Musungenge Nyengo
1. Kasi Yehova wakucita wuli pa nkhani ya nyengo?
1 Yehova wakusunga nyengo. Wakovwira ŵateŵeti ŵake “pa nyengo yakwenelera.” (Heb. 4:16) Kweniso wakupeleka cakurya cauzimu “pa nyengo yakwenelera.” (Mat. 24:45) Ntheura tili na cigomezgo kuti zuŵa la ukali wake ‘liziwulikenge,’ panji kuti kucedwa cara. (Hab. 2:3) Tikutumbikika comene cifukwa cakuti Yehova wakucita vinthu panyengo yake. (Sal. 70:5) Kweni pakuti ndise ŵakutangwanika ndiposo ŵambura kufikapo, vikutisuzga kusunga nyengo. Cifukwa wuli tikwenera kusunga nyengo?
2. Cifukwa wuli Yehova wakucindikika para tikusunga nyengo?
2 Mazuŵa ghaumaliro ghano, ŵanthu ŵanandi vyakusunga nyengo ŵalije navyo nchito cifukwa mbakujitemwa kweniso mbambura kujikora. (2 Tim. 3:1-3) Ntheura usange Ŵakhristu ŵakusunga nyengo pakwiza ku nchito, ku maungano na para ŵapangana na ŵanyawo, ŵanthu ŵakuwona, ndipo Yehova wakucindikika. (1 Pet. 2:12) Kasi tikwamba nchito yakulembeka panyengo yake, kweni tikufika mwakucedwa pa vinthu vyauzimu? Usange tikusunga nyengo pakwiza ku maungano na kuŵapo pa sumu na lurombo lwakwamba, tikulongora kuti tikukhumba kuyezga Ŵadada ŵithu ŵakucanya.—1 Kor. 14:33, 40.
3. Cifukwa wuli para tikusunga nyengo tikulongora kuti tikughanaghanira ŵanyithu?
3 Kweniso para tikusunga nyengo tikulongora kuti tikughanaghanira ŵanyithu. (Fil. 2:3, 4) Usange tafika panyengo yake pa maungano gha mpingo na ghakunozgekera uteŵeti, ŵabali na ŵadumbu tikuŵatimbanizga yayi. Kweni para kanandi tikwiza mwakucedwa, tikulongora kuti nyengo iyo tikwizira ise ndiyo njiwemi kuluska iyo mpingo uli kutema. Para tikusunga nyengo tikulongora kuti ndise ŵakugomezgeka na ŵamwamphu. Ŵanthu ŵanandi ŵakuwonga comene para munthu wakucita nthena.
4. Usange kanandi tikucedwa, kasi tingacita wuli kuti tisinthe?
4 Usange kanandi tikucedwa, tikwenera kujifumba cifukwa cake. Tikwenera kupanga ndondomeko kuti yitovwire kucita vinthu panyengo yake. Tilombe Yehova kuti watovwire. (1 Yoh. 5:14) Kusunga nyengo ni nthowa yimoza iyo tikulongolera kuti tikuzirwiska malango ghaŵiri ghakuru comene agho nkhutemwa Yehova na kutemwa ŵazengezgani ŵithu.—Mat. 22:37-39.