Kasi Tingagwiliskira Wuli Ntchito Masachizgo gha Umo Tingapharazgira

Kwambira mu Janyuwale 2018, pa peji lakwamba la Kabuku ka Maungano pakuŵa masachizgo gha umo tingapharazgira. Kasi tikwenera kugwiliskira wuli ntchito masachizgo agha?

Para Muli na Nkhani ya Msambiri: Mukwenera kugwiliskira ntchito fumbo, lemba, na fumbo lakovwira kuti muzakawelereko. Kweni ichi chikung’anamura kuti mukwenera kulondezga mazgu ghalighose agho ghali pa chigaŵa ichi yayi. M’malo mwake mungayowoya mwakupambanako munthowa yinu na yinu. Mungapelekaso buku lililose ilo tikusambizgira ŵanthu Baibolo nanga lingaŵa kuti lindazunurike pa masachizgo.

Para Muli mu Uteŵeti: Masachizgo agha ghakutovwira umo tingapharazgira. Para munthu walongora kuti ngwakunweka mungalutilira kudumbiskana nayo ndipo panji mungagwiliskira ntchito masachizgo ya ulendo wakuwelerako. Mungasintha masachizgo agha ndipo mungapharazga munthowa yinyake. Kasi ŵanthu ŵanandi mu chigaŵa chinu ŵanganweka na sachizgo la mwezi wamara panji lemba linyake? Kasi mu chigaŵa chinu mwachitika nkhani yinyake mwasonosono iyo ŵanthu ŵakunweka nayo? Mungagwiliskira ntchito masachizgo ghalighose, kweni chilato chinu chiŵenge chakuti muchite ‘vinthu vyose chifukwa cha makani ghawemi, mwakuti muphalireko ŵanyake makani agha.’—1Ko 9:22, 23.