Sambizgani Ŵanthu Baibolo na Burosha la Uthenga Uwemi
1. Kasi burosha la Uthenga Uwemi lili kulembeka wuli?
1 Nga umo tikasambilira mu nkhani yinyake iyo yili mu Uteŵeti Withu wa Ufumu wa Julayi 2015, burosha ili ndiwemi chomene kusambizgira ŵanthu Baibolo. Malemba ghandakoleke mazgu mwakuti munthu wakaŵazge yekha kufuma mu Baibolo. Mabuku ghanandi ghakulembeka munthowa yakuti munthu wasambirenge yekha. Kweni burosha ili lili kulembeka kuti mudumbiskanenge nayo. Ntheura para tikugaŵira burosha ili, tikweneraso kumulongora munthu umo tikusambilira Baibolo kuti wawone umo vikunozgera kusambira makani ghawemi gha mu Baibolo.—Mat. 13:44.
2. Kasi tingapharazga wuli na burosha ili paulendo wakwamba?
2 Paulendo Wakwamba: Mungayowoya kuti: “Mazuŵa ghano ŵanthu ŵakufipa mtima na uko charu chikuya. Kasi mukughanaghana kuti vinthu vizamuŵapo makora? [Mulekani wazgore.] Baibolo likutiphalira vinthu viwemi ivyo vichitikenge munthazi. Mafumbo ghanyake agho Baibolo likuzgora ni agha.” Mupani burosha na kumulongora pa peji laumaliro kuti wasankhepo mutu uwo wamukondweska. Mulongorani umo tikusambilira. Dumbiskanani ndime yakwamba pa fumbo ilo wasankha. Kweniso mungamufumba fumbo lakusazgikira kufuma pa ndime iyo mukudumbiskana, na kumulongora umo burosha ili lingamovwilira kuti wasange zgoro mu Baibolo.
3. Longosorani umo tingasambizgira ŵanthu na burosha la Uthenga Uwemi.
3 Umo Mungasambilira Baibolo na Munthu: Chakwamba, fumbani fumbo ilo mudumbiskanenge kuti munthu wamanye fundo yikuru. Chachiŵiri, ŵazgani ndime. Chachitatu, ŵazgani malemba agho ŵati “ŵazgani.” Ndipo fumbani mafumbo agho ghangamovwira kuti wawone umo lemba ilo mwaŵazga likuzgolera fumbo ilo mwangufumba pakwamba. Chachinayi, para fumbo lili na ndime zinandi, muchite ivyo ŵalongosora pa fundo yachiŵiri na yachitatu. Paumaliro, mufumbani fumbo ilo mwadumbiskananga kuti muwone usange wapulikiska nadi. Para mwasambira na munthu maulendo ghanandi, ndipo mwawona kuti sambiro lakhazikika, mungasintha na kwamba kusambira buku la Baibolo Likusambizgaci panji mungalutilira kusambira mu burosha lenelili m’paka mumalizge.
4. Kasi tingachita wuli kuti tisambizgenge ŵanthu mwaluso na burosha ili?
4 Limanyani makora burosha ili, ndipo sambizgirani ŵanthu apo mphakwenelera. Pambere mundambe kusambira na munthu, ghanaghanirani uyo mukusambira nayo, na umo mungadumbiskirana nayo Baibolo. (Zinth. 15:28; Mil. 17:2, 3) Apo mukulutilira kusambizga ŵanthu na burosha ili, mulitemwenge chomene kweniso muŵenge ŵaluso.