Ŵanthu Awo Tikuŵapa Magazini Mwezi Uliwose Tingamba Kusambira Nawo Baibolo
1. Cifukwa wuli gulu la Yehova likuciska ŵapharazgi kupangana na ŵanthu kuti ŵaŵapenge magazini mwezi uliwose?
1 Ŵanthu ŵanandi ŵakukhumba yayi kuti tisambirenge nawo Baibolo, kweni magazini ghithu ŵakughatemwa. Ntheura gulu la Yehova likuciska ŵapharazgi kupangana na ŵanthu kuti ŵaŵapenge magazini mwezi uliwose. Para ŵanthu ŵakuŵazga magazini ghithu mwezi na mwezi, ŵakwamba kutemwa Mazgu gha Ciuta. (1 Pet. 2:2) Nyengo zinyake ivyo ŵakuŵazga vingaŵakhwaska, ndipo vingapangiska kuti ŵazomere sambiro.
2. Kasi tingacita wuli kuti ŵanthu awo tikuŵagaŵira magazini ŵambe kunweka?
2 ‘Thilirani’ Mbuto za Unenesko: M’malo mwa kumulekera waka magazini, dumbiskanani nayo na kuŵa nayo paubwezi. Ivi vimovwiraninge kuti mumanye ivyo wakutemwa, ivyo wakugomezga, na umo vinthu viliri pa umoyo wake. Kumanya vinthu ivi kumovwiraninge kuti muyowoye mwamahara. (Zinth. 16:23) Nozgekerani makora pambere mundalute. Para nkhwamacitiko, yowoyanipo fundo yimoza na kuŵazga lemba kufuma mu magazini ilo likukhozgera fundo iyo mwayowoya. Lembani deti ilo mwawelerako, mabuku agho mwamupa, mutu wa nkhani na malemba agho mwadumbiskana.
3. Kasi tikwenera kuwelerako kalinga kwa ŵanthu awo tikuŵapa magazini?
3 Kasi Mukwenera Kuwelerako Kalinga? Mukwenera kuwelerako kamoza pa mwezi kuti mukaŵape magazini ghaphya. Kweni nyengo zinyake mungawelerako kanandi kuyana na umo vinthu viliri kwa imwe na uyo mukumupa magazini. Mwaciyelezgero, para pajumpha sabata yimoza panji ziŵiri, mungawelerako na kuyowoya kuti, “Nati nimulongorani nkhani yinyake mu magazini yira nkhamupani.” Ici cingapangiska kuti waŵazge nkhani iyo mwamulongora. Usange wali kuŵazga kale, mungamufumba maghanoghano ghake pa nkhani iyo na kudumbiskana nayo pacoko waka. Para wakutemwa kuŵazga mabuku ghithu, mungawelerako kuti mukamupe thirakiti, burosha, panji buku ilo tikugaŵira mwezi uwo.
4. Kasi tikwenera kucitaci nyengo na nyengo kuti tiwone usange awo tikuŵapa magazini ŵakukhumba kusambira Baibolo?
4 Kulindizga munthu kuti wacite kumupemphani sambiro yayi. Imwe ndimwe mukwenera kumupempha kuti musambirenge nayo. Usange pakwamba wakakana sambiro, nyengo na nyengo mukwenera kumulongora nkhani yakuti “Mafumbo Ghazgoleka” mu Gongwe la Mulinda kuti muwone usange wakukhumba kuti mudumbiskanenge nayo. Nyengo zinyake mungamba kusambira nayo kwa nyengo yicoko waka. Kweni usange mwatondeka kwambiska sambiro, mungalutilira kumupa magazini kuti wambe kunweka.