Umo Tingacitira na Magazini Ghakale
Palije uyo wangasanga candulo na magazini ghakale usange tingaghasunga waka panji kutaya. Ipo tikwenera kugaŵira magazini agha. Magazini yingawovwira munthu kuti wanweke na unenesko na kwamba kucema pa zina la Yehova. (Rom. 10:13, 14) Pasi apa pali masacizgo gha umo tingacitira na magazini ghakale.
Para tikupharazga ku vigaŵa ivyo tikupharazgako kaŵirikaŵiri yayi, tingaghaleka panyumba apo palije ŵanthu. Kweni tikwenera kughaŵika pa malo apo ŵanthu ŵanyake ŵangaghawona yayi.
Para tikupharazga pa siteji ya basi panji uko ŵanthu ŵakukwelera sitima, tingaŵafumba usange ŵangatemwa kuŵazga cinthu cinyake. Tingaŵalongora magazini ghanandi ghakale kuti ŵasankhepo.
Tingakaleka magazini agha ku layibulare ya ku sukulu panji malayibulare ghanyake agho ghali mu cigaŵa cithu, ku vipatala ivyo vili na malo agho ŵanthu ŵakulindilirapo pambere ŵandakumane na dokotala, na malo ghanyake ghalighose ghanthena agha mu cigaŵa cithu. Cingaŵa ciwemi kupempha dankha kwa uyo wakukhala pa malo agha. Usange pali magazini kale, kuŵikapo ghanyake yayi.
Para tikunozgekera kuwelerako kwa munthu, tikwenera kughanaghanira ivyo munthu waliyose wakutemwa. Kasi ngwakutora panji kutengwa? Kasi wakutemwa kuvakaca? Kasi wakutemwa kulima? Penjani mu magazini ghakale kuti muwone usange muli nkhani iyo wangatemwa na kumulongora para mwawelerako.
Para munthu wakunweka mwamwendera kanandi kwambura kumusanga panyumba, pa dazi ilo muzamumusangira mungamulongora magazini ghakale agho ghakamujumpha panyengo iyo wakasangikanga yayi.