Nkhani Ziphya Zakwambiskira Masambiro gha Baibolo

1. Kasi ni nkhani wuli ziphya izo zizamuŵa mu Gongwe la Mulinda la Ciceŵa lakugaŵira, ndipo cilato cake nchivici?

¹ Kwamba mwezi ukwiza, mu Gongwe la Mulinda la Ciceŵa lakugaŵira muŵenge nkhani ziphya izo zizamutovwira kwambiska masambiro gha Baibolo. Nkhani izi zizamuŵa na mutu ukuru wakuti, “Sambirani Kufuma mu Mazgu gha Ciuta.” Nchakuwonekerathu kuti ŵanji mu cigaŵa cithu ŵazamusangwa comene kuŵazga nkhani izi paŵekha, kweni cilato cake nchakuti tizakadumbiskanenge na mweneko nyumba.

2. Kasi nkhani izi zizamulembeka wuli?

² Umo Zizamulembekeranga: Mutu ukuru ndiposo mitu yicokoyicoko yalembeka mwa mafumbo kuti mufumbe mweneko nyumba pa nyengo iyo mukudumbiskana. Malemba agho ghakukhozgera nkhani iyo mukudumbiskana ghaŵikikamo kweni mazgu ghake ghandalembeke mwakuti mweneko nyumba waŵazge yekha kufuma mu Mazgu gha Ciuta. Ndime zake ni zifupi, mwakuti kwa nyengo yicoko comene mungasambira na munthu. Nkhani yiliyose yikuzunura buku la Baibolo Likusambizgaci? kuti ciŵe cipusu kwamba kusambira nayo buku ili usange nchakwenelera.

3. Para tikupharazga ku nyumba na nyumba, kasi tingambiska wuli sambiro la Baibolo na nkhani izi?

³ Umo Mungagaŵilira: Para mukugaŵira magazini mungafumba fumbo ilo mweneko nyumba wanganweka nalo pa nkhani iyo mukukhumba kumulongora. Mwaciyelezgero, nkhani ya mu magazini ya Janyuwale 1 yikulongosora za kuzirwa kwa Baibolo. Mungafumba kuti: “Kasi mukuwona Baibolo kuti ni Mazgu gha Ciuta panji ni buku waka liwemi? [Mulekani wazgore.] Nkhukhumba kuti nimuphalirani cinthu cinyake cakukondweska pa nkhani iyi.” Mulongorani fumbo lakwamba, ŵazgani ndime yakwamba, ndipo ŵazgani lemba ilo likukhozgera nkhani iyo. Ŵazganiso fumbo, ndipo mupemphani mweneko nyumba kuti wayowoyepo. Mwakugwiliskira nchito mafumbo gha mu magazini iyi, mungadumbiskana vinandi mwakuyana na nyengo iyo yilipo. Pambere mundawukepo pa nyumba yake, mulongorani fumbo lakulondezgapo ndipo panganani zuŵa na nyengo iyo mwamwiziraso. Weleraniko kukasambira nayo nkhani zakusazgikira sabata yiliyose mpaka apo muzamumupira magazini ya mwezi unyake. Nthowa yinyake nja kumuphalira mwakudunjika kuti tikusambira Baibolo na ŵanthu. Pamanyuma gwiliskirani nchito nkhani ya mu magazini kuti mumulongore umo sambiro likucitikira.

4. Kasi ŵanthu awo tikuwelerako tingaŵalongora wuli nkhani izi?

⁴ Nkhani izi mungadumbiskanaso na ŵanthu awo mukuŵapa magazini nyengo zose ndiposo awo mukuwelerako. Mungayowoya kuti: “Mu Gongwe la Mulinda mwamba kuŵa nkhani yiphya. Lekani nimulongorani umo tikusambilira.” Lurombo lwithu ndwakuti, mphanyi nkhani ziphya izi zawovwira ŵanandi kuti “ŵafike pa kumanya makora unenesko.”—1 Timote 2:4.