Nkhani Izo Zingatovwira mu Uteŵeti
1. Kasi cilato ca nkhani za mutu wakuti “Kucezga na Munthu” nchakuti wuli?
1 Nyengo na nyengo, mu Gongwe la Mulinda lakugaŵira mukuŵa nkhani ya mutu wakuti “Kucezga na Munthu.” Nkhani izo zikuŵa pa mutu uwu zili na vilato viŵiri. Cakwamba, kulongosora visambizgo vya mu Baibolo mu nthowa yakukora mtima. Caciŵiri, kutovwira umo tingacitira kuti tidumbiskane na munthu mwaluso. (1 Pet. 3:15) Kasi tingacita wuli na nkhani izi?
2. Kasi tingacita wuli na nkhani izi para tili mu uteŵeti?
2 Mu Uteŵeti: Mungasunga magazini ghanyake agho ghali na nkhani izi. Para mweneko wa nyumba panji uyo tikusambira nayo Baibolo watifumba fumbo ilo lili mu nkhani izi, mupani magazini iyo yili na nkhani iyo, na kudumbiskana. Usange mulije magazini mungakopera pa Webusayiti ya jw.org.
3. Kasi tingadumbiskana wuli nkhani izi na munthu?
3 Kasi tingadumbiskana wuli nkhani izi na munthu? Ŵanji ŵakupempha munthu kuti waŵazge mazgu gha mzengezgani, ndipo iwo ŵakuŵazga gha Kaboni. Nthowa iyi njakovwira comene, cifukwa yikovwira munthu kusanda vigomezgo vyake kwambura kugazgana.—Dute. 32:2.
4. Kasi tingacita wuli kuti tijisambizge para tikuŵazga nkhani izi?
4 Jisambizgani Mwekha na Ŵanji: Apo mukuŵazga nkhani izi, wonani malemba, viyelezgero, na fundo izo Kaboni wakuyowoya kuti wakhorweske mzengezgani. Kweniso wonani umo wakuyowoyera mwaubwezi. Namwe yezgani kucita nthena para muli mu uteŵeti. (Zinth. 1:5; 9:9) Mudumbu munyake wakati, “Para nkhuŵazga nkhani izi, nkhuŵa nga nenda na mupayiniya, uyo wakumanya ico wangazgora nyengo zose!”
5. Kasi tingawovwira wuli msambiri withu kunozgekera uteŵeti?
5 Kweniso mungawovwira msambiri winu kunozgekera uteŵeti na nkhani izi. Mungayezgelera lumoza. Iyo wangaŵa mupharazgi. Ivi vingawovwira kuti msambiri winu wamanye kulongosora mwaluso vigomezgo vyake. (Kol. 4:6) Nkhani izi ni nthowa yimoza iyo Yehova wakutovwilira kuti ‘tifiske uteŵeti withu mwakukwana.’—2 Tim. 4:5.