Umo Tingacitira na Burosha Lakuti Mbanjani Ŵakucita Khumbo la Yehova Mazuŵa Ghano?
Burosha Liphya Ilo Lalembeka Kuti Litovwire Kulongozgera Awo Tikusambira Nawo Baibolo ku Gulu la Yehova
1. Kasi cilato ca burosha la Khumbo la Yehova nchakuti wuli?
1 Kasi muli kwambapo kale kudumbiskana na ŵanthu na burosha la Mbanjani Ŵakucita Khumbo la Yehova Mazuŵa Ghano? Cilato ca burosha ili nchakuti awo tikusambira nawo Baibolo (1) ŵatimanye makora nga ŵanthu ŵa Ciuta, (2) ŵamanye ivyo tikucita, (3) ŵamanye umo gulu lithu likwendeskera vinthu. Burosha la Khumbo la Yehova lili na masambiro ghafupi agho ghangasambirika mu maminiti 5 panji 10 pera paumaliro wa sambiro lililose.
2. Longosorani umo burosha ili lili kulembekera na ivyo vilimo.
2 Umo Lili Kulembekera: Burosha ili lili kugaŵika mu vigaŵa vitatu. Cigaŵa cilicose cikulongosora fundo zitatu zakukhwaskana na gulu la Yehova izo zayowoyeka pacanya apa. Mitu yose 28 yalembeka nga ni fumbo, ndipo pasi pake pali tumitu tucokotucoko uto twalembeka mu mazgu ghafipa comene. Muli vithuzithuzi vyakufuma mu vyaru vyakujumpha 50, kulongora kuti nchito yithu yikucitika pa caru cose. Mitu yinandi yili na bokosi lakuti “Manyani Vinandi,” ilo lili na masacizgo gha ivyo mungaciska msambiri winu kuti wacite.
3. Kasi tingacita wuli na burosha la Khumbo la Yehova?
3 Umo Mungacitira Na Burosha Ili: Mulongorani fumbo ilo ni mutu wa sambiro ilo mudumbiskanenge. Ndipo apo mukuŵazgira lumoza sambiro, longosorani fundo zikuru izo zili mu tumitu tucokotucoko uto tuli mu mazgu ghafipa comene. Paumaliro, dumbiskanani mafumbo ghakuweleramo agho ghali pasi pa peji. Mungaŵazga mutu wose nyengo yimoza panji mungaŵazga na kudumbiskana ndime yiliyose payekhapayekha. Mungawona mwekha malemba agho mungaŵazga. Kuluwa yayi kudumbiskana vithuzithuzi na bokosi lakuti “Manyani Vinandi.” Kanandi cikuŵa makora kuti para mwamalizga sambiro, mulutenge pa lakulondezgapo. Kweni muli ŵanangwa kujwanthira na kuluta pa sambiro ilo mwawona kuti lingawovwira msambiri. Mwaciyelezgero, para ungano wa dera panji wa cigaŵa waneng’enera, mungajwanthira dankha mitu yinyake na kuluta pa sambiro 11.
4. Cifukwa wuli muli ŵakukondwa na burosha liphya ili?
4 Para tikusambira Baibolo na munthu, tikumovwira kuti wamanye Adada ŵithu ŵakucanya. Ndipouli, tikwenera kumovwiraso kuti wamanye gulu la Yehova. (Zinth. 6:20) Tili ŵakukondwa comene kuŵa na burosha ili, ilo litovwirenge kuti ciŵe cipusu kovwira ŵanthu pa nkhani iyi!