Sumu Ziphya Izo Zikulumba Yehova
1 Ungano wapachaka wa Watch Tower Bible and Tract Society of Pennsylvania uwo ukachitika pa Okutobala 4, 2014, pakaŵa chipharazgo chakuti buku lithu la sumu lisinthenge. Yikaŵa nkhani yakukondweska chomene. Awo ŵakaŵa pa ungano uwu ŵakakumbuskika uwemi wa sumu zithu pakusopa.—Sal. 96:2.
2 Nyengo zinyake mungajifumba kuti ‘chifukwa wuli sumu zasintha?’ Pali vifukwa vinandi. Chakwamba ntchakuti gulu likusintha pa umo likupulikiskira malemba. Ntheura vikukhwaskaso sumu zithu. (Zinth. 4:18) Mazgu agho ghali mu sumu izi ghali kufuma mu Baibolo lakale la Chingelezi la New World Translation. Ipo mazgu gha mu sumu nawo ghakwenera kusintha kuti ghakolerane na agho ghali mu Baibolo liphya la Chingelezi la New World Translation. Pakuti pakukhumbikwa vinthu vinandi kuti sumu izi zisinthe, ŵasazgirengeko sumu zinyake zichoko waka.
3 Kasi tizamwamba kwimba sumu izi para buku lafuma? Yayi. Para pajumpha myezi yichoko waka, sumu zinyake ziphya ziŵenge pa Webusayiti ya jw.org. Ndipo tizamwimbanga sumu izi paumaliro wa Ungano wa Uteŵeti.
4 Umo Tizamuchitira Pakusambira Sumu Ziphya: Ntchakusuzga kumanya sumu ziphya. Ndipouli, nga ngwamasalmo, tikwenera kwimba pa maungano gha mpingo, ‘kukhala chete yayi.’ (Sal. 30:12) Kuti musambire sumu ziphya izi, chitani ivi.
Pulikizgani sumu za piyano mwakuwerezgawerezga. Para muchitenge nthena, muzikumbukirenge.
Ŵazgani na kuyezga kuzisungilira pamtima.
Para sumu yikwimba, namwe mulondezgenge mu buku linu m’paka muyimanye.
Yezgelerani kwimba sumu izi para mukusopa na mbumba yinu, m’paka mose muzimanye.
5 Paumaliro wa Ungano wa Uteŵeti pazamuŵa sumu yiphya, muzamupulikizga dankha ya piyano kamoza. Kufuma apo, muzamwimba sumu iyo nga umo mukuchitira na sumu zose.
6 Para tikwimba mwakukolerana pa maungano, tikulumba Yehova. Ntheura tikwenera yayi kufuma kuwaro para ni nyengo yakuti timbe sumu.
7 Paliso nthowa yinyake iyo tingalongolera kuti tikuwonga sumu zithu. Pambere chigaŵa chilichose chindayambe pa maungano gha dera na gha chigaŵa, tikupulikizga sumu zaving’wenyeng’wenye. Kaŵiri pachaka, ŵabali na ŵadumbu pa charu chose ŵakujipeleka kuti ŵakimbe sumu izi ku Patterson, New York. Ntheura, tikwenera kupulikira para cheyamani wakutipempha kuti tisange malo ghakukhala na kupulikizga sumu zaving’wenyeng’wenye. Para tichitenge nthena vitovwirenge kuti tinozgeke kupulikizga chigaŵa chakulondezgapo.—Ezra 7:10.
8 Paumaliro pa maungano, timbenge sumu yiphya ya mutu wakuti “Ufumu wa Chiuta Ukuwusa, Lekani Wize.” Sumu iyi yikulongosora kuti Ufumu wa Chiuta wakwaniska vyaka 100 ukuwusa.
9 Sumu ziphya ni “vinthu viwemi” ivyo Yehova watipa. (Mat. 12:35a) Mphanyi tose tasambira sumu ziphya izi na kwimba kufumira pasi pamtima, pakuti zikulumba na kuchindika Chiuta withu.—Sal. 147:1.