Ivyo Vingatovwira Kuti Tiŵe Ŵaluso mu Uteŵeti—Kugaŵira Buku la Baibolo Likusambizgaci

Chifukwa wuli nkhwakuzirwa? Buku la Baibolo likusambizgaci ndilo lili pakwamba pa mabuku agho tikusambizgira ŵanthu Baibolo. Likovwira ŵanthu kuti ŵamanye ivyo Baibolo likusambizga. Tikwenera kumupa dankha munthu buku ili pambere tindayambe kusambira nayo. Ndicho chifukwa chake tose tikwenera kuyezgayezga kugaŵira buku ili mwaluso mu uteŵeti. (Zinth. 22:29) Pali nthowa zinandi zakugaŵilira buku ili. Mupharazgi waliyose wakusankha nthowa iyo njiwemi kwa iyo.

Umo Tingachitira:

Fumbani fumbo ilo lingamovwirani kuti mudumbiskane pa chipaturo icho mwangunozgekera mu buku ili. Nyengo zinyake mungamufumba fumbo limoza pa mafumbo agho ghakuŵa pakwambilira pa chipaturo chilichose. Para wazgora, ŵazgani lemba ilo likukolerana na fumbo ilo. Kufuma apo, mulongorani ndime iyo yikulongosora nkhani iyo na kudumbiskana nayo mwakudumura.
Nthowa yinyake njakuti mungamulongora munthu ivyo vili kukwambilira kwa buku ili. Ndipo mulongorani umo wangasangira mazgoro agho ghali pa peji 3 na 6. Mwachiyelezgero, mungazunurapo nkhani yinyake yakuchitiska chitima iyo yili mu nyuzipepara yasonosono. Longosorani kuti ŵanthu ŵanandi ŵakughamanya yayi mazgoro gha mafumbo agho ghali pa peji 3 mu buku ili. Panyake mungayowoya kuti mukudumbiskana na ŵanyinu za vinthu viwemi ivyo vichitikenge munthazi. Kufuma apo, mulongorani ivyo vili pa peji 4 na 5 na kumufumba kuti, “Pa vinthu ivyo Baibolo likutilayizga apa, ni ntchi icho mukukhumba kuti muzakawone kuti chafiskika nadi?” Kweniso mungayowoya kuti mukovwira ŵanthu kuti ŵamanye mazgoro gha mafumbo ghakuzirwa. Kufuma apo, mulongorani mafumbo agho ghali musi pa peji 6, na kumupempha kuti wasankhepo ilo wakukhumba kumanya zgoro lake.
Yambani kusambira na munthu pa nyengo yeneyiyo. Mungayowoya kuti: “Nkhukhumba kumulongorani umo tikuchitira pakusambira Baibolo na ŵanthu. Imwe muli kusambirapo? [Mulekani wazgore.] Para muli na nyengo yichoko waka,ningamulongorani umo tikuchitira pa kugwiliskira ntchito Baibolo linu.”

Yezgani Masachizgo Agha Mwezi Uno:

Yezgelerani pa kusopa kwa mbumba umo mungagaŵilira buku ili.
Para muli mu upharazgi, phaliraniko munyinu ivyo mwanozgekera kukayowoya. (Zinth. 27:17) Sinthani ivyo mwangunozgekera, para mwawona kuti ŵanthu vikuŵafika pa mtima yayi.