Mathirakiti Agho Ghalembeka mu Nthowa Yiphya
1. Kasi ni vici ivyo vyalembeka mu nthowa yiphya?
1 Pa Ungano wa Cigaŵa wa 2013 wakuti “Mazgu gha Ciuta Mbunenesko!” pakafuma mathirakiti ghaphya ghankhondi. Paliso Uthenga wa Ufumu Na. 38, wakuti “Kasi Ŵakufwa Ŵazamuwuka Nadi?” Mathirakiti 6 agha ghalembeka mu nthowa yiphya. Cifukwa wuli ghalembeka mu nthowa yiphya? Kasi tingacita wuli para tikugaŵira mathirakiti agha kunyumba na nyumba?
2. Cifukwa wuli mathirakiti agha ghalembeka mu nthowa yiphya?
2 Cifukwa Wuli Ghalembeka mu Nthowa Yiphya?: Kuti tipharazge mwaluso tikwenera kulondezga nthowa zinayi izi: (1) Mufumbani kuti mumanye maghanoghano ghake. (2) Ŵazganipo lemba. (3) Mugaŵirani thirakiti. (4) Mufumbani fumbo lakuti muzakazgore para mwizaso na kupangana nayo zuŵa ilo mwizirenge. Ciŵenge cipusu kulondezga nthowa zinayi izi cifukwa ca umo mathirakiti agha ghalembekera.
3. Kasi tingagaŵira wuli mathirakiti agha mu uteŵeti?
3 Umo Tingacitira na Mathirakiti Agha: (1) Para mwamutawuzga, mulongorani mafumbo agho ghali pakwambilira pa thirakiti ili. (2) Julani mukati na kudumbiskana kamutu kakuti: “Ivyo Baibolo Likuyowoya.” Ŵazgani lemba kufuma mu Baibolo. Para wali na nyengo, dumbiskanani vyandulo ivyo wangasanga. (3) Mugaŵirani thirakiti na kumupempha kuti waŵazge para wasanga nyengo. (4) Pambere mundalute, mulongorani fumbo ilo lili kuumaliro kwa thirakiti ili, ilo lili pa kamutu kakuti “Fundo Yakuti Mughanaghanirepo” na kupangana nayo kuti mwizeso kuzakazgora fumbo ili.
4. Kasi tingacita wuli na mathirakiti ghaphya para tawelerako?
4 Ivyo tingakayowoya para tawelerako navyo ni vyakusuzga yayi. Mungaŵazga malemba agho ghali kuumaliro kwa thirakiti kuti muzgore fumbo ilo mukamufumba ulendo wajumpha. Pambere mundalute, mulongorani cithuzi ca burosha la Uthenga Uwemi. Kufuma apo, mulongorani burosha ili na mutu uwo ukulongosora vinandi vya nkhani iyo mwadumbiskananga, na kumugaŵira burosha. Para wapoka, mungapangana nayo kuti muzakadumbiskane ivyo vili mu burosha ili para mwizaso. Apa nthe ndikuti mwambiska sambiro. Panji m’malo mwa kumugaŵira burosha, mungamugaŵira thirakiti linyake na kupangana nayo kuti muzakadumbiskane ulendo unyake.
5. Kasi mathirakiti ghakutovwira wuli mu uteŵeti?
5 Tagwiliskira nchito mathirakiti mu uteŵeti kwa vyaka vyakujumpha 130. Nangauli ghakupambana ukuru na umo ghakulembekera, kweni ghaŵa ghakovwira comene mu uteŵeti. Tiyeni tigwiliskire nchito makora mathirakiti ghaphya agha kuti tilutilire kuthandazga ivyo Baibolo likuyowoya.—Zinth. 15:7a.