Ivyo Vingatovwira Kuti Tiŵe Ŵaluso mu Uteŵeti—Mulongorani umo Tikusambilira Baibolo na Buku la Baibolo Likusambizgaci

Chifukwa Wuli Nkhwakuzirwa: Ŵanthu ŵanandi ŵangapulikiska yayi para tikuŵaphalira kuti tikusambira Baibolo na ŵanthu kwambura kulipiska. Ŵangaghanaghana kuti ŵanjire kagulu ako kakusambira Baibolo panji kuchita kosi yinyake yakusambizga Baibolo. M’malo mwakumuphalira waka munthu kuti musambirenge nayo Baibolo, ntchiwemi kumulongora umo tikuchitira. Kwa maminiti ghachoko waka muphalirani ivyo Baibolo likusambizga.

Umo Tingachitira:

Para tayowoya ivyo tizira, tingamufumba munthu vinthu ivyo ŵakwenjerwa navyo.
Muphalirani kuti ŵanthu ŵanandi ŵakwenjerwa na vinthu vyakuyana waka. Ndipo mulongorani mitu ya mu buku la Baibolo Likusambizgaci. Mulongosolerani kuti buku ili lili na nkhani zipusu izo Baibolo likusambizga pa ivyo vichitikenge munthazi kweniso fundo zinyake izo zingamovwira. Mupemphani kuti wasankhepo mutu uwo wangatemwa kuti mudumbiskane.
Mupani buku na kumuphalira kuti wajure pa mutu uwo wasankha. Mulongosolerani kuti mafumbo agho ghali pakwambilira pa mutu uwu ghakuzgoreka mu ndime.
Mupemphani kuti waŵazge ndime yakwamba. Fumbani fumbo na kudumbiskana zgoro lake. Ŵazgani lemba ilo likukolerana na zgoro. Mulongorani umo imwe mwagwalira mazgoro mu buku linu.
Dumbiskanani ndime yakulondezgapo, ndipo mupemphani kuti wazgore mu mazgu ghake na ghake.
Muwongani na kupangana nayo kuti mukawereso.
Para vingachitika, mulongorani vidiyo yakuti Kasi Ŵakaboni ŵa Yehova Ŵakuchita Wuli Pakusambizga Munthu Baibolo? pa Webusayiti yithu.

Yezgani Sachizgo Ili Mwezi Uno:

Lombani Yehova kuti wamutumbikani apo mukuyezgayezga kuti mwambiske sambiro la Baibolo.—Fil. 2:13.
Para muli mu upharazgi, yezgani kulongora nanga wangaŵa munthu yumoza umo tikusambilira Baibolo na buku la Baibolo Likusambizgaci panji vidiyo yakuti Kasi Ŵakaboni ŵa Yehova Ŵakuchita Wuli Pakusambizga Munthu Baibolo?