Ivyo Vingatovwira Kuti Tiŵe Ŵaluso mu Uteŵeti—Wovwirani Msambiri Kuti Waŵenge na Sambiro la Iyomwene Lachandulo

Chifukwa Wuli Nkhwakuzirwa? Kuti msambiri waŵe wakukhwima mwauzimu, wakwenera kusambira vinandi padera pa kumanya visambizgo vyakwambilira vya mu Mazgu gha Chiuta. (Heb. 5:12–6:1) Munthu wakwenera kulimbikira kuti wasambire vinandi. Wakwenera kumanya umo visambizgo viphya vikukolerana na ivyo wakuvimanya kale na kuwona umo wangavilondezgera. (Zinth. 2:1-6) Kweniso wakwenera kusambira umo wangachitira kafukufuku ndipo ivi vimovwirenge kuti wazgorenge mafumbo mwakugwiliskira ntchito mabuku ghithu. Usange msambiri wakulimbikira kulondezga ivyo wakusambira, vikumovwira kuti waleke kuthera para wasangana na viyezgo.—Luka 6:47, 48.

Umo Tingachitira:

Movwirani kumanya kuti ntchakuzirwa chomene kulomba kwa Yehova pambere wandambe kusambira.—Yoh. 14:26; 1 Kor. 2:10.
Kwambira waka pakwamba, muchiskani msambiri kuti wanozgekerenge sambiro la Baibolo. Mulongorani buku linu, na kumusambizga umo wangagwalira mizere kusi kwa fundo zikuru.
Movwirani msambiri kuti wazgorenge mu mazgu ghake na ghake. Sambiro la Baibolo lingaŵanga lakulopwa yayi. Lingaŵa lakulopwa usange mukufumba waka mafumbo ndipo msambiri nayo wakuŵazga waka mazgoro pa ndime.
Muchiskani msambiri kuti waŵazgenge Baibolo zuŵa lililose. Mulongorani ndondomeko yakuŵazgira Baibolo iyo yili pa jw.org. Pakukhumbikwira chitatata kuti munthu waŵazgenge Baibolo zuŵa lililose, kweni para wangalimbikira wangasanga chandulo chikuru chomene.—Sal. 1:2, 3.
Mulongorani msambiri winu umo wangasangira mazgoro gha mu Baibolo pa Watchtower Library panji mu mabuku ghithu nga ni Buku la Mboni za Yehova Lofufuzira Nkhani panji Kukambitsirana za m’Malemba. Movwirani kuti wamanye vimanyikwiro vya mabuku agho tikugwiliskira ntchito chomene pa maungano gha mpingo.

Yezgani Sachizgo Ili Mwezi Uno:

Paumaliro wa kamutu kachoko panji mutu ukuru, pemphani msambiri wa Baibolo kuti wayowoye mwakudumura ivyo wasambira. Usange mulije munthu uyo mukusambira nayo, yezgelerani kuyowoya mwakudumura ivyo mwasambira mu Baibolo panji mu ndime ya mu Gongwe la Mulinda kuti mukuzge luso lwinu lwa kupulikiska vinthu.