Mabuku Agho Tikusambizgira Ŵanthu
1. Kasi Taŵakhristu tikuyana wuli na ŵamisiri?
1 Ŵamisiri ŵakuŵa na vyakugwilira ntchito vyakupambanapambana. Vinyake ŵakuvigwiliskira ntchito pafupipafupi, ndipo vinyake panyengo. Ŵamisiri ŵaluso nyengo zose ŵakuwoneseska kuti ŵali na vyakugwilira ntchito. Ndipo ŵakumanya makora umo ŵangavigwiliskira ntchito. Baibolo likuchiska Mkhristu waliyose kuti wapharazgenge na kuŵa ‘wantchito wambura kukhozgeka soni na chilichose.’ (2 Tim. 2:15) Kasi ni buku wuli ilo ndakuzirwa chomene kuluska mabuku ghose agho tikusambizgira ŵanthu? Ni Baibolo, ilo likovwira ŵanthu kuti ‘ŵaŵe ŵasambiri.’ (Mat. 28:19, 20) Ntheura tikwenera kuŵa ŵaluso kuti ‘tichite mwakwenelera na mazgu gha unenesko.’ Kweniso pali mabuku ghanyake agho ghakutovwira kuti tisambizge ŵanthu unenesko. Tikwenera kughamanya makora kuti tisambizge ŵanthu mwaluso.—Zinth. 22:29.
2. Kasi ni mabuku wuli agho tikusambizgira ŵanthu nyengo zose?
2 Mabuku Agho Tikusambizgira Ŵanthu Nyengo zose: Kasi ni mabuku wuli ghanyake agho tingasambizgira ŵanthu padera pa Baibolo? Buku lakwamba nda Kasi Baibolo Likusambizgaci Comenecomene? Para tamara kusambira nayo buku ili, tikwamba la“Jisungilirani mu Citemwa ca Ciuta.” ilo likovwira munthu kuti walondezgenge fundo za mu Baibolo nyengo zose. Ntheura tikwenera kughamanya makora mabuku ghaŵiri agha. Paliso maburosha ghanyake agho ghakutovwira pakusambizga ŵanthu. Limoza lake ni burosha la Ciuta Wakutiphalira Uthenga Uwemi! ilo tikwambiskira masambiro gha Baibolo. Kweniso para mu chigaŵa chithu muli ŵanthu awo ŵakutondeka kuŵazga, panji ise tilije mabuku gha chiyowoyero chawo, tingagwiliskira ntchito maburosha gha Tegherezgani kwa Ciuta na Tegherezgani kwa Ciuta na Kuŵa Ŵamoyo Kwamuyirayira. Burosha lakuti Mbanjani Ŵakucita Khumbo la Yehova Mazuŵa Ghano?, lingawovwira uyo tikusambira nayo kuti wize ku gulu la Yehova. Kweniso, tili na mavidiyo agho ghangawovwira munthu kuŵa msambiri wa Yesu, nga ni Chifukwa Wuli Mukwenera Kusambira Baibolo?, Kasi pa Nyumba ya Ufumu Pakuchitika Vichi?, na Kodi Mulungu Ali Ndi Dzina? Ntheura tikwenera kughamanya makora mavidiyo agha.
3. Kasi nkhani izo zizamuŵa mu Uteŵeti Withu wa Ufumu zizamutovwira kuti tichite vichi?
3 Mu Uteŵeti Withu wa Ufumu muzamuŵa nkhani izo zizamutovwira kuti tisambizgenge mwaluso na mabuku ghithu. Apo tikuyezgayezga kupharazga mwaluso na mabuku agha, tilondezgenge ulongozgi wakuti: ‘Nyengo zose, uŵenge maso pa wamwene na pa ivyo ukusambizga. Ukhalilire mu vinthu ivi, chifukwa usange ukuchita ivi, ujiponoskenge wekha na awo ŵakukupulika’.—1 Tim. 4:16.