Kunozgekera Mazgu Ghakwamba Ghakucontha Mtima
1. Kasi mazgu ghawemi ghakwamba ngakuzirwa wuli?
1 Para ku cakurya ŵathirako nthendero panji tunthu tunyake twakunoweskera, ŵanthu ŵakunora mino. Mwakuyana waka, mazgu ghawemi ghakwamba ghakupangiska munthu kuti wanweke na ivyo tidumbiskanenge. Ivyo tingayowoya mu mazgu ghakwamba vingapambana. Tingayowoya vicoko waka panji vinandi. Fundo izo tingayowoya nazo zingapambana. Kweni cakukhumbikwa nkhughanaghanirapo na kunozgekera ivyo tamuyowoya. (Zinth. 15:28) Kasi nchivici cikovwira kuti mazgu ghakwamba ghaŵe ghakucontha mtima?
2. Kasi tinganozgekera wuli mazgu ghakwamba agho ŵanthu ŵanganweka nagho?
2 Sankhani Nkhani Izo Ŵanthu Ŵangatemwa: Tikwenera kuyowoya mazgu ghakwamba agho munthu wanganweka nagho. Para tingaleka kucita nthena, cidumbirano cingamalira pa nthowa. Ntheura para mukunozgekera, ghanaghanirani nkhani izo ŵanthu mu dera linu ŵakutemwa. Kasi ŵanthu mu dera linu ŵakutemwa nkhani wuli? Zakukhwaskana na boma liwemi? Mbumba yakukondwa? Panji kumara kwa nkhondo? Kanandi ŵanthu ŵakutemwa kuyowoyapo maghanoghano ghawo para tikuyowoya nawo. Ntheura mukwenera kunozgekera fumbo ilo lingapangiska munthu kughanaghanirapo na kuyowoyapo maghanoghano ghake. Nyengo zinyake mungalondezga masacizgo agho ghakuŵa mu Uteŵeti Withu wa Ufumu na kusintha kuyana na cigaŵa cinu. Mungayezgelera masacizgo agha pa Nyengo Yakusopera ya Mbumba.
3. Kasi tingasintha wuli mazgu ghakwamba kuyana na mitheto panji umo ŵanthu ŵaliri mu dera lithu?
3 Ghanaghanirani Mitheto na Umo Ŵanthu Ŵaliri: Ku vyaru vinyake, ŵanthu ŵakukhumba kuti tiyowoyenge waka ivyo tapukwa nyengo yeneyiyo. Apo ku vyaru vinyake, ŵakuwona kuti munthu walije nchindi para wakuyowoya ivyo wapukwa kwambura kuŵatawuzga panji kuyowoya zina lake na uko wafuma. Ndipo ku malo ghanyake, cifukwa cakuti ŵanthu ŵakutemwa kusopa, tingazunura Baibolo mu mazgu ghakwamba. (Mil. 2:14-17) Kweni uko ŵanthu Mbakhristu yayi, panji uko ŵakusopa na kusopa wuwo yayi, cingaŵa ciwemi kuzunura Baibolo para tikuwelerako.—Mil. 17:22-31.
4. Kasi ni fundo wuli izo tikwenera kughanaghanira para tikuyowoya mazgu ghakwamba?
4 Mazgu Ghakwamba: Nozgekerani makora mazgu ghakwamba. Masentesi ghafupi na ghapusu ndigho ngawemi comene. Umo tikuyowoyera mazgu ghithu ghakwamba nako nkhwakuzirwa comene. Yowoyani mwakukhuka. Mumwemweterenge kufumira pasi pa mtima. Para tingalondezga masacizgo agha, tizamunozgekera mazgu ghakwamba ghakucontha mtima agho ghazamovwira ŵanthu ŵa mu cigaŵa cithu kuti ŵarye pa “thebulu la Yehova.”—1 Kor. 10:21.