Ivyo Vingatovwira Kuti Tiŵe Ŵaluso mu Uteŵeti—Kusanga Ŵanthu Ŵakuti Tiŵapenge Magazini Mwezi Uliwose

Chifukwa Wuli Nkhwakuzirwa? Ŵanthu ŵanandi awo ŵakutemwa magazini ghithu ŵakukhumba yayi kuti tisambirenge nawo Baibolo. Panyake ŵakukana chifukwa chakuti mbakukhorwa na chisopa chawo, panji ŵakuwona kuti ŵalije nyengo. Kweni para ŵakuŵazga magazini ghithu mwezi na mwezi, ŵangamba kunweka panji kutemwa Mazgu gha Chiuta. (1 Pet. 2:2) Mu magazini mungaŵa nkhani yinyake iyo yingaŵakhwaska, kweniso vinthu vingasintha pa umoyo wawo. Para tingaŵayendera pafupipafupi na kudumbiskana nawo kwa nyengo yichoko waka, ŵangamba kufwatuka kweniso nase tingamanya ivyo ŵakutemwa na ivyo ŵakwenjerwa navyo. Paumaliro tingamba kusambira nawo Baibolo.

Umo Tingachitira:

Mwezi uliwose tikwenera kuŵapa magazini gha Gongwe la Mulinda na Galamukani! agho ghafuma sono. Tingaŵayenderaso mukati mwa mwezi kuti tikaŵalongore nkhani yinyake mu magazini agho tikaŵapa. Ichi chingawovwira kuti ŵaŵazge nkhani iyo. Panyake tingaŵapa buku, burosha, panji thirakiti ilo tikugaŵira mu mwezi uwo. Tilembenge deti, mabuku agho taŵapa, mutu wa nkhani na malemba agho tadumbiskana.—Wonani Uteŵeti Withu wa Ufumu wa Janyuwale 2014, peji 3.
Nyengo zose tinozgekerenge pakukapeleka magazini. M’malo mwa kuŵalekera waka magazini, tidumbiskanenge nawo na kuŵa nawo paubwezi. Ichi chingawovwira kuti ŵambe kunweka.
Para m’pata wakuti tambe kusambira nawo Baibolo wasangika, tingawutayanga yayi. Usange munthu uyo tikumupa magazini mwezi uliwose watifumba ivyo Baibolo likuyowoya pa nkhani yinyake, tikize na buku ilo likulongosora nkhani iyo, na kudumbiskana nayo. Pambere tindalute, timufumbe fumbo lakukolerana na nkhani iyo lakuti tizakadumbiskane ulendo wakulondezgapo. Usange tikwiza nyengo zose na kudumbiskana nayo kufuma mu Baibolo panji buku lililose ilo tikusambizgira ŵanthu Baibolo, nanga kungaŵa kwa nyengo yichoko waka, ndikuti tikusambira nayo Baibolo. Kasi muli kumupa burosha la Ciuta Wakutiphalira Uthenga Uwemi! na kumulongora umo tikusambilira Baibolo na ŵanthu? Kasi muli kumulongora vidiyo yakuti Chifukwa Wuli Mukwenera Kusambira Baibolo? na yakuti Kasi Ŵakaboni ŵa Yehova Wakuchita Wuli Pakusambizga Ŵanthu Baibolo? Nangauli kumasinda munthu wangaŵa kuti wakakana kusambira, kweni vinthu vikusintha. Mungachita makora kumupemphaso kuti musambirenge nayo.

Yezgani Sachizgo Ili Mwezi Uno:

Lembani mazina gha wose awo mukughanaghana kuti mungamba kuŵapa magazini mwezi uliwose. Ŵapani magazini agho ghafuma sono, na kuŵaphalira kuti muzamwizaso na magazini gha mwezi wakulondezgapo.