2 Kupharazga mu Nyengo ya Suzgo: Uthenga wa Hoseya ukalutanga ku ufumu wa mafuko 10 wa Israyeli, uko ŵanthu ŵakaleka kusopa kwaunenesko. Themba Yeroboamu waciŵiri wakacita viheni pamaso pa Yehova, ndipo wakaleka yayi kusopa tholi ilo Yeroboamu wakwamba wakapanga. (2 Mathe. 14:23, 24) Mathemba agho ghakamba kuwusa pamanyuma pa Yeroboamu waciŵiri, ghakalutilira kucita viheni mpaka apo ufumu wa mafuko 10 ukaparanyikira mu 740 B.C.E. Kweni Hoseya wakateŵetera mwakugomezgeka kwa vyaka pafupifupi 59. Kasi nase tikuŵikapo mtima kupharazga makani ghawemi nangauli ŵanthu ŵangaŵa ŵambura kunweka panji ŵakususka?—2 Tim. 4:2.
3. Kasi ivyo Hoseya wakacita vikulongora wuli lusungu lwa Yehova?
3 Ghanaghanirani Lusungu lwa Yehova: Yehova wakaphalira Hoseya kuti watore “mwanakazi muleŵi.” (Hos. 1:2) Ŵati ŵatorana, Gomeri wakababa ŵana ŵatatu, kweni vikuwoneka kuti yumoza pera ndiyo wakaŵa wa Hoseya. Hoseya wakaŵa wakukhumbisiska kugowokera muwoli wake. Ici cikulongora lusungu lwa Yehova ku Ŵaisrayeli para ŵapera. (Hos. 3:1; Rom. 9:22-26) Kasi nase tikukhumbisiska kuleka ivyo tikutemwa kuti tiphalire ŵanthu ŵa mitundu yose lusungu lwa Yehova?—1 Kor. 9:19-23.
4. Kasi ni vinthu wuli vinyake ivyo tingaleka kuti titeŵetere makora Yehova?
4 Ŵateŵeti ŵanyake ŵa Yehova ŵakuleka nchito zapacanya kuti ŵacite vinandi mu uteŵeti. Ŵanji ŵasankha kuleka kutengwa na kutora panji kuleka kuŵa na ŵana. Para tikughanaghanira ivyo Hoseya wakacita, nyengo zinyake tingajifumba kuti, ‘Kasi nane ningakwaniska?’ Kweni para tikuwonga Yehova cifukwa ca lusungu lwake lukuru na kugomezga mzimu wake utuŵa kuti utipe nkhongono, tingacita uteŵeti uwo taghanaghanirangako yayi, nga umo wakacitira Hoseya.—Mat. 19:26; Fil. 2:13.