Bokosi la Fumbo
◼ Kasi ŵana ŵakwenera kusambizgika vici kuti ŵakure mwauzimu?
Ŵapapi awo Mbakhristu ŵakufwilirapo “kulanga [ŵana ŵawo] na kuŵasambizga maghanoghano gha Yehova.” (Efe. 6:4) Ŵakudumbiskana lemba la zuŵa na ŵana ŵawo mulenji uliwose. Panyengo yakusopera ya mbumba na pa vyakucita vinyake, ŵapapi na ŵana ŵawo ŵangawonelera vidiyo na kudumbiskana ivyo ŵawonelera. Ŵangasankha nkhani mu buku la Zimene Achinyamata Amadzifunsa kuti ŵadumbiskane. Ŵangaseŵera nkhani yinyake ya mu Baibolo panji kuyezgelera umo ŵangakacitira para ŵafumbika na ŵanyawo panji ŵasambizgi. Ndipouli, kuti ŵana ŵaŵe ŵakukhwima, ŵakwenera kusambizgika vinthu vyakunyang’amira vya mu Baibolo.—Heb. 6:1.
Ghanaghanirani ivyo tikusambizga awo tikuŵapharazgira mu cigaŵa cithu. Para munthu takumana nayo kakwamba panji tawelerako, kanandi tikwamba kusambira nayo buku la Kasi Baibolo Likusambizgaci Comenecomene? Para tamalizga kusambira nayo buku ili, tikwamba buku la “Jisungilirani mu Citemwa ca Ciuta.” Cifukwa? Buku la Baibolo Likusambizgaci likovwira ŵasambiri kumanya visambizgo vyakwambilira vya mu Baibolo. Buku la Citemwa ca Ciuta likovwira ŵasambiri umo ŵangalondezgera fundo za mu Baibolo pa umoyo wawo wa zuŵa na zuŵa. Para tasambira nawo mabuku ghose ghaŵiri, ŵasambiri ‘ŵakujintha misisi’ mwa Khristu na “kukhazikika mu cipulikano.” (Kol. 2:6, 7) Kasi mabuku agha ghangawovwiraso yayi ŵana ŵithu? Ŵana ŵithu nawo ŵakwenera kusambira vya sembe yakuwombora, vya Ufumu, na ivyo vikucitika para munthu wafwa. Ŵakweneraso kumanya cifukwa ico Ciuta wakuzomerezgera kuti tisuzgikenge na umo ŵangamanyira kuti tikukhala mu mazuŵa ghaumaliro. Ŵakwenera kukhorwa kuti Ŵakaboni ŵa Yehova ŵakusambizga unenesko. Kweniso ŵakwenera kupulikiska fundo za mu Baibolo na umo ŵangasambizgira “nkhongono zawo zakamanyiro.” (Heb. 5:14) Mbunenesko kuti ŵapapi ŵakwenera kughanaghanira ivyo ŵana ŵawo ŵangapulikiska kuyana na msinkhu wawo. Ndipouli, ŵana ŵanandi ŵakwamba kupulikiska vinthu vyakunyang’amira vya mu Baibolo ŵacali ŵacoko.—Luka 2:42, 46, 47.
Kuti ŵawovwire ŵapapi, pa jw.org paŵenge ivyo ŵapapi ŵangacita pakusambizga ŵana kufuma mu buku la Baibolo Likusambizgaci. Kuti musange vinthu ivi lutani apo pali mazgu ghakuti ZIMENE BAIBULO LIMAPHUNZITSA > ACHINYAMATA. Kunthazi pa jw.org pazamuŵa ivyo ŵapapi ŵangacita pakusambizga ŵana kufuma mu buku la “Citemwa ca Ciuta.” Kweni para mwakhumba mungagwiliskira nchito buku pakusambira na ŵana m’malo mwakuluta pa Webusayiti yithu. Ŵapapi ŵangawona ŵekha usange ŵangagwiliskira nchito mabuku agha pa Nyengo Yakusopera ya Mbumba, pakusambira Baibolo na mwana wawo, panji pakusambizga mwana wawo umo wangasambilira payekha.