Umo Mungambiskira Chidumbirano na Mathirakiti

Kwambira waka mu Janyuwale 2018, pa peji lakwamba la Kabuku ka Maungano pakuŵa masachizgo gha umo tingapharazgira. Masachizgo agha ghakutichiska kuti tiŵikenge mtima pakudumbiskana na ŵanthu kuluska kuŵagaŵira waka mabuku. Kuti ŵapharazgi ŵawovwirike umo ŵangapharazgira, tikuwonelera mavidiyo agho ghakulongora umo tingambiskira chidumbirano mwakugwiliskira ntchito Baibolo. Kasi ichi chikung’anamura kuti para tikupharazga nyumba na nyumba tikwenera yayi kugwiliskira ntchito mabuku? Yayi, chifukwa mathirakiti nayo ghangaŵa ghakovwira kwambiskira chidumbirano. Tingagwiliskira ntchito masachizgo ghakulondezgapo agha para tikugaŵira mathirakiti:

1. Mufumbani fumbo ilo lili pakwambilira kuti wasankhepo zgoro.

2. Mulongorani zgoro la mu Baibolo ilo lili pa peji lachiŵiri pachanya. Usange wali na nyengo, ŵerengani na kudumbiskana nayo fundo zinyake izo zili mukati mu ka thirakiti aka.

3. Mupani kathirakiti mweneko nyumba, na kumuchiska kuti waŵazge fundo zose apo wangaŵira na mpata.

4. Pambere mundalute, mulongorani apo palembeka mazgu ghakuti “Fundo Yakuti Mughanaghanirepo” na kupangana kuti muzakadumbiskane zgoro mu Baibolo ulendo unyake

Para mwawelerako, dumbiskanani zgoro ndipo mulekerani fumbo lakuti muzakadumbiskaneso ulendo wakulondezgapo. Mungasankha fumbo kufuma pa webusayiti yithu panji mungasankha fumbo kufuma mu kabuku ako kakuwoneka kuumaliro wa ka thirakiti. Pa nyengo yakwenelera, mulongorani ka burosha kakuti Chiuta Wakutiphalira Uthenga Uwemi! panji limoza mwa mabuku agho tikusambizgira ŵanthu Baibolo.