Cifukwa Wuli Tikwenera Kusunga Nyengo?

NCHIPUSU yayi kusunga nyengo. Vinyake mwa vinthu ivyo vingatitondeska kusunga nyengo nkhutalika kwa mtunda, unandi wa magalimoto pa msewu, ndiposo kuŵa na vyakucita vinandi. Kweni kusunga nyengo nkhwakuzirwa. Mwaciyelezgero, pa nchito munthu uyo ŵakuwona kuti ngwakugomezgeka na wakulimbikira ni uyo wakusunga nyengo. Kweni munthu uyo wakucedwa wangatimbanizga mulimo wa ŵanyake, ndiposo nchito iyo wangagwira yingaŵa yambura kulongosoka. Kucedwa kungapangiska mwana wa sukulu kuti watondeke kusambirako visambizgo vinyake ndipo ici cingacitiska kuti waleke kukwera. Para mulwari watondeka kufika ku cipatala pa nyengo iyo ŵapangana na dokotala, wangawovwirika mwakwenelera yayi.

Kweni ku malo ghanyake kusunga nyengo ŵalije nako nchito. Para tikukhala ku malo ghanthena, nase tingamba kuŵa na cizgoŵi ca kuleka kusunga nyengo. Para uko tikukhala ŵanthu ŵali na cizgoŵi ca kuleka kusunga nyengo, tikwenera kuyezgayezga kusunga nyengo. Kumanya kuzirwa kwa kusunga nyengo kutovwirenge. Cifukwa wuli tikwenera kusunga nyengo? Kasi tingacita wuli kuti tisungenge nyengo? Ndipo kasi tingasanga vyandulo wuli para tikusunga nyengo?

Yehova Ni Ciuta Wakusunga Nyengo

Cifukwa cikuru ico tikukhumbikwira kuti tisungenge nyengo nchakuti tikukhumba kuyezga Ciuta uyo tikumusopa. (Efe. 5:1) Yehova nchiyelezgero ciwemi comene pa nkhani ya kusunga nyengo. Nyengo zose wakucita vinthu pa nyengo yake, mwakuti wafiske vilato vyake. Mwaciyelezgero, apo Yehova wakakhumbanga kuparanya ŵanthu ŵaheni na ciwowota, wakaphalira Nowa kuti: “Jizengere cingalaŵa ca khuni la gofer.” Apo nyengo yakuparanyira ŵaheni aŵa yikaŵa pafupi, Yehova wakaphalira Nowa kuti wanjire mu cingalaŵa ndipo wakamumanyiska kuti: “Pakuti kwakhala mazuŵa ghankhondi na ghaŵiri, nditindirokweske vula pa caru mazuŵa makumi ghanayi, muhanya na usiku; ndipo vyamoyo vyose ivyo nkhavilenga ndiviparanye pa caru.” Ivyo Yehova wakayowoya vikacitika pa nyengo yake, “ghakati ghajumpha mazuŵa ghankhondi na ghaŵiri maji gha cigumura ghakaŵa pa caru.” (Gen. 6:14; 7:4, 10) Ghanaghanirani waka ico cikatenge cicitikirenge Nowa na mbumba yake ŵalekenge kunjira mu cingalaŵa pa nyengo yake. Mwakuyana na Ciuta uyo ŵakasopanga, nawo ŵakeneranga kusunga nyengo.

Pakati pakajumpha vilimika 450 kufuma apo ciwowota cikacitikira, Yehova wakaphalira Abrahamu kuti wazamuŵa na mwana musepuka mwa mweneuyo muzamufuma Mphapu yakulayizgika. (Gen. 17:15-17) Ciuta wakati Yisake wazamubabika “pa nyengo yakwimikika yeneyino mu cilimika ico cikwiza.” Kasi vikacitika nadi? Malemba ghakutiphalira kuti: “Sara wakatora nthumbo, wakamubabira Abrahamu mwanamsepuka mu ucekuru wake, pa nyengo yakwimikika yeneiyo Ciuta wakayowoyera naye.”—Gen. 17:21; 21:2.

Baibolo lili na viyelezgero vinandi ivyo vikulongora kuti Ciuta wakusunga nyengo. (Yer. 25:11-13; Dan. 4:20-25; 9:25) Baibolo likutiphalira kuti tilutilire kulindilira zuŵa la ceruzgo la Yehova. Nangauli mu kawonero ka wunthu lingaŵa nga ‘likuziulika,’ kweni tikusimikizgirika kuti ‘likuziulika cara.’—Hab. 2:3.

Kusunga Nyengo Nkhwakuzirwa pa Kusopa

Ŵanalume wose ŵa Israyeli ŵakeneranga kusangika pa “maungano gha Yehova gha viphikiro,” kweniso ŵakeneranga kwiza pa nyengo yake. (Lev. 23:2, 4) Ciuta wakatemaso nyengo zakupelekera sembe. (Ex. 29:38, 39; Lev. 23:37, 38) Asi ici cikulongora kuti Ciuta wakukhumba kuti ŵateŵeti ŵake ŵasungenge nyengo pakusopa?

Mu nyengo ya Ŵakhristu ŵakwambilira, mpositole Paulosi wakaphalira Ŵakhristu ŵa ku Korinte za umo maungano Ghacikhristu ghakeneranga kucitikira, iyo wakati: “Vinthu vyose vicitike mwakwenelera ndiposo mu ndondomeko.” (1 Kor. 14:40) Ntheura, maungano ghakeneranga kwamba pa nyengo yakuŵikika. Yehova wandasinthe umo wakuwonera nkhani ya kusunga nyengo. (Mal. 3:6) Ipo kasi tingacita wuli kuti tisungenge nyengo pa maungano agha.

Ivyo Tingacita Kuti Tisungenge Nyengo

Ŵanji ŵawona kuti kunozgekerathu nkhwakovwira. (Zinth. 21:5) Mwaciyelezgero, para tikukhumba kuluta ku malo ghanyake ndiposo kuti tikafike pa nyengo yake, kasi cingaŵa camahara yayi kwamba ulendo uwu pa nyengo yiwemi kuti tikafike pa nyengo yake? Kasi cingaŵa camahara yayi kusazgirako maminiti ghanyake kuti tileke kucedwa para vinthu vyamabuci vingaticitikira pa nthowa? (Muph. 9:11) Joze,a uyo nyengo zose wakusunga nyengo wakuti: “Cinthu cinyake ico cingawovwira munthu kuti wafikenge pa nyengo yake nkhumanya nyengo iyo wakumalira pakwenda.”

Ŵanji ŵawona kuti nchakwenelera kuŵeruka luŵiro ku nchito mwakuti ŵafikenge ku maungano nyengo yiwemi. Ndimo mbali munyake ku Ethiopia wakacitira. Mbali uyu wati wawona kuti nchito ya mashifiti iyo wakagwiranga yipangiskenge kuti wacedwenge na maminiti 45 ku maungano, wakapangana na munyake uyo ŵakasinthananga kuti pa zuŵa la maungano wizenge ku nchito mwakutendekera mwakuti iyo waŵerukenge luŵiro. Mbali uyu nayo wakamugwiliranga nchito munyake uyu kwa maora ghankhondi na ghaŵiri.

Para tili na ŵana cingaŵa cakusuzgirako comene kufika pa maungano panyengo yake. Kanandi mama ndiyo wakovwira ŵana kuti ŵanozgekere, ndipouli, ŵanyake mu mbumba nawo ŵakwenera kovwirapo. Mama munyake wa ku Mexico, zina lake Esperanza wakulera yekha ŵana ŵankhondi na ŵatatu. Mulara comene wali na vilimika 23 ndipo mucoko comene wali na vilimika 5. Mama uyu wakulongosora umo iyo na mbumba yake ŵakucitira kuti ŵasungenge nyengo, wakuti: “Ŵana ŵane ŵasungwana ŵalaraŵalara ŵakovwira ŵacokoŵacoko kuti ŵanozgekere. Ici cikunovwira kuti nimalizgenge luŵiro milimo ya pa nyumba kweniso kuti nane ninozgekere na kuluta ku maungano pa nyengo yake.” Mbumba iyi yili kutema nyengo yakufumirapo pa nyumba, ndipo kuti ivi vicitike, ŵakukolerana pakucita vinthu.

Vyandulo vya Kufika Luŵiro pa Maungano

Kughanaghanira vitumbiko vya kufika luŵiro pa maungano kungaticiska kuti nase tifikengepo luŵiro. Mudumbu munyake muwukirano, zina lake Sandira, uyo wali na cizgoŵi ca kufika luŵiro pa maungano, wakuti: “Ico nkhutemwera kwiza luŵiro ku maungano nchakuti nkhuŵa na mwaŵi wa kutawuzga ŵabali na ŵadumbu, kucezga nawo ndiposo kuŵamanya makora.” Para tikwiza mwakutendekera ku Nyumba ya Ufumu, tikuŵa na mwaŵi wa kucezga na ŵanyithu ndipo ŵakutiphalira umo ŵazizipizgira kuti ŵateŵetere Yehova mwakugomezgeka. Para tikusangika pa maungano na kudumbiskana vinthu vyakukhozga tingawovwira ŵabali na ŵadumbu, ‘kuŵaciskira ku citemwa na milimo yiwemi.’—Heb. 10:24, 25.

Sumu na lurombo lwakujulira ungano uliwose ni vyakuzirwa pa kusopa kwithu. (Sal. 149:1) Sumu zithu zikulumba Yehova, zikutikumbuska mikhaliro iyo tikwenera kuŵa nayo, ndiposo kuticiska kuti ticitenge uteŵeti mwakukwana. Wuli pakuyowoya za lurombo lwakujulira maungano? Kale, Yehova wakati tempele ni “nyumba [yake] ya malurombo.” (Yes. 56:7) Mazuŵa ghano napo, tikuwungana mwakuti tipeleke malurombo kwa Ciuta. Mu lurombo lwakujulira, tikulomba waka Yehova kuti watilongozge ndiposo kutipa mzimu wake pera yayi, kweni lukovwira kuti maghanoghano ghithu ghaŵe ghakunozgeka kupulikiska ivyo tidumbiskanenge. Tikwenera kufwilirapo kuti tifikenge pa maungano mwakutendekera, mwakuti timbengeko sumu yakujulira na kutegherezga lurombo lwakujulira.

Pakuyowoya za cifukwa ico wakufikira mwakutendekera pa maungano, Heleni, uyo wali na vilimika 23, wakati: “Nkhuwona kuti iyi ni nthowa yimoza iyo nkhulongolera kuti nkhutemwa Yehova, cifukwa ndiyo wakutipa vinthu vyose ivyo tikusambira pa maungano kusazgapo sumu na lurombo lwakujulira.” Asi ndimo nase tikwenera kuwonera nkhani iyi? Ntheura, tiyeni tiyezgeyezge kuŵa na cizgoŵi ca kusunga nyengo mu vyakucita vithu vyose, comenecomene vyakukhwaskana na kusopa Ciuta waunenesko.

[Mazgu ghamusi]

[Cithuzithuzi pa peji 26]

Nozgekeranithu

[Cithuzithuzi pa peji 26]

Pa nyengo yinu, sazgiraniko nyengo ya vyamabuci

[Vithuzithuzi pa peji 26]

Sangani vyandulo vya kufika mwakutendekera pa maungano