Umo Tingacitira na Burosha Lakuti Ciuta Wakutiphalira Uthenga Uwemi!
Burosha Liphya Ilo Litovwirenge Kuwelerako na Kwambiska Masambiro gha Baibolo
1. Kasi pa Ungano wa Cigaŵa wakuti “Vikilira Mtima Wako,” tikapokera burosha wuli, ndipo litovwirenge wuli?
1 Pa Ungano wa Cigaŵa wakuti “Vikilira Mtima Wako,” tikakondwa kupokera burosha liphya ilo litovwirenge kuwelerako ku ŵakunweka na kwambiska masambiro gha Baibolo. Burosha lakuti Ciuta Wakutiphalira Uthenga Uwemi! lanjira m’malo mwa la Ico Wakukhumba. Burosha ili likuyana waka na la Ico Wakukhumba cifukwa mitu yake ŵali kuyilongosora mwakudumura. Ici citovwirenge kuti tisambirenge Baibolo na ŵanthu kwa nyengo yicoko. Burosha la Ico Wakukhumba likukonkhoska ivyo Mkhristu wakwenera kucita, ivyo nyengo zinyake vingaŵa vyakusuzga kuti msambiri wakolerane navyo. Kweni burosha liphya ili likulongosora waka uthenga uwemi wa mu Baibolo.—Mil. 15:35.
2. Kasi cilato ca burosha la Uthenga Uwemi nchakuti wuli?
2 Kasi cilato ca burosha ili nchakuti wuli? Ŵabali pa caru cose ŵafumbanga usange pangaŵa kabuku kapusu ako kangawovwira ŵanthu kumanya unenesko, ako ŵangamba kusambira pambere ŵandambe kusambira buku la Baibolo Likusambizgaci. Ŵanthu awo ŵakopa kuŵazga buku cifukwa cakuti ndikuru, ŵangatemwa kusambira nawo Baibolo na burosha. Kweniso, nchipusu kung’anamura burosha mu viyowoyero vinandi.
3. Kasi burosha ili likupambana wuli na mabuku ghanyake agho tikusambilira Baibolo na ŵanthu?
3 Umo Lili Kulembekera: Mabuku ghithu ghanandi agho tikusambilira Baibolo na ŵanthu ghali kulembeka mu nthowa yakuti munthu wangapulikiska unenesko para wakuŵazga payekha. Kweni burosha ili ndimo liliri yayi. Lili kulembeka kuti munthu wasambirenge mwakovwirika na msambizgi. Ipo, usange mukupeleka burosha ili kwa munthu, cingaŵa ciwemi kudumbiskana nayo ndime yimoza panji ziŵiri. Ndime zake ni zifupi, ntheura mungadumbiskana pa nyumba yake panji uko wakugwira nchito kwa nyengo yicoko waka. Nangauli nchiwemi kwamba kusambira mutu wakwamba, kweni tili ŵanangwa kwambira palipose.
4. Kasi burosha ili likutovwira wuli kuti tisambizgenge kufuma mu Baibolo?
4 Mu mabuku ghithu ghanandi zgoro la fumbo likusangika mu ndime. Kweni mu burosha ili, mazgoro ghali mu Baibolo. Ŵanthu ŵanandi ŵakukhumba kuti ŵasambirenge kufuma mu Baibolo, m’malo mwakufuma mu mabuku ghithu. Ntheura malemba ghanandi ghandakoleke mazgu. Ghakwenera kuŵazgika kufuma mu Baibolo. Ici covwirenge msambiri kumanya kuti ivyo wakusambira vikufuma kwa Ciuta.—Yes. 54:13.
5. Cifukwa wuli nchakuzirwa kuti msambizgi wanozgekere makora sambiro lililose?
5 Burosha ili likulongosora malemba ghose yayi. Cifukwa wuli? Cifukwa lili kulembeka mu nthowa yakuciska msambiri kuti wafumbenge mafumbo, kweniso kuti msambizgi wasambizgenge na luso lwake. Ipo nchakuzirwa kunozgekera makora sambiro lililose. Kweni manyani ici: Kuyowoya vinandi yayi. Tikutemwa nadi kulongosora Malemba. Kweni msambiri tingamovwira kuti wamanye vinandi usange tamupa mpata kuti wayowoyepo maghanoghano ghake pa ivyo lemba likung’anamura. Mwa kumufumba mafumbo mwaluso, tingamovwira kuti wawemo yekha ico malemba ghakung’anamura.—Mil. 17:2.
6. Kasi tingacita wuli na burosha ili (a) uko ŵanthu ŵakukayika kuti Ciuta waliko ndipo ŵakuligomezga yayi Baibolo? (b) para tikupharazga kunyumba na nyumba? (c) kuti tambiske sambiro la Baibolo paulendo wakwamba? (d) para tikuwelerako ku ŵakunweka?
6 Nga umo ghaliri mabuku ghanyake agho tikusambilira Baibolo na ŵanthu, tingagaŵira burosha ili nanga kungaŵa kuti ndilo tikugaŵira yayi mu mwezi uwo. Ŵanandi ŵazamuyambiskiranga masambiro gha Baibolo paulendo wakwamba. Nga umo ŵakayowoyera pa ungano wa cigaŵa, “Vikunozga kuwelerako kwa munthu na kabuku aka!”—Wonani mabokosi pa peji 5-7.
7. Kasi mungasambira wuli Baibolo na munthu na burosha ili?
7 Umo Mungasambilira Baibolo na Munthu: Tingamba kuŵazga fumbo ilo lili na nambara, kweniso ilo lili na malemba ghafipa comene. Kufuma apo, ŵazgani ndime na malemba agho ŵati “ŵazgani.” Fumbani mafumbo ghakuti ghawovwire msambiri kupulikiska ivyo malemba ghakung’anamura. Ndipo pambere mundambe kudumbiskana fumbo linyake, mufumbaniso fumbo ilo mwangufumba pakwamba kuti mumanye usange wapulikiska. Pa maulendo ghakwambilira, cingaŵa ciwemi kuti musambirenge fumbo limoza ilo lili na malemba ghafipa comene. Mukuluta kwa nyengo, mungasazgirako nyengo kuti musambirenge mutu wose.
8. Kasi tikwenera kuyowoya wuli para tikukhumba kuŵazga lemba, ndipo cifukwa wuli?
8 Malemba agho ghali na mazgu ghakuti “ŵazgani” ndigho ghakuzgora fumbo lapacanya la malemba ghafipa comene. Usange muŵazgenge lemba, lekani kuyowoya kuti, “Mpositole Paulosi wakalemba kuti” panji, “Wonani ivyo Yeremiya wakacima.” Msambiri wangaghanaghana kuti tikuŵazga mazgu gha ŵanthu. Cingaŵa ciwemi kuyowoya kuti, “Mazgu gha Ciuta ghakuti” panji, “Wonani ivyo Baibolo likayowoya.”
9. Kasi tikwenera kuŵazga malemba ghose gha mu ndime?
9 Kasi tikwenera kuŵazga malemba ghose panji agho ŵati “ŵazgani” pera? Vithembenge pa umo vinthu viliri na msambiri winu. Palije lemba ilo laŵikikapo waka kuti muwone apo fundo yikusangika mu Baibolo. Ghose ghali na fundo yakwenera kudumbiskana. Kweni nyengo zinyake cifukwa cakuti msambiri walije nyengo, wandakhumbe viŵi yayi, kweniso umo wakuŵazgira, cingaŵa ciwemi kuŵazga agho ŵati “ŵazgani” Pera.
10. Kasi mphawuli apo tingamba kusambira na munthu mu buku la Baibolo Likusambizgaci?
10 Kasi Tingamba Pauli Kusambira Nayo Baibolo Likusambizgaci? Pamanyuma pakusambira nayo kwa nyengo yitali, tingawona usange tingamba kusambira nayo buku la Baibolo Likusambizgaci panji kulutizga na burosha la Uthenga Uwemi mpaka timalizge. Ŵapharazgi ŵangawona ŵekha apo ŵangambira kusambira buku ili. Kasi tikwenera kwamba cipaturo cakwamba para tamba kusambira buku la Baibolo Likusambizgaci? Palije malango pa nkhani iyi. Ŵanthu ŵakuyana yayi. Ndipouli, ŵasambiri ŵanandi ŵasangenge candulo para ivyo ŵasambira mu burosha ŵangavisambiraso makora mu buku la Baibolo Likusambizgaci.
11. Cifukwa wuli tikwenera kuligwiliskira nchito makora burosha liphya ili?
11 Makani ghawemi ghakusoŵa mu caru ici. Tili na mwaŵi ukuru kupharazga makani ghawemi ku ŵanthu, ghakuti Ufumu wa Ciuta ukuwusa, ndipo sonosono apa Ufumu uwu uzgorenge caru kuŵa ciphya mweneumo muzamuŵa urunji. (Mat. 24:14; 2 Pet. 3:13) Tili na cigomezgo kuti wose awo ŵakupulikira uthenga uwemi nawo ŵazamuyowoya mazgu agha: “Nako nkhutowa pa mapiri malundi gha uyo wakwiza na makani ghawemi, uyo wakuthuwuska cimango, na kwiza na makani ghawemi gha vinthu viwemi, uyo wakupharazga ciponosko, na kuti kwa Ziyoni, ‘Ciuta wako wakuwusa!’” (Yes. 52:7) Na burosha liphya ili, tiyeni tovwire awo ŵali na nyota ya makani ghawemi mu cigaŵa cithu!
[Bokosi pa peji 5]
Uko Ŵanthu Ŵakukayika Kuti Ciuta Waliko Ndipo Ŵakuligomezga Yayi Baibolo:
● Ku vigaŵa vinyake, ŵapharazgi ŵakuwona kuti ŵanthu ŵakukana kudumbiskana nawo para ŵapulika mazgu ghakuti “Ciuta” panji “Baibolo.” Para ndimo viliri mu cigaŵa cinu, cingaŵa ciwemi kuti paulendo wakwamba mudumbiskanenge nawo nkhani izo zikuŵakhwaska, nga kukhumbikwa kwa boma liwemi, uko ŵangasanga wovwiri kuti mbumba ziŵe zacimwemwe na ivyo vizamucitika kunthazi. Panyake tingaŵalongora burosha la Uthenga Uwemi para tadumbiskana nawo kanandi waka ukaboni wakuti Ciuta waliko kweniso cifukwa ico tikugomezgera Baibolo.
[Bokosi pa peji 6]
Para Tikupharazga Kunyumba na Nyumba
● “Niza kuti nimulongorani umo tingamanyira ivyo Ciuta wanozgera ŵanthu munthazi. Kasi muli kujifumbapo usange Ciuta wazamumazga masuzgo ghithu? [Mulekani wazgore.] Burosha ili likulongora apo mungasanga zgoro la fumbo ili mu Baibolo. [Mupani burosha, ndipo ŵazgani ndime yakwamba pa mutu wakwamba, na Yeremiya 29:11.] Kuyana na ivyo taŵazga apa, kasi mukuwona kuti Ciuta wakutikhumbira viwemi yayi? [Mulekani wazgore.] Ningamulekerani kabuku aka para mungatemwa. Apo nizirengeso, tizamudumbiskana ndime yaciŵiri kuti tizakasange zgoro mu Baibolo la fumbo lakuti ‘Kasi Ciuta wazamuwuskapo wuli ivyo vikupangiska masuzgo?’” Usange wali na nyengo, mungaŵazga ndime yaciŵiri na malemba ghatatu agho ghali mu ndime iyi. Panganani kuti mwizeso kuzakadumbiskana fumbo lakulondezgapo.
● “Ŵanthu ŵanandi ŵakutemwa kulomba, comenecomene para suzgo yaŵawira. Kasi namwe mukulomba nyengo zinyake? [Mulekani wazgore.] Kasi mukughanaghana kuti Ciuta wakupulika malurombo ghose, panji ghanyake ghakumukondweska yayi? [Mulekani wazgore.] Nili na burosha ili ilo lingatovwira kuti tisange mazgoro gha mafumbo agha mu Baibolo. [Mupani burosha, ndipo ŵazgirani lumoza ndime yakwamba pa mutu 12, na kuŵazga malemba agho ŵati “ŵazgani.”] Kasi nchakukondweska yayi kumanya kuti Ciuta ngwakunkhumbisiska kutegherezga kwa ise? Kweni kuti tisange candulo na lurombo, tikwenera kumumanya makora Ciuta. [Julani mutu 2 na kumulongora tumitu tucokotucoko.] Para mungatemwa, ningamulekerani kabuku aka, ndipo nizengeso nyengo yinyake kuti tizakaŵazge mazgoro gha mafumbo ghakukondweska agha mu Baibolo.”
● “Mazuŵa ghano ŵanthu ŵakufipa mtima na uko caru cikuya? Kasi mukughanaghana kuti vinthu visinthenge? [Mulekani wazgore.] Ŵanthu ŵanandi ŵakuzizwa para ŵamanya kuti Baibolo lili na uthenga uwemi uwo ukutipa cilindizga ciwemi. Mafumbo ghanyake agho Baibolo likuzgora ni agha.” Mupani burosha na kumulongora peji laumaliro kuti wasankhepo mutu uwo wamukondweska. Julani mutu uwo wasora, na kumulongora umo tikusambilira. Panganani kuti muzakazgore fumbo lakulondezgapo.
[Bokosi pa peji 7]
Yambiskani Sambiro Paulendo Wakwamba:
● “Niza kuti nimulongorani umo tikusambilira Baibolo na ŵanthu kwa nyengo yicoko waka. Kabuku aka kali na mitu 15, ndipo kakutovwira kuti tisange mazgoro gha mafumbo ghakuzirwa mu Baibolo linu. [Mulongorani pa cikopi cakwamba na caumaliro.] Kasi muli kuŵazgapo Baibolo kuti mulipulikiske? [Mulekani wazgore.] Lekani nimulongorani umo tikucitira. [Dumbiskanani ndime yakwamba pa fumbo la citatu, mutu 3, na kuŵazga Uvumbuzi 21:4, 5. Kuyana na umo vinthu viliri, mungadumbiskana ndime yakulondezgapo na kuŵazga malemba agho ŵati “ŵazgani.”] Usange mungatemwa ningamulekerani kabuku aka. Tikupempha ŵanthu kuti tisambirenge nawo Baibolo kwa masabata ghacoko waka kuti ŵawone umo vikuŵira. Para mwawona kuti vikunozga, tingalutilizga kusambira. Apo nizirengeso, tizamusambira mutu wakwamba. Mutu uwu uli na peji limoza.”
[Bokosi pa peji 7]
Mulongorani Para Mwawelerako:
● Para tawelerako kwa uyo wakanweka, tingamuphalira kuti: “Nakondwa kuti takumanaso. Niza na kabuku aka ako kangatovwira kusanga mazgoro gha mafumbo ghakukondweska mu Baibolo. [Mupani burosha na kumulongora pa cikopi caumaliro.] Kasi ni mutu ngu uwo wamukondweskani comene? [Mulekani wazgore, ndipo julani mutu uwo wasankha.] Lekani nimulongorani umo kabuku aka kangatovwilira kusanga mazgoro mu Baibolo.” Mulongorani umo tikusambilira Baibolo mwakudumbiskana ndime yimoza panji ziŵiri na kuŵazga malemba agho ŵati “ŵazgani.” Umu ndimo tikusambilira Baibolo. Mulekerani burosha na kupangana kuti mukawereso. Para mwamara kusambira mutu uwo wakasankha, mungadumbiskana mutu unyake uwo munthu watemwa panji mungamba kusambira mutu wakwamba.