Burosha Liphya Ilo Tigaŵirenge
1. Kasi mu Novembala tizamugaŵira vici, ndipo cilato ca burosha ili nchakuti wuli?
1 Pa Ungano withu wa Cigaŵa wa 2009 wa mutu wakuti, “Muŵenge Maso!” pakafumiskika burosha liphya mu Cingelezi, ilo mu Citumbuka nda mutu wakuti Kasi mu Baibolo Muli Uthenga Wuli? Mu Novembala mipingo pa caru cose yizamugaŵira kakwamba burosha ili. Kasi burosha ili lizamovwira wuli ŵanthu mu cigaŵa cithu? Ŵanthu ŵanandi, comenecomene awo Mbakhristu yayi, ŵakumanya vinandi yayi vya mu Baibolo. Ntheura, pa peji 3 pakulongosora kuti burosha ili lili kunozgeka kuti limovwirani “kumanya uthenga uwo uli mu Baibolo.”
2. Kasi tingagaŵira wuli burosha ili?
2 Umo Tingagaŵilira: Tingayowoya mazgu agha: “Tikukhumba kumanya maghanoghano ghinu pa ivyo vikuyowoyeka apa. [Ŵazgani 2 Timote 3:16.] Ŵanthu ŵanandi ŵakugomezga mazgu agha, kweni ŵanji ŵakuwona kuti Baibolo ndakufuma kwa Ciuta yayi kweni ndiwemi waka. Kasi imwe mukughanaghana wuli? [Mulekani wazgore.] Kwali vigomezgo vya cisopa cithu ni vyamtundu wuli, kweni pali vifukwa viwemi vyakusandira Baibolo patekha. [Ŵazgani mazgu ghakwamba pa peji 3.] Apo mukuŵazga fundo zakudumura za mu Baibolo mu burosha ili, muwonenge cinthu cinyake cakukondweska comene. Muwonenge kuti Baibolo lili na uthenga ndiposo fundo yimoza.”
3. Kasi ni nthowa wuli yinyake iyo tingagwiliskira nchito pakugaŵira burosha ili, comenecomene para tikupharazgira ŵanthu awo Mbakhristu yayi?
3 Pano pali nthowa yinyake ya umo tingacitira, comenecomene para tikupharazgira ŵanthu awo Mbakhristu yayi. Tingati: “Tikukhumba kumanya maghanoghano ghinu pa ivyo vikuyowoyeka mu Malemba (panji mu buku lakupatulika ili). [Ŵazgani Salmo 37:11.] Kasi mukughanaghana kuti caru cizamuŵa wuli para ucimi uwu wazakafiskika? [Mulekani wazgore.] Uwu ngumoza mwa maucimi ghakupembuzga agho ŵanthu ŵa mafuko ndiposo visopa vyose ŵangaghasanga mu Baibolo.” Ŵazgani mazgu ghakwamba pa peji 3, ndipo mugaŵirani burosha.
4. Kasi tingambiska wuli sambiro la Baibolo na burosha ili?
4 Yambiskani Sambiro la Baibolo: Para tikuwelerako kwa munthu uyo tikamupharazgira, tingamukumbuska ivyo tikadumbiskana ndipo tingasambira nayo ndime yimoza panji ziŵiri pa nkhani iyo tikadumbiskana, mwakugwiliskira nchito mafumbo gha kuumaliro wa mutu uwo mukasankha. Panji para tikukhumba kumulongolerathu buku la Baibolo Likusambizgaci? tingaŵazga nayo kuumaliro wa cikopi ca burosha, na kumupa buku, na kumufumba mutu uwo wamukondweska, ndipo tisambire nayo ndime yimoza panji ziŵiri kufuma pa mutu uwo wasankha. Mphanyi tose tacitako mwakukwana mulimo wa kugaŵira burosha ili mu mwezi wa Novembala.